Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • w23 Novembru p. 26-30
  • Haʼu sente seguru tanba tau fiar ba Jeová

La iha video neʼebé bele loke.

Deskulpa, la bele loke vídeo.

  • Haʼu sente seguru tanba tau fiar ba Jeová
  • Livru Haklaken fó sai Maromak Jeová nia Ukun (Estudu)—2023
  • Subtítulu
  • Informasaun seluk neʼebé hanesan
  • OINSÁ HAʼU KOÑESE JEOVÁ
  • TAU FIAR BA JEOVÁ DURANTE FUNU
  • EMA FÓ-TERUS IHA NIJER
  • “AMI LADÚN HATENE KONA-BA SERBISU HAKLAKEN IHA RAI-GINÉ”
  • TAU FIAR BA JEOVÁ NUʼUDAR FEEN-LAʼEN
  • JEOVÁ PROTEJE AMI
  • Dalan oioin atu aumenta ita-nia serbisu haklaken
    Organizasaun neʼebé Halo Jeová nia Hakarak
  • Haʼu-nia família nia istória hametin haʼu
    Livru Haklaken fó sai Maromak Jeová nia Ukun (Estudu)—2019
  • Tanbasá mak ema barak hadomi Dorcada?
    Livru Haklaken fó sai Maromak Jeová nia Ukun—2011
  • Haʼu haree Jeová nia povu hatudu fiar
    Livru Haklaken fó sai Maromak Jeová nia Ukun (Estudu)—2023
Livru Haklaken fó sai Maromak Jeová nia Ukun (Estudu)—2023
w23 Novembru p. 26-30
Israel Itajobi.

ESPERIÉNSIA

Haʼu sente seguru tanba tau fiar ba Jeová

ESPERIÉNSIA HUSI ISRAEL ITAJOBI

BAINHIRA ema husu kona-ba haʼu-nia esperiénsia moris, baibain haʼu hatete: “Haʼu mak hanesan mala ida iha Jeová nia liman!” Hanesan haʼu bele lori haʼu-nia mala ba fatin naran deʼit tuir haʼu-nia hakarak, haʼu mós hakarak Jeová no ninia organizasaun atu halo ida-neʼe ba haʼu, katak dirije haʼu kona-ba atu bá neʼebé no bainhira mak atu bá. Haʼu-nia knaar balu mak susar no balu mak perigu. Maski nuneʼe, haʼu aprende katak hodi tau fiar ba Jeová haʼu bele sente seguru.

OINSÁ HAʼU KOÑESE JEOVÁ

Haʼu moris iha tinan 1948, iha knua kiʼik iha rai-Nijéria nia parte sudueste. Iha tempu neʼebá, apá nia alin-mane naran Moustapha no haʼu-nia maun boot Wahabi hetan batizmu nuʼudar Testemuña ba Jeová. Bainhira haʼu tinan sia, apá mate. Haʼu sente triste tebes. Wahabi dehan katak haʼu bele hasoru fali apá iha moris-hiʼas. Neʼe fó kmaan mai haʼu no book haʼu atu estuda Bíblia. Haʼu hetan batizmu iha tinan 1963. Haʼu-nia maun-alin naʼin-tolu mós hetan batizmu.

Iha tinan 1965, haʼu bá hela ho haʼu-nia maun Wilson iha sidade Lagos no kontente atu ransu ho pioneiru regulár sira iha Kongregasaun Igbobi. Sira-nia haksolok no laran-manas book tebes haʼu, no iha fulan-Janeiru tinan 1968 haʼu hahú serbí nuʼudar pioneiru.

Irmaun Albert Olugbebi neʼebé serbí iha Betel organiza reuniaun espesiál ho joven sira no fó sai katak rai-Nijéria nia parte norte presiza pioneiru espesiál. Haʼu sei hanoin-hetan irmaun Albert neʼebé koʼalia ho laran-manas dehan: “Imi mak joven, no imi bele uza imi-nia tempu no forsa atu serbí Jeová. Iha serbisu barak atu halo!” Haʼu hakarak atu banati-tuir profeta Isaias, tan neʼe haʼu prenxe formuláriu atu serbí nuʼudar pioneiru espesiál.—Isa 6:8.

Iha fulan-Maiu tinan 1968, haʼu simu knaar atu serbí nuʼudar pioneiru espesiál iha sidade Cano iha rai-Nijéria nia parte norte. Neʼe mak durante Funu Biafra ka funu sivíl neʼebé akontese husi tinan 1967 toʼo 1970. Ema barak hetan terus no mate iha neʼebá no tuirmai funu neʼe mós toʼo rai-Nijéria nia parte leste. Irmaun ida anima haʼu atu la bá tanba lakohi haʼu hetan susar. Maibé haʼu hatete ba nia: “Obrigadu tanba hanoin haʼu. Maibé, se Jeová hakarak haʼu atu halaʼo knaar neʼe, haʼu fiar duni katak nia sei ajuda haʼu.”

Mapa kona-ba Áfrika Oeste neʼebé hatudu fatin balu neʼebé Israel Itajobi hela no serbí: Conacri, Giné; Serra Leoa; Niamei, Niger; Cano, Orisunbare, no Lagos, Nijéria.

TAU FIAR BA JEOVÁ DURANTE FUNU

Situasaun iha Cano mak aat tebes. Funu sivíl estraga sidade boot neʼe. Bainhira haklaken, dala ruma ami haree mate-isin husi ema neʼebé mate durante funu. Uluk iha kongregasaun balu iha Cano, maibé irmaun-irmán barak halai tiha. Ikusmai, hela deʼit haklaken-naʼin maizumenus 15, no sira taʼuk no laran-kraik. Irmaun-irmán sira-neʼe kontente tebes kuandu pioneiru espesiál naʼin-neen toʼo fatin neʼe. Ami ajuda sira atu organiza fali reuniaun sira no haklaken, no mós hahú fali atu haruka relatóriu haklaken ba sukursál no hameno publikasaun sira.

Ami neʼebé serbí nuʼudar pioneiru espesiál komesa aprende língua Hausa. Bainhira ema rona lia-loos iha sira-nia língua rasik, sira barak gosta. Maibé membru sira husi relijiaun prinsipál iha Cano la gosta atu ami haklaken, tan neʼe ami presiza kuidadu. Loron ida, kuandu haʼu no irmaun ida haklaken, mane ida duni ami ho tudik. Sorte ami halai lalais, no nia la toman ami! Maski ami hasoru perigu oioin, maibé Jeová ajuda ami atu “moris hakmatek”, no haklaken-naʼin sira aumenta. (Sal 4:8) Ohin loron, iha kongregasaun 11 ho haklaken-naʼin 500 liu iha Cano.

EMA FÓ-TERUS IHA NIJER

Serbí nuʼudar pioneiru espesiál iha sidade Niamei, rai-Nijer

Haʼu iha Cano fulan balu deʼit. Iha fulan-Agostu tinan 1968, haʼu no pioneiru espesiál rua tan simu knaar atu serbí iha Niamei, sidade kapitál ba Repúblika Nijer. Lakleur deʼit, ami deskobre katak Nijer iha Áfrika Oeste mak manas tebes. Ami tenke sai toman atu haklaken iha rai-manas no mós aprende língua ofisiál, lian Fransés. Maski hasoru susar, maibé ami tau fiar ba Jeová no komesa haklaken ho irmaun-irmán balu iha neʼebá. Iha tempu badak deʼit, maizumenus ema hotu iha Niamei neʼebé hatene lee simu ona livru Lia-loos neʼebé Lori Moris Rohan-Laek. Ema mós mai buka ami atu bele hetan livru ida!

Lakleur ami nota katak autoridade sira la gosta Testemuña. Iha fulan-Jullu tinan 1969, ami halibur hamutuk atu halaʼo asembleia ba dala primeiru iha nasaun neʼe no ema maizumenus naʼin-20 mak asiste. Ami hein namanas atu haree ema naʼin-rua hetan batizmu. Maibé iha loron primeiru husi asembleia neʼe, polísia mai no hapara ami. Sira lori pioneiru espesiál no katuas área ba sede-polísia. Sira halo interrogasaun no husu ami atu mai fali iha loron tuirmai. Ami rekoñese katak karik autoridade sira sei hamosu problema, tan neʼe ami halo diskursu batizmu nian iha uma ida no fó batizmu subasubar iha mota.

Semana balu liutiha, Ministériu Interior haruka haʼu no pioneiru espesiál naʼin-lima tan atu sai husi Nijer. Ami tenke sai iha oras 48 nia laran, no ami tenke arranja rasik ida-neʼe. Ami halo tuir no bá sukursál iha rai-Nijéria, no iha neʼebá ami simu knaar foun.

Haʼu simu knaar iha suku Orisunbare iha rai-Nijéria. Iha neʼebá, haʼu gosta haklaken ho grupu kiʼik husi irmaun-irmán sira no ami hetan rezultadu diʼak. Liutiha fulan neen, sukursál konvida haʼu atu bá fali Nijer mesak. Foufoun haʼu hakfodak no taʼuk uitoan, maibé haʼu mós hakarak tebes atu hasoru fali irmaun-irmán sira iha Nijer!

Haʼu fila fali ba Niamei. Loron ida depois haʼu toʼo, negósiu-naʼin ida husi Nijéria rekoñese katak haʼu mak Testemuña ida no hahú husu pergunta kona-ba Bíblia. Haʼu estuda Bíblia ho nia, nia para fuma no para hemu tua demais, no tuirmai nia hetan batizmu. Haʼu kontente atu haklaken no haree oinsá durante tinan barak ema oioin simu lia-loos iha fatin oioin iha Nijer. Bainhira haʼu toʼo Nijer, iha Testemuña naʼin-31, kuandu haʼu sai, iha Testemuña naʼin-69.

“AMI LADÚN HATENE KONA-BA SERBISU HAKLAKEN IHA RAI-GINÉ”

Iha fulan-Dezembru tinan 1977, haʼu bá fali rai-Nijéria atu simu treinu. Bainhira kursu ba semana tolu remata, koordenadór Komisaun ba Sukursál naran Malcolm Vigo husu haʼu atu lee karta ida husi sukursál Serra Leoa. Irmaun sira iha neʼebá buka irmaun klosan ida neʼebé pioneiru no koʼalia lian Inglés no Fransés atu serbí nuʼudar katuas área iha rai-Giné. Irmaun Malcolm fó-hatene katak haʼu simu daudaun treinu ba knaar neʼe. Nia esplika katak knaar neʼe la fasil. Nia hatete: “Hanoin didiʼak antes Ita foti desizaun.” Haʼu hatán kedas: “Tanba Jeová mak ida neʼebé haruka haʼu bá, haʼu sei bá.”

Haʼu saʼe aviaun ba rai-Serra Leoa no hasoru malu ho irmaun sira iha sukursál. Membru ida husi Komisaun ba Sukursál hatete ba haʼu: “Ami ladún hatene kona-ba serbisu haklaken iha rai-Giné.” Maski sukursál neʼe tau matan ba rai-Giné, maibé sira labele komunika ho irmaun-irmán sira tanba problema polítika. Sukursál koko dala balu ona hodi haruka irmaun ida atu vizita irmaun-irmán sira, maibé seidauk iha irmaun ida neʼebé susesu. Tan neʼe, sira husu haʼu atu bá rai-Giné nia sidade kapitál Conacri no koko hetan vistu rezidénsia.

“Tanba Jeová mak ida neʼebé haruka haʼu bá, haʼu sei bá”

Bainhira haʼu toʼo Conacri, haʼu bá Nijéria nia embaixada no hasoru malu ho embaixadór. Haʼu fó-hatene nia katak haʼu hakarak atu haklaken iha rai-Giné. Nia anima haʼu atu sai husi rai-Giné tanba polísia bele kaer haʼu ka halo aat ba haʼu. Nia hatete: “Fila fali ba rai-Nijéria no haklaken iha neʼebá.” Haʼu hatete: “Haʼu deside metin ona atu hela iha neʼe.” Tan neʼe nia hakerek karta ba Ministru Interior hodi husu ninia ajuda, no ministru ajuda haʼu.

Lakleur depois neʼe, haʼu fila fali ba sukursál iha rai-Serra Leoa no fó sai ba irmaun sira kona-ba ministru nia desizaun. Irmaun sira kontente kuandu sira rona kona-ba oinsá Jeová haraik bensaun ba haʼu-nia viajen. Haʼu hetan ona vistu rezidénsia ba rai-Giné!

Israel tutur ninia sasán ho kontente.

Serbí nuʼudar katuas área iha rai-Serra Leoa

Husi tinan 1978 toʼo 1989, haʼu serbí nuʼudar katuas área iha rai-Giné, no rai-Serra Leoa, no mós katuas área temporáriu iha rai-Libéria. Foufoun haʼu moras beibeik. Dala ruma haʼu moras iha fatin izoladu. Maibé irmaun-irmán sira hakaʼas an atu lori haʼu ba ospitál.

Loron ida, haʼu sai moras tebes tanba malária no mós lombriga. Kuandu haʼu sai diʼak fali, haʼu rona irmaun sira hanoin katak haʼu sei mate no sira koʼalia hamutuk kona-ba atu hakoi haʼu iha neʼebé! Maski haʼu hasoru situasaun neʼebé perigu, maibé haʼu nunka hanoin atu husik haʼu-nia knaar. Haʼu fiar metin katak moris seguru mai husi Jeová no maski ita mate nia bele fó moris-hiʼas ba ita.

TAU FIAR BA JEOVÁ NUʼUDAR FEEN-LAʼEN

Israel no Dorcas nia loron kazamentu.

Ami-nia loron kazamentu iha tinan 1988

Iha tinan 1988, haʼu hasoru Dorcas, irmán pioneiru ida neʼebé hadomi Jeová no haraik an. Ami kaben tiha, no ami kontinua serbí hamutuk nuʼudar katuas área. Dorcas mak feen neʼebé hatudu domin no prontu atu halo sakrifísiu oioin. Dala ruma ami laʼo ain dook kilómetru 25 husi kongregasaun ida ba kongregasaun seluk no lori pasta sira. Atu bele toʼo kongregasaun sira neʼebé dook liu, ami uza transporte naran deʼit no liu dalan neʼebé tahu no kuak barak.

Dorcas aten-brani tebes. Porezemplu, dala ruma ami presiza liu bee neʼebé nakonu ho lafaek. Loron ida kuandu ami halo viajen ba loron lima, ami presiza liu mota, maibé ponte kotu no tenke saʼe bero. Bainhira Dorcas hamriik atu sai husi bero, nia monu ba bee kleʼan. Ami naʼin-rua la hatene nani, no iha mós lafaek iha mota neʼe. Sorte, mane joven balu haksoit ba bee laran no salva nia. Akontesimentu neʼe halo ami trauma ba tempu balu, maibé ami kontinua serbí nuʼudar katuas área.

Jahgift no Eric neʼebé sei kiʼik hamriik iha Reuniaun-Fatin nia oin.

Ami-nia oan, Jahgift no Eric mak prezente husi Jeová

Iha tinan 1992, ami hakfodak katak Dorcas isin-rua. Ami tenke deside se ami bele kontinua serbí nuʼudar pioneiru espesiál ka lae. Ami hanoin: “Jeová fó ami prezente ida!” Tan neʼe ami hanaran ami-nia oan-feto Jahgift. Tinan haat liutiha, ami-nia oan-mane Eric moris. Ami-nia oan mak prezente husi Jeová. Ba tempu balu, Jahgift serbí iha eskritóriu tradusaun iha Conacri, no Eric mak atan ba kongregasaun.

Israel no Dorcas ho sira-nia oan-mane, Eric, no oan-feto, Jahgift, hamriik iha Reuniaun-Fatin nia oin.

Ikusmai Dorcas labele serbí tan nuʼudar pioneiru espesiál, maibé nia kontinua serbí nuʼudar pioneiru regulár no mós tau matan ba ami-nia oan. Ho Jeová nia ajuda, haʼu kontinua serbí nuʼudar pioneiru espesiál. Bainhira ami-nia oan boot ona, Dorcas bele serbí fali nuʼudar pioneiru espesiál. Agora ami naʼin-rua serbí nuʼudar misionáriu iha Conacri.

JEOVÁ PROTEJE AMI

Haʼu sempre bá fatin neʼebé Jeová haruka haʼu atu bá. Dala barak, haʼu no Dorcas sente ninia protesaun no bensaun. Hodi tau fiar ba Jeová duké rikusoin, neʼe ajuda ami hasees an husi problema no susar oioin. Liuhusi ami-nia esperiénsia rasik, ami aprende katak Hun ba moris seguru mak Jeová, “Maromak neʼebé fó salvasaun”. (1 Krón 16:35) Haʼu fiar metin katak ema hotu neʼebé tau fiar ba Jeová, nia sei ‘falun metin sira iha bornál moris nian’.—1 Sam 25:29.

    Livru sira iha lian Tetun Dili (1993-2025)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe