“Iha tempu atu hadomi no iha tempu atu odi”

“MAROMAK mak domin.” Iha rai balu ema hakerek liafuan sira-neʼe no taka iha uma nia didin. Sin, liafuan furak neʼe hatudu Maromak nia hahalok importante liu. Neʼe mak domin.

Maibé ema barak la hatene katak liafuan sira-neʼe mai husi Bíblia. Apóstolu João mak hakerek liafuan sira-neʼe hodi dehan: “Ema neʼebé la hadomi la hatene Maromak, basá Maromak mak domin.” (1 Joao 4:8) João mós hakerek kona-ba Maromak nia domin ba mundu, hodi dehan: “Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.”—Joao 3:16.

Tan neʼe, ema balu hanoin katak Maromak sempre simu deʼit ema nia hahalok naran deʼit. No dalan neʼebé ema barak halaʼo sira-nia moris, sira hanoin Maromak sei la tesi lia ba sira. Maibé ida-neʼe loos ka lae? Maski iha ema diʼak no ema aat, Maromak hadomi sira hotu ka lae? Ka iha tempu balu neʼebé Maromak odi hahalok ruma?

Buat neʼebé Maromak hadomi no buat neʼebé nia odi

Liurai Salomão neʼebé matenek hatete: “Kona-ba buat hotu-hotu iha nia tempu, no iha tempu neʼebé loos ba buat hotu-hotu neʼebé akontese iha lalehan okos . . . iha tempu atu hadomi no iha tempu atu odi.” (Eclesiastes [Pengkhotbah] 3:1, 8) Tuir eskritura neʼe, maski Maromak hatudu domin no laran-diʼak, maibé iha mós tempu neʼebé nia odi hahalok ruma.

Liafuan “odi” neʼebé hakerek iha Bíblia katak sá? Livru ida hatete: “Iha eskritura sira liafuan ‘odi’ iha arti oioin. Dala ruma iha arti katak ema sente hirus tebes ba tempu kleur no hanoin atu halo aat ba ema. Hahalok odi hanesan neʼe bele sai makaʼas liután, no halo ema buka dalan oioin atu halo aat ba ema neʼebé nia odi.” Ita hotu hatene kona-ba odi neʼe, no ita haree ona katak buat aat barak akontese iha mundu tomak tanba deʼit ema odi malu. Maibé livru neʼe hatutan tan: “‘Odi’ mós iha arti seluk, neʼe katak la gosta duni, maibé neʼe laʼós atu halo aat ba ema seluk.”

Agora mai ita koʼalia kona-ba arti segundu neʼe. Ida-neʼe mak sentimentu la gosta duni ka hakribi tebes buat ruma, maibé laʼós atu halo aat ba ema. Maromak bele odi iha dalan hanesan neʼe ka lae? Haree toʼok saida mak Provérbios (Amsal) 6:16-19 hatete: “Iha buat neen neʼebé Jeová odi; sin, buat hitu neʼebé nia hakribi tebes: matan neʼebé foti-an, nanál neʼebé bosok, liman neʼebé fakar raan husi ema neʼebé la halo sala, laran neʼebé futu lia atu fó-terus, ain neʼebé halai lalais atu halo aat, sasin falsu neʼebé koʼalia lia-bosok, no ema neʼebé habelar diskute malu iha maun-alin sira leet.”

Hanesan ita lee iha neʼe, iha duni hahalok sira neʼebé Maromak odi. Maibé neʼe la dehan katak nia sempre odi ema neʼebé halo hahalok sira-neʼe. Maromak hatene kona-ba sira-nia situasaun moris nian. Porezemplu, nia hanoin sira-nia fraku, no fatin neʼebé sira hela, no dalan neʼebé inan-aman haboot sira, no karik sira la iha oportunidade atu aprende kona-ba Maromak. (Gênesis [Kejadian] 8:21; Roma 5:12) Ema neʼebé hakerek Provérbios uza ezemplu diʼak hodi esplika kona-ba neʼe: “Jeová fó dixiplina ba ema neʼebé nia hadomi, hanesan aman ida fó dixiplina ba oan neʼebé monu loos ba nia laran.” (Provérbios 3:12) Maski inan-aman odi hahalok aat neʼebé oan halo, maibé sira nafatin hadomi no fó dixiplina ba oan neʼe atu ajuda nia troka ninia hahalok. Tanba Maromak Jeová hadomi ema, nia mós halo hanesan neʼe atu salva ema neʼebé hakarak troka sira-nia hahalok aat.

Maromak iha duni razaun atu odi

Maibé oinsá se ema ida hatene ona Maromak nia hakarak maibé lakohi atu halo tuir? Se nuneʼe, nia sei la simu Maromak nia domin. Se nia halo ho neon hahalok ruma neʼebé Maromak hakribi, neʼe bele halo Maromak odi nia. Porezemplu, Bíblia hatete: “Jeová rasik haree didiʼak ida neʼebé laran loos no mós ida neʼebé laran aat, no ema neʼebé hadomi violénsia Nia odi tebes.” (Salmo [Mazmur] 11:5) Ema neʼebé la hakribi sira-nia sala la bele hetan perdua, hanesan apóstolu Paulo esplika ho klaru iha ninia karta ba ema ebreu: “Ita halo sala karik hodi hakarak, wainhira ita simu ona matenek kona-ba lia-loos, la iha ona sakrifísiu ba sala, maibé iha deʼit lia kastigu nian neʼebé halo ema taʼuk no ahi makaʼas neʼebé sei sunu mohu funu-balun sira hotu.” (Ebreu 10:26, 27) Tanbasá mak Maromak domin nian halo hanesan neʼe?

Kuandu ema ho neon halo sala boot, nia bele sai aat liután no karik nia la bele ona troka ninia hahalok. Bíblia kompara ema hanesan neʼe ho busa-leopardu neʼebé la bele troka ninia kór-makerek. (Jeremias [Yeremia] 13:23) Ema neʼe halo buat neʼebé Bíblia bolu “sala rohan-laek nian”, no la bele ona hetan perdua.—Marcos 3:28.

Ida-neʼe akontese ba Adão ho Eva no mós ba Judas Iscariotes. Maromak kria Adão no Eva nuʼudar ema perfeitu no ukun-fuan neʼebé nia fó ba sira mak klaru no sira bele komprende. Entaun kuandu sira la halo tuir Maromak nia ukun-fuan neʼe, sira halo sala ho neon no sira la bele nega kona-ba neʼe. Buat neʼebé Maromak hatete ba sira depois neʼe hatudu katak nia la fó oportunidade ba sira atu arrepende sira-nia sala. (Gênesis 3:16-24) Judas laʼós ema perfeitu maibé nia halo buat barak hamutuk ho Maromak nia Oan-Mane. Maski nuneʼe, nia sai traidór. Jesus rasik bolu nia nuʼudar “lakon an aat nia oan”. (Joao 17:12) Bíblia mós hatudu katak Diabu mak ida-neʼebé halo sala horiuluk kedas no hein atu lakon. (1 Joao 3:8; Apokalipse 12:12) Tan neʼe, sira ida-idak nia hahalok halo Maromak odi sira.

Maibé neʼe la dehan katak ema hotu neʼebé halo sala la iha esperansa. Maromak Jeová hatudu pasiénsia ba ema no nia la gosta atu fó kastigu ba ema neʼebé halo sala tanba sira la hatene kona-ba nia. (Ezequiel [Yehezkiel] 33:11) Nia konvida sira atu hakribi no arrepende sira-nia sala no hetan perdua. Bíblia hatete: “Ema aat ida husik nia dalan, no ema neʼebé gosta halo aat husik ninia hanoin sira; no husik nia fila fali ba Jeová, neʼebé sei hatudu laran-sadiʼa ba nia, no ba ita-nia Maromak, tanba nia sei fó perdua neʼebé boot tebes.”—Isaías (Yesaya) 55:7.

Hanoin neʼebé loos kona-ba domin no odi

Nuʼudar ema neʼebé banati-tuir Maromak, ema kristaun neʼebé loos presiza komprende bainhira mak “tempu atu hadomi” no bainhira mak “tempu atu odi”. Ema nia sentimentu bele halo nia iha hanoin neʼebé la loos kona-ba domin no laran-sadiʼa. Maibé dixípulu Judas nia liafuan bele ajuda ita atu iha hanoin neʼebé loos kona-ba hatudu laran-sadiʼa no kona-ba odi buat neʼebé sala. Nia hatete: “Hatudu laran-diʼak [laran-sadiʼa MF] hodi taʼuk; maibé hakribi sira-nia hatais neʼebé foʼer ona ho sira-nia hahalok aat.” (Judas 22, 23) Tan neʼe, ita odi ema nia hahalok aat, maibé ita la odi ema neʼe rasik.

Jesus haruka ema kristaun atu hadomi sira-nia inimigu hodi hatudu hahalok diʼak ba sira. Nia hatete: “Hadomi imi-nia funu-balun sira, harohan ba sira neʼebé hanehan imi.” (Mateus 5:44) Tan neʼe mak Testemuña ba Jeová la para atu haklaken lia-foun diʼak kona-ba Maromak nia Reinu, ka ukun, maski ema balu la simu sira-nia mensajen. (Mateus 24:14) Tuir buat neʼebé sira aprende husi Bíblia, Testemuña sira hanoin-hetan katak ema ida-idak bele simu Maromak Jeová nia domin no laran-sadiʼa. Kuandu ema la hafolin sira-nia hakaʼas-an, ka kuandu ema la simu sira no fó-terus ba sira, sira nafatin halo tuir apóstolu Paulo nia konsellu neʼebé dehan: “Dehan liafuan diʼak ba sira neʼebé halo aat imi; fó rahun-diʼak no keta fó malisan ba sira . . . Keta selu aat ho aat ba ema.” (Roma 12:14, 17) Sira hanoin nafatin katak Maromak Jeová mak deside sé mak merese atu simu ninia domin no sé mak merese atu nia odi. Nia deʼit mak iha direitu atu tesi lia kona-ba moris no mate.—Ebreu 10:30.

Loos duni, “Maromak mak domin”. Maibé kona-ba ita ida-idak, ita tenke hafolin ninia domin no hakaʼas an atu buka-hatene saida mak ninia hakarak, no halo tuir ida-neʼe. Testemuña ba Jeová iha Ita-nia fatin kontente atu ajuda Ita aprende husi Ita rasik nia Bíblia kona-ba saida mak Maromak nia hakarak no oinsá atu halo tuir ida-neʼe iha Ita-nia moris. Se Ita halo nuneʼe, Maromak sei la odi Ita maibé Ita sei simu ninia domin.

[Liafuan neʼebé foti husi pájina 21]

“Iha buat neen neʼebé Jeová odi; sin, buat hitu neʼebé nia hakribi tebes: matan neʼebé foti-an, nanál neʼebé bosok, liman neʼebé fakar raan husi ema neʼebé la halo sala, laran neʼebé futu lia atu fó-terus, ain neʼebé halai lalais atu halo aat, sasin falsu neʼebé koʼalia lia-bosok, no ema neʼebé habelar diskute malu iha maun-alin sira leet.”—PROVÉRBIOS 6:16-19

[Liafuan neʼebé foti husi pájina 22]

“Ita halo sala karik hodi hakarak, wainhira ita simu ona matenek kona-ba lia-loos, la iha ona sakrifísiu ba sala, maibé iha deʼit lia kastigu nian neʼebé halo ema taʼuk.” —EBREU 10:26, 27

[Liafuan neʼebé foti husi pájina 23]

“Ema aat ida husik nia dalan, no ema neʼebé gosta halo aat husik ninia hanoin sira; no husik nia fila fali ba Jeová, neʼebé sei hatudu laran-sadiʼa ba nia . . . Nia sei fó perdua neʼebé boot tebes.”—ISAÍAS 55:7

[Dezeñu iha pájina 22]

Inan-aman neʼebé hadomi oan sira mós fó dixiplina hodi ajuda sira

[Dezeñu iha pájina 23]

Ema barak iha komarka hetan buat diʼak tanba Maromak nia domin no laran-sadiʼa