Tanbasá diʼak atu moris tuir Bíblia nia matadalan?

BÍBLIA nia matadalan kona-ba buat morál nian la iha ona folin ba tempu modernu ka lae? No la fó liberdade ba ema ka lae? Tuir loloos, buat neʼebé Bíblia hanorin kona-ba buat morál nian bele ajuda ita atu:

▪ La hetan moras neʼebé bele hadaʼet husi relasaun seksuál

▪ La sai isin-rua naran deʼit

▪ La hetan rezultadu aat tanba moris kaben nian naksobu

▪ La sente katak Ita-nia laran duun Ita

▪ La sente katak Ita la iha folin tanba ema hafoʼer Ita-nia isin

Ita-nia Kriadór, Maromak Jeová,a hakarak ita atu haksolok ho prezente sira neʼebé nia fó mai ita. Maromak mak ‘Ida neʼebé hanorin ita atu ita bele hetan buat neʼebé diʼak’. (Isaías [Yesaya] 48:17) Ema neʼebé moris tuir Bíblia nia matadalan kona-ba buat morál nian bele:

▪ Monu loos ba Maromak nia laran

▪ Sente dame iha laran

▪ Sente kontente iha família laran

▪ Iha naran diʼak

▪ Hafolin ninia an

Maibé, oinsá se agora Ita la moris tuir Bíblia nia matadalan kona-ba buat morál nian? Ita bele troka Ita-nia moris ka lae? Maromak sei nunka perdua Ita-nia hahalok aat uluk nian ka lae?

Hanoin toʼok kona-ba neʼe: Ema balu husi kongregasaun kristaun iha apóstolu sira-nia tempu mak ema neʼebé uluk halo sala-foʼer no halo adultériu no ema neʼebé halo sala-foʼer entre mane ho mane no feto ho feto. Maibé sira hili atu troka sira-nia hahalok aat, no sira hetan perdua husi Maromak. (1 Korinto 6:9-11) Ohin loron, ema rihun ba rihun iha mundu tomak mós troka sira-nia hahalok aat hanesan neʼe. Sira sai livre husi hahalok aat oioin no hetan buat diʼak barak tanba sira moris tuir Bíblia nia matadalan. Porezemplu, haree saida mak akontese ba Sarah, neʼebé temi iha parte primeiru husi informasaun neʼe.

“Haʼu sente kmaan fali”

Sarah rekoñese katak ninia moris neʼebé la morál, la fó kontente neʼebé loos no la fó liberdade ba nia. Nia hatete: “Uluk haʼu sente katak haʼu-nia laran toos tebes no la fó-sala tan mai haʼu.” Nia hatutan tan: “Haʼu moe no hanoin barak, oinsá se haʼu sai isin-rua ka hetan moras aat. Tuir loloos, haʼu fiar nafatin katak Maromak iha, no haʼu hatene katak dalan neʼebé haʼu halaʼo haʼu-nia moris hakanek nia. Haʼu sente la moos no ida-neʼe halo haʼu laran-tun tebes.”

Ikusmai, Sarah hetan kbiit atu troka ninia moris. Nia husu ajuda husi ninia inan-aman, neʼebé Testemuña ba Jeová. Nia mós husu ajuda husi katuas kristaun sira iha kongregasaun. Nia hatete: “Haʼu kontente tebes tanba haʼu-nia inan-aman no katuas kristaun sira hatudu laran-diʼak no domin mai haʼu. Haʼu sente kmaan fali.”

Agora, Sarah iha oan naʼin-rua neʼebé nia haboot daudaun. Nia hatete: “Haʼu koʼalia nakloke ba sira kona-ba desizaun neʼebé uluk haʼu foti. Haʼu hakarak sira atu hatene katak haʼu hetan susar tanba la halo tuir Maromak nia matadalan. Haʼu-nia planu mak atu ajuda sira hatene katak hodi moris tuir Maromak nia matadalan kona-ba buat morál nian, bele lori buat diʼak iha sira-nia moris tomak. Haʼu fiar duni katak Maromak fó matadalan mai ita kona-ba buat morál nian tanba nia lakohi ita atu hetan susar.”

Ita mós bele hetan buat diʼak tanba halo tuir Maromak nia matadalan. Bíblia promete hanesan neʼe: “Jeová nia ukun-fuan sira mak loos, halo ema nia laran haksolok; Jeová nia lei moos, halo matan nabilan. . . . Hodi halo tuir sira-neʼe, iha bensaun boot.”—Salmo (Mazmur) 19:8, 11.b

[Nota–rodapé]

[Liafuan neʼebé foti husi pájina 8]

Sira neʼebé la halo tuir Bíblia nia matadalan hakanek sira-nia laran

[Liafuan neʼebé foti husi pájina 9]

Sira neʼebé moris tuir Bíblia nia matadalan bele iha laran neʼebé moos no sente kontente iha família laran