Abraão​—Mane ida neʼebé hatudu aten-brani

Abraão haree ba ninia família no atan sira nuʼudar sira prepara daudaun atu halo viajen ba rai-Kanaan. (Génesis 12:1-5) Nia haree ema-lubun iha ninia oin, no hanoin kona-ba ninia responsabilidade boot. Oinsá mak nia bele tau matan ba sira-nia presiza kuandu tama ba rai foun neʼebé sira seidauk toman? Fasil liu atu tau matan ba sira bainhira sira sei iha Ur, área neʼebé riku ho rai bokur, duʼut matak, no bee barak. Oinsá se nia sai moras, ka mate iha fatin neʼebé foun? Sé mak sei tau matan ba ninia família? Karik Abraão hanoin kona-ba buat sira-neʼe, maibé nia la husik sentimentu taʼuk mak hapara ninia viajen. Nia deside metin atu halo tuir Maromak nia mandamentu maski buat oioin bele akontese. Nia hatudu duni aten-brani neʼebé loos.

SAIDA MAK ATEN-BRANI? Neʼe mak hahalok neʼebé forte, la dada an, la moe, no la taʼuk. Neʼe la dehan katak ema neʼebé aten-brani nunka sente taʼuk. Maibé kuandu ema ida iha aten-brani neʼebé mai husi Maromak, nia sei halo duni buat ruma maski sente taʼuk.

OINSÁ MAK ABRAÃO HATUDU ATEN-BRANI? Abraão prontu halo tuir Maromak nia hakarak maski ema seluk lae. Abraão boot iha fatin neʼebé ema maioria adora maromak oioin no estátua sira. Maski nuneʼe, nia la taʼuk ema seluk no la husik buat ida hanetik nia atu halo buat neʼebé loos. Abraão ho aten-brani halaʼo ninia moris la hanesan ho ema seluk hodi hili atu adora Maromak Jeová mesak deʼit nuʼudar “Maromak neʼebé Aas Liu Hotu”.​—Génesis 14:21, 22.

Buat neʼebé importante liu ba Abraão mak adora Maromak neʼebé loos duké buka rikusoin. Nia prontu atu husik moris diʼak iha Ur no halo viajen iha rai-fuik hodi tau fiar tomak katak Jeová sei tau matan ba ninia presiza. Klaru, nuʼudar tinan barak liu daudaun, karik Abraão hanoin fali moris uluk nian neʼebé sira goza iha Ur. Maibé Abraão fiar metin katak Jeová sei sempre tau matan ba buat neʼebé nia no ninia família presiza. Tanba nia tau uluk Maromak Jeová iha ninia moris, nia bele hetan aten-brani atu halo tuir Maromak nia mandamentu sira.

ITA APRENDE SAIDA? Ita bele banati-tuir Abraão hodi haburas aten-brani atu halo tuir Jeová maski ema neʼebé haleʼu ita la halo ida-neʼe. Porezemplu, Bíblia hanorin katak se ita halo tuir Maromak Jeová, ita sei hetan susar husi ema seluk, inklui ita rasik nia kolega ka família neʼebé hanoin ita-nia diʼak. (João 15:20) Maibé kuandu ita fiar metin ba buat neʼebé ita aprende kona-ba Jeová, ita sei hamriik metin no defende ita-nia fiar iha dalan neʼebé hatudu respeitu ba ema seluk.​—1 Pedro 3:15.

Ita mós bele fiar metin ba Maromak nia promesa katak nia sei tau matan ba ninia atan sira-nia presiza. Neʼe sei halo ita aten-brani atu tau uluk serbisu ba Jeová duké buka osan ka sasán. (Mateus 6:33) Haree toʼok oinsá mak família ida halo ida-neʼe.

Maski Doug no Becky iha oan-mane naʼin-rua neʼebé sei kiʼik, maibé sira hakarak muda ba rai seluk neʼebé presiza liután ema neʼebé haklaken liafuan diʼak husi Bíblia. Sira halo peskiza ho didiʼak no halo orasaun ho laran, tuirmai sira deside atu kumpre sira-nia planu. Doug dehan: “Ami presiza aten-brani atu halo preparasaun ba oan sira no muda, tanba ami la hatene ho loloos ami-nia moris iha fatin foun sei sai oinsá. Maibé bainhira ami foin komesa hanoin kona-ba ami-nia planu, ami koʼalia kona-ba ezemplu husi Abraão no Sara. Ami hanoin kona-ba oinsá sira tau fiar ba Jeová no oinsá Jeová sempre tau matan ba sira, no neʼe ajuda tebes ami.”

Kona-ba sira-nia moris iha rai seluk, Doug hatete: “Ami hetan bensaun barak tebes.” Nia esplika: “Tanba ami halaʼo moris neʼebé simples liu fali uluk, ami iha tempu barak atu halo atividade oioin hamutuk nuʼudar família, hanesan haklaken, dada lia, no halimar hamutuk ho ami-nia oan sira. Ami kontente tebes no ami-nia liafuan la toʼo atu esplika sentimentu neʼe.”

Klaru katak laʼós ema hotu mak bele halo mudansa boot hanesan neʼe. Maibé ita hotu bele halo tuir Abraão nia ezemplu hodi tau uluk ita-nia adorasaun ba Maromak no fiar metin katak Maromak sei sempre tau matan mai ita. Kuandu ita halo nuneʼe, ita halo tuir Bíblia nia konsellu: “Sai brani no dehan: ‘Jeová mak haʼu-nia ajuda-naʼin; haʼu sei nunka taʼuk.’”​—Ebreu 13:5, 6.

[Liafuan neʼebé foti husi pájina 7]

Kuandu ema ida iha aten-brani neʼebé mai husi Maromak, nia sei halo duni buat ruma maski sente taʼuk

[Kaixa/Dezeñu iha pájina 11]

Feto neʼebé hamtaʼuk Maromak no feen neʼebé folin-boot

Sara nia laʼen mak mane neʼebé fiar metin. Maibé Sara rasik mós hatudu ezemplu diʼak kona-ba halo Maromak kontente. Tuir loloos, Bíblia temi Sara nia naran ba dala tolu nuʼudar feto neʼebé hamtaʼuk Maromak no hatudu ezemplu diʼak. (Isaias 51:1, 2; Ebreu 11:11; 1 Pedro 3:3-6) Maski Bíblia la konta barak kona-ba Sara, maibé ita bele komprende katak Sara iha hahalok furak oioin.

Porezemplu, hanoin toʼok oinsá Sara sente bainhira Abraão fó-hatene nia katak Maromak haruka sira atu sai husi sidade Ur. Karik Sara hanoin, atu bá neʼebé? Tanbasá? Oinsá ho sira-nia presiza loroloron nian? Karik nia mós sente triste tanba tenke husik ninia belun no família. Bainhira mak sira bele hasoru malu fali? Nia bele haree fali sira ka lae? Klaru katak Sara hanoin kona-ba buat oioin. Maski nuneʼe, nia husik ninia hela-fatin no halo viajen hodi fiar metin katak Jeová sei haraik bensaun kuandu nia halo tuir.​—Apóstolu 7:2, 3.

Sara halo tuir Maromak, maibé laʼós neʼe deʼit, nia mak feen neʼebé diʼak tebes. Sara la hanoin atu hadau ninia laʼen nia knaar nuʼudar família nia ulun, maibé nia haburas respeitu neʼebé kleʼan ba ninia laʼen no apoia ninia laʼen neʼebé dirije família. Hodi halo nuneʼe, Sara hafurak ninia an no sai bonita liuhusi ninia hahalok sira.​—1 Pedro 3:1-6.

Feen sira ohin loron bele aprende saida husi Sara nia ezemplu? Feto ida naran Jill neʼebé kontente ho ninia moris kaben ba tinan 30 liu, dehan: “Sara nia ezemplu hanorin haʼu katak haʼu presiza sente livre atu fó sai haʼu-nia hanoin ba haʼu-nia laʼen. Iha tempu hanesan, haʼu-nia laʼen mak família nia ulun, no nia mak iha responsabilidade atu halo desizaun ikus. Kuandu nia foti desizaun ona, haʼu-nia knaar mak hakaʼas an atu apoia desizaun neʼebé nia halo hodi bele hetan susesu.”

Karik lisaun furak liu neʼebé ita bele aprende husi Sara mak maski nia bonita tebes, nia la husik ida-neʼe halo nia sai foti an. (Génesis 12:10-13) Duké sai foti an, nia ho haraik an apoia Abraão iha tempu neʼebé diʼak no iha tempu neʼebé susar. Ita la duvida katak Abraão no Sara mak feen-laʼen neʼebé laran-metin, haraik an no nakonu ho domin, no sira ida-idak nia hahalok neʼebé furak lori duni bensaun ba malu.