Ódiu sei lakon ba nafatin!
Maski Ita halakon ona Ita-nia sentimentu odi, maibé Ita labele kontrola ema seluk nia hahalok no sentimentu. Ema neʼebé la halo sala kontinua sai vítima ba ódiu. Entaun solusaun mak saida?
Maromak Jeová deʼit mak bele halakon ódiu ba nafatin. Bíblia promete katak Maromak sei halo nuneʼe duni.—Provérbios 20:22.
MAROMAK SEI HALAKON ÓDIU NIA HUN
1. DIABU SATANÁS. Satanás mak iha responsabilidade ba hahalok no sentimentu ódiu neʼebé ita haree ohin loron. Maromak sei halakon Satanás no ema hotu neʼebé hatudu hahalok ódiu hanesan nia.—Salmo 37:38; Roma 16:20.
2. SATANÁS NIA MUNDU AAT. Maromak sei halakon buat aat hotu iha mundu, inklui polítiku-naʼin sira neʼebé halo korrupsaun no ulun-naʼin relijiaun sira neʼebé hamosu ódiu. Maromak mós sei halakon sistema komérsiu neʼebé kaan-teen, halo korrupsaun no lori susar ba ema.—2 Pedro 3:13.
3. KONDISAUN LA PERFEITU. Bíblia esplika katak ema hotu moris mai la perfeitu, neʼe inklui ita-nia hanoin, sentimentu, no hahalok. (Roma 5:12) Tan neʼe, fasil ba ita ema atu rai odi no hatudu sentimentu odi ba ema seluk. Maromak sei ajuda ema atu halakon hahalok hotu neʼebé la diʼak no ikusmai ódiu mós sei lakon ba nafatin.—Isaias 54:13.
BÍBLIA PROMETE MUNDU NEʼEBÉ LA IHA TAN ÓDIU
1. BUAT NEʼEBÉ LA JUSTISA SEI LA IHA TAN. Maromak nia Governu iha lalehan mak sei ukun mundu tomak no lori justisa ba nafatin. (Daniel 2:44) Diskriminasaun no intoleránsia sei la iha tan. Maromak sei hadiʼa fali buat hotu neʼebé la justisa, neʼebé ohin loron ema hasoru.—Lucas 18:7.
2. EMA HOTU SEI MORIS HO DAME. Sei la iha ema ida mak terus tanba violénsia ka funu. (Salmo 46:9) Mundu neʼe sei sai fatin neʼebé seguru tanba ema hotu sei hadomi dame.—Salmo 72:7.
3. EMA SEI MORIS BA NAFATIN HO KONDISAUN NEʼEBÉ PERFEITU. Ema hotu neʼebé hela iha rai sei hadomi malu. (Mateus 22:39) La iha ema ida mak sei terus tanba hanoin ka memória neʼebé aat. (Isaias 65:17) Iha tempu neʼebá, ema “sei hetan ksolok boot ho dame neʼebé barak”.—Salmo 37:11.
Ita hakarak atu moris iha mundu hanesan neʼe ka lae? Ohin loron, ema barak aprende daudaun atu aplika Bíblia nia prinsípiu no husik tiha ódiu. (Salmo 37:8) Neʼe mak Testemuña ba Jeová iha mundu tomak halo. Maski sira mai husi rasa no kultura oioin, sira iha unidade no hadomi malu.—Isaias 2:2-4.
Testemuña ba Jeová ho kontente fahe buat neʼebé sira aprende kona-ba oinsá atu tahan hasoru situasaun la justisa no diskriminasaun. Neʼe sei ajuda Ita atu halakon sentimentu odi no haburas domin. Ita bele aprende atu hatudu domin ba ema seluk, inklui ba ema neʼebé la hatudu agradese ka hatudu ódiu. Rezultadu mak Ita sei sente kontente no Ita-nia relasaun ho ema seluk sei sai diʼak liu. Buat neʼebé importante liu mak, Ita sei aprende saida mak Ita bele halo atu moris iha Maromak nia Ukun okos bainhira ódiu sei lakon ba nafatin.—Salmo 37:29.