Hanorin Ita-nia oan

Tanbasá mak ema barak hadomi Dorcada?

ITA hotu hakarak atu ema hadomi ita. Ó mós sente hanesan neʼe ka lae?—a Bíblia konta kona-ba feto ida neʼebé ema barak hadomi. Nia naran Dorcada.

Dorcada hela iha sidade naran Jope neʼebé besik Tasi-Mediterráneu. Jerusalém dook maizumenus kilómetru 56 husi Jope. Dorcada sai Jesus nia dixípulu kuandu kongregasaun kristaun sei foun.

Tuir ó-nia hanoin, tanbasá mak ema barak hadomi Dorcada?— Bíblia dehan katak nia hatudu hahalok diʼak no fó prezente ba ema barak. Nia suku roupa furak ba feto-faluk sira. Nia mós halo tuir Jesus hodi haklaken ba ema barak kona-ba Maromak neʼebé loos, Jeová.

Ó hatene saida mak akontese ba Dorcada?— Dorcada sai moras tebes no mate. Ninia kolega sira triste tebes. Entaun sira haruka ema atu bá hasoru apóstolu Pedro. Pedro hela iha fatin neʼebé dook maizumenus kilómetru 16 husi Jope. Sira husu nia atu mai lalais. Kuandu Pedro toʼo mai, nia saʼe ba andár leten atu haree Dorcada. Feto hotu tanis no sira hatudu ba Pedro roupa neʼebé Dorcada suku ba sira.

Pedro haruka ema hotu atu sai ba liʼur. Maski Pedro no apóstolu sira seluk halo milagre tiha ona, maibé sira seidauk halo milagre atu halo ema moris hiʼas. Tuir ó-nia hanoin, Pedro sei halo saida?—

Pedro hakneʼak besik Dorcada nia isin-mate hodi halo orasaun ba Maromak Jeová. Depois, nia bolu Dorcada atu hamriik no nia hamriik duni! Pedro lolo nia liman atu ajuda nia. Depois nia bolu feto-faluk sira no ema seluk atu tama no haree. Karik sira hotu kontente tebes, loos ka lae?—

Saida mak ita aprende husi istória kona-ba Dorcada nia moris-hiʼas? Ita aprende katak se ita ajuda ema seluk, ema seluk sei hadomi ita. Maibé, buat neʼebé importante liu fali ida-neʼe mak Maromak sei hadomi ita no hanoin-hetan ita. Nia sei la haluha buat diʼak neʼebé ita halo ba ema seluk. No mós, nia sei fó ba ita moris rohan-laek iha mundu foun.

Lee husi ó-nia bíblia

Apostolu 9:36-43

Apokalipse 21:3-5

[Nota–rodapé]