“Haʼu Jeová, ó-nia Maromak, haʼu kaer ó-nia liman-loos”

NUʼUDAR aman ho ninia oan-mane hakat liu dalan neʼebé iha karreta barak, aman neʼe hatete ba ninia oan: “Kaer haʼu-nia liman.” Tanba aman nia liman neʼebé forsa kaer metin oan nia liman neʼebé kiʼik, neʼe halo oan sente seguru no la taʼuk. Dala ruma Ita mós sente katak Ita hakarak tebes atu iha ema ida neʼebé kaer Ita-nia liman, no ajuda Ita tahan hasoru susar sira iha Ita-nia moris ka lae? Se nuneʼe, liafuan sira neʼebé Isaías hakerek bele halo Ita sente kmaan.—Lee Isaías (Yesaya) 41:10, 13.

Isaías hakerek liafuan sira-neʼe ba ema Israel sira. Maski Maromak haree nasaun Israel nuʼudar ninia ‘povu espesiál’, maibé iha inimigu barak neʼebé haleʼu nasaun neʼe. (Êxodo [Keluaran] 19:5) Ema Israel sira presiza taʼuk ho ida-neʼe ka lae? Maromak Jeová uza Isaías atu lori mensajen neʼebé fó esperansa ba sira. Nuʼudar ita hanoin kona-ba Isaías nia liafuan sira-neʼe, hanoin-hetan katak liafuan sira-neʼe mós kona Maromak nia atan sira ohin loron.—Roma 15:4.

Maromak Jeová hatete: “Labele taʼuk.” (Versíkulu 10) Ita bele fiar liafuan neʼe tanba Maromak esplika tansá ninia povu lalika taʼuk, nia hatete: “Haʼu hamutuk ho Ita.” Maromak laʼós hamriik iha fatin dook no kuandu ita presiza ajuda mak nia foin mai. Maromak hakarak ninia povu atu hatene katak nia sempre hamutuk ho sira, hanesan nia iha sira-nia sorin no prontu atu ajuda sira. Hodi hatene kona-ba neʼe halo ita sente kmaan duni, loos ka lae?

Maromak Jeová fó fiar ba ninia atan sira hodi hatete: “Labele hateke bá-mai.” (Versíkulu 10) Liafuan husi lia-ebraiku neʼebé tradús nuʼudar “hateke bá-mai” koʼalia kona-ba sira neʼebé “hateke ba fatin hotu atu haree se iha buat ruma neʼebé bele halo aat ba sira”. Jeová esplika tansá ninia povu lalika hateke bá-mai hodi taʼuk, nia hatete: “Tanba haʼu mak Ita-nia Maromak.” Ida-neʼe fó duni esperansa tanba Maromak Jeová mak “Ida neʼebé Aas Liu Hotu”, no “Ida neʼebé Forsa Boot Liu Hotu”. (Salmo [Mazmur] 91:1) Se Jeová, Ida neʼebé iha kbiit tomak mak sira-nia Maromak, tansá sira presiza taʼuk?

Saida mak Jeová nia atan sira bele hein husi nia? Jeová promete: “Haʼu sei ajuda duni Ita. Haʼu sei kontinua atu kaer metin Ita ho haʼu-nia liman-loos justisa nian.” (Versíkulu 10) Nia mós hatete: “Haʼu Jeová, ó-nia Maromak, haʼu kaer ó-nia liman-loos.” (Versíkulu 13) Ita hanoin saida kuandu Ita rona liafuan sira-neʼe? Livru ida esplika: ‘Versíkulu rua neʼe halo ita hanoin kona-ba aman ho oan. Aman la hamriik deʼit husi fatin dook atu defende ninia oan, maibé nia hamriik duni iha ninia oan nia sorin. Nia sei la husik buat ida atu haketak ninia oan husi nia.’ Hanoin toʼok, Jeová sei la husik buat ida atu haketak ninia povu husi nia. Nia mós sei halo nuneʼe iha tempu neʼebé susar liu iha sira-nia moris.—Ebreu 13:5, 6.

Maromak nia atan sira ohin loron bele sente kmaan tebes hodi lee liafuan neʼebé Isaías hakerek. Iha tempu neʼebé nakonu ho “susar barak”, dala ruma ita sente katak ita mout tanba estrese boot iha ita-nia moris. (2 Timoteo 3:1) Maibé ita lalika tahan hasoru susar sira-neʼe mesak deʼit. Maromak Jeová prontu atu kaer ita-nia liman. Hanesan oan neʼebé tau fiar ba ninia aman, ita bele kaer metin Maromak Jeová nia liman neʼebé forsa, hodi fiar katak nia sei dirije ita-nia hakat sira no ajuda ita iha ita-nia moris.—Salmo 63:7, 8.