Tanbasá mak mundu neʼe nakonu ho ódiu?​—Saida mak Bíblia dehan?

Notísias sira fó sai beibeik kona-ba ema neʼebé hatudu ódiu iha dalan oioin, hanesan liuhusi sira-nia liafuan, hahalok violénsia, no mós funu tan deʼit diskrimina ema neʼebé la hanesan ho sira.

• “Ohin loron, liafuan ódiu sai barak liután iha média sosiál tanba konflitu entre Izraél no Gaza no mós tanba iha ema neʼebé provoka ema seluk atu halo violénsia.”​—The New York Times, 15 Novembru 2023.

• “Komesa husi loron 7 Outubru, derrepente deʼit liafuan ódiu no violénsia sai barak liután, tanba hahalok diskriminasaun sai makaʼas liu fali tempu uluk.”​—Dennis Francis, prezidente ba Asembleia Jerál husi Nasoins Unidas, 3 Novembru 2023.

Liafuan ódiu, violénsia, no funu laʼós buat foun. Loloos, Bíblia temi kona-ba ema iha tempu uluk neʼebé “prepara sira-nia liafuan kroʼat hanesan prepara atu hana rama-oan” no mós gosta halo funu no violénsia. (Salmo 64:3; 120:7; 140:1) Maibé, Bíblia esplika katak hahalok ódiu neʼebé ita haree ohin loron iha signifikadu importante.

Ódiu​—Sinál ida iha ita-nia tempu

Bíblia fó sai razaun rua tanbasá ema barak odi malu ohin loron.

1. 1. Bíblia fó sai kona-ba tempu bainhira “ema barak nia domin sei sai malirin”. (Mateus 24:12) Duké hatudu domin, ema barak sei hatudu hahalok neʼebé book ema atu odi malu.​—2 Timóteo 3:1-5.

2. 2. Ema odi malu makaʼas tanba hetan influénsia husi Diabu Satanás neʼebé laran-aat tebetebes. Bíblia hatete katak “aat-naʼin mak domina mundu tomak”.​—1 João 5:19; Apokalipse 12:9, 12.

Maibé, Bíblia mós fó sai katak lakleur tan Maromak sei halakon buat aat hotu neʼebé book ema atu odi malu. No nia mós sei halakon terus hotu neʼebé ema hetan tanba hahalok odi. Bíblia promete:

• Maromak “sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”​—Apokalipse 21:4.