HAPARA SIKLU ODI MALU

4 | Halakon ódiu ho Maromak nia ajuda

Bíblia hanorin:

“Hahalok sira neʼebé mai husi Maromak nia espíritu mak domin, ksolok, dame, pasiénsia, laran-diʼak, hahalok diʼak, fiar, laran-maus no kontrola an.”—GALÁSIA 5:22, 23.

Neʼe katak sá:

Ho Maromak nia ajuda, ita bele hapara siklu odi malu. Ninia espíritu santu bele ajuda ita atu haburas hahalok furak sira neʼebé susar atu hatudu ho ita rasik nia forsa. Tan neʼe, duké koko atu halakon sentimentu odi ho ita rasik nia forsa, hakaʼas an atu tau fiar ba Maromak nia ajuda. Se ita halo nuneʼe, ita bele iha esperiénsia hanesan ho apóstolu Paulo, neʼebé hakerek: “Iha situasaun hotu haʼu hetan forsa husi nia neʼebé fó kbiit mai haʼu.” (Filipe 4:13) Loos duni, ita bele hatete: “Haʼu-nia ajuda mai husi Jeová.”—Salmo 121:2.

Saida mak Ita bele halo:

“Jeová troka haʼu neʼebé gosta halo violénsia sai fali ema neʼebé gosta dame.”—WALDO

Halo orasaun ho laran ba Jeová husu ninia espíritu santu. (Lucas 11:13) Husu ninia ajuda atu hatudu hahalok diʼak iha Ita-nia moris. Estuda buat neʼebé Bíblia hanorin kona-ba hahalok diʼak sira hanesan domin, dame, ksolok, pasiénsia no kontrola an, tanba neʼe bele ajuda ita atu halakon sentimentu odi. Hakaʼas an atu haburas hahalok sira-neʼe iha Ita rasik nia moris. Habelun ho ema neʼebé koko atu hatudu hahalok diʼak sira-neʼe. Ema hanesan neʼe sei “motiva [Ita] atu hatudu domin no hahalok diʼak”.—Ebreu 10:24; nota-rodapé.

Esperiénsia—WALDO

Halakon tiha ódiu no violénsia

Waldo hasoru susar barak bainhira nia sei kiʼik, no neʼe halo nia haburas ódiu iha ninia laran. Nia konta: “Haʼu baku malu beibeik ho ema neʼebé faʼan droga . . . Tempu ida, gang ida selu ema atu oho haʼu. Maski ema neʼe sona duni haʼu, maibé haʼu konsege halai.”

Waldo la kontente bainhira ninia feen komesa estuda Bíblia ho Testemuña ba Jeová. Nia dehan: “Haʼu odi loos Testemuña sira, no haʼu sempre tolok sira. Maibé sira sempre hatudu hahalok diʼak.”

Liutiha tempu balu, Waldo mós komesa estuda Bíblia. Nia dehan: “Susar ba haʼu atu halo tuir buat neʼebé haʼu aprende. Haʼu sente katak haʼu nunka bele kontrola haʼu-nia hirus.” Maibé buat neʼebé nia aprende husi Bíblia ajuda nia atu troka ninia hahalok.

Waldo esplika: “Loron ida, irmaun neʼebé estuda Bíblia ho haʼu naran Alejandro, husu haʼu atu lee Galásia 5:22, 23. . . . Alejandro esplika katak atu haburas hahalok sira-neʼe la depende ba haʼu-nia kbiit rasik, maibé ba Maromak nia espíritu santu. Hanorin neʼe troka duni haʼu-nia hanoin.”

Hodi sadere ba Maromak nia ajuda, Waldo konsege halakon siklu odi malu husi ninia moris. Nia hatete: “Haʼu-nia família no kolega uluk nian la fiar katak haʼu bele halo mudansa boot neʼe.” Nia hatutan tan: “Jeová troka haʼu neʼebé gosta halo violénsia sai fali ema neʼebé gosta dame.”