Serbí Jeová hodi la hanoin fali buat neʼebé liu ona

1-3. (a) Dala ruma ita sente oinsá kona-ba buat neʼebé uluk ita halo? (b) Saida mak ita bele aprende husi Paulo nia ezemplu?

EMA ida naran J. G. Whittier, neʼebé hakerek poezia, nia dehan katak liafuan triste liu neʼebé ema hakerek ka hatete mak: ‘Se haʼu la halo ida-neʼe karik . . .’ Kuandu ema hatete hanesan neʼe, sira hanoin fali kona-ba desizaun ka hahalok ruma neʼebé uluk sira halo, no sente katak se sira halo iha dalan seluk karik, sira-nia moris sai diʼak liu. Ita hotu dala ruma sente hanesan neʼe kona-ba buat ruma neʼebé uluk ita halo ka la halo. Maibé ema balu hanoin beibeik ka triste demais tanba buat neʼebé liu tiha ona. Ita mós hanesan neʼe ka lae?

² Ema balu halo sala boot ruma iha sira-nia moris. Balu fali, maski sira la halo sala boot ruma, maibé sira duvida hela se desizaun neʼebé uluk sira halo mak diʼak ka ladiʼak. Ema balu la hanoin barak kona-ba buat neʼebé liu tiha ona no kontinua laʼo ba oin. Maibé, iha mós ema balu neʼebé sente triste nafatin kona-ba buat neʼebé liu ona hodi hanoin: “Se uluk haʼu la halo nuneʼe karik, haʼu-nia moris sai diʼak liután!” (Sal 51:3) Oinsá ho Ita? Ita hakarak serbí Maromak hodi la hanoin beibeik kona-ba sala neʼebé uluk ita halo ka lae? Bíblia koʼalia kona-ba ema ida neʼebé halo hanesan neʼe, neʼe mak apóstolu Paulo.

³ Iha Paulo nia moris, nia halo sala oioin no nia mós halo desizaun barak neʼebé diʼak. Paulo sente triste kona-ba sala neʼebé uluk nia halo, maibé nia hakaʼas an nafatin atu halo ninia serbisu ba Maromak sai susesu. Entaun, husi Paulo nia ezemplu, mai ita haree oinsá mak ita bele serbí Maromak hodi la hanoin fali buat neʼebé uluk ita halo.

PAULO NIA MORIS ULUK

4. Apóstolu Paulo halo saida deʼit neʼebé ikusmai halo nia arrepende an?

⁴ Kuandu Paulo sei joven nuʼudar ema fariseu ida, neʼebé bolu Saul, nia halo buat oioin neʼebé ikusmai halo nia arrepende an. Porezemplu, nia fó-terus makaʼas ba Kristu nia dixípulu sira. Bíblia hatete katak depois ema oho tiha Estevão, Saul komesa “buka halakon kreda: nia tama uma sai uma hodi kaer ema mane no feto hodi hatama sira iha dadur laran”. (Apos 8:3) Matenek-naʼin ida kona-ba Bíblia, naran Albert Barnes, hatete katak lia-gregu neʼebé tradús nuʼudar “buka halakon kreda” hatudu katak Saul ataka makaʼas kongregasaun kristaun hodi hatudu hahalok “hanesan animál fuik”. Nuʼudar ema neʼebé laran-manas kona-ba relijiaun judeu nian, Saul fiar katak hodi halakon kongregasaun kristaun, nia bele halo Maromak kontente. Tan neʼe, nia fó-terus makaʼas ba ema kristaun sira no ameasa “atu oho . . . feto eh mane”.—Apos 9:1, 2; 22:4.a

5. Oinsá mak Saul para atu fó-terus ba Jesus nia dixípulu sira?

⁵ Loron ida, Saul laʼo ba Damasko atu kaer Jesus nia dixípulu sira no lori ba Jerusalém hodi fó-kastigu ba sira iha tribunál Sinédriu. Maibé, Saul la konsege halo nuneʼe tanba Jesus nuʼudar kongregasaun kristaun nia Ulun mak hapara nia. (Ef 5:23) Kuandu Saul iha dalan atu bá Damasko, Jesus mosu iha ninia oin, no tanba naroman nabilan makaʼas husi lalehan, ida-neʼe halo Saul sai matan-delek. Tuirmai, Jesus haruka nia atu bá Damasko hodi hein atu simu matadalan liután. Ita hotu karik hatene ona kona-ba buat neʼebé akontese depois neʼe.—Apos 9:3-22.

6, 7. Saida mak hatudu katak Paulo rekoñese katak uluk nia halo hahalok aat oioin?

⁶ Kuandu Paulo hatene katak ninia hahalok mak sala no ikusmai sai ema kristaun, nia para kedas atu fó-terus ba Jesus nia dixípulu sira no komesa haklaken ho laran-manas kona-ba Kristu. Maski nuneʼe, nia la taka matan ba ninia hahalok aat uluk nian. Liutiha tempu balu, nia hakerek kona-ba ninia an ba maluk kristaun sira, hodi hatete: “Imi rona tiha ona haʼu-nia moris uluk nian, wainhira haʼu hadomi judeu sira-nia relijiaun: oinsá haʼu, ho laran-toos, fó susar ba Maromak nia kreda, hodi buka ho laran tomak atu halo aat sira.” (Gal 1:13) Kuandu nia hakerek karta ba maluk kristaun sira iha Korinto, Filipe, no mós ba Timóteo, nia mós temi kona-ba hahalok aat neʼebé uluk nia halo. (Lee 1 Korinto 15:9; Flp 3:6; 1 Tim 1:13) Maski Paulo sente triste no moe kona-ba buat neʼebé nia halo iha tempu uluk, maibé nia la subar ninia sala hodi finje katak nia la halo buat ida neʼebé aat. Nia rekoñese duni katak uluk nia halo hahalok aat oioin.—Apos 26:9-11.

⁷ Matenek-naʼin kona-ba Bíblia naran Frederic W. Farrar hatete katak kuandu ita hanoin kona-ba oinsá Paulo fó-terus makaʼas ba ema kristaun sira, ita mós hatene oinsá mak ikusmai nia sente triste tebes kona-ba neʼe no tanbasá mak ema kristaun balu kritika nia. Kuandu Paulo vizita kongregasaun sira, karik ema kristaun balu neʼebé foin hasoru nia dehan: ‘Ah, ó mak Paulo, ida neʼebé uluk fó-terus ba ami!’—Apos 9:21.

8. Paulo sente oinsá kona-ba laran-luak no domin neʼebé Jeová no Jesus hatudu ba nia? Ita bele aprende saida husi Paulo nia ezemplu?

⁸ Maibé, Paulo rekoñese katak nia bele halaʼo ninia serbisu nuʼudar apóstolu tanba deʼit Maromak hatudu laran-diʼak ba nia. Tan neʼe, nia temi kona-ba Maromak nia grasa, ka laran-diʼak, maizumenus dala 90 iha ninia karta hamutuk 14, nia hakerek kona-ba ida-neʼe barak liu fali hakerek-naʼin Bíblia seluk. (Lee 1 Korinto 15:10.) Paulo agradese tebes ba Maromak nia laran-diʼak, no nia hakarak duni hatudu agradese neʼe liuhusi ninia hahalok. Tan neʼe, nia halaʼo Maromak nia serbisu “makaʼas liu fali” apóstolu sira seluk hotu. Entaun, ita bele aprende saida husi Paulo nia ezemplu? Se ita tau fiar ba Jesus nia sakrifísiu no fó sai ita-nia sala hodi troka ita-nia hahalok, Jeová sei prontu atu fó perdua ba ita maski ita halo sala ruma neʼebé boot. Tan neʼe, se ita sente katak sala neʼebé uluk ita halo mak boot demais toʼo la bele hetan perdua, ita presiza hanoin-hetan kona-ba Paulo nia ezemplu. (Lee 1 Timoteo 1:15, 16.) Maski uluk Paulo fó-terus ba Jesus, nia hatete: “Maromak nia Oan-Mane . . . hadomi haʼu no saran nia moris tanba haʼu.” (Gal 2:20; Apos 9:5) Sin, Paulo aprende atu serbí Maromak ho laran tomak hodi la hanoin beibeik kona-ba buat neʼebé uluk nia halo, atu nuneʼe iha aban-bainrua nia sei la sai triste ho razaun seluk tan. Ita mós bele halo tuir Paulo nia ezemplu diʼak neʼe.

ITA TRISTE KONA-BA BUAT RUMA NEʼEBÉ ULUK ITA HALO KA LAE?

9, 10. (a) Ho razaun saida deʼit mak dala ruma ita sente triste? (b) Tanbasá mak la diʼak atu hanoin barak kona-ba sala neʼebé uluk ita halo?

⁹ Ita mós sente triste kona-ba sala ruma neʼebé uluk Ita halo ka lae? Karik Ita soe Ita-nia tempu ka forsa atu halo buat neʼebé la iha folin. Karik Ita mós halo hahalok ruma neʼebé lori susar ba ema seluk, ka halo Ita sente katak tuir loloos Ita la bele halo hanesan neʼe. Se ita sente hanesan neʼe, ita bele halo saida?

¹⁰ Ema barak hanoin beibeik kona-ba buat neʼebé uluk sira halo, no ida-neʼe halo sira triste liután. Maibé, hanoin hanesan neʼe ajuda sira atu rezolve problema ka lae? Lae duni! Hanoin toʼok se ita tuur hela iha kadeira no book an hodi hakarak laʼo ba oin. Se halo hanesan neʼe, ita soe ita-nia forsa saugati deʼit. Tan neʼe, duké hanoin barak kona-ba buat neʼebé liu tiha ona, diʼak liu ita halo buat ruma neʼebé ajuda ita atu rezolve problema. Se ita halo sala hasoru ema ruma, ita presiza husu deskulpa hodi hadame malu fali ho nia. No diʼak mós atu hanoin tanbasá mak ita halo sala neʼe hodi ita labele repete fali sala neʼebé hanesan. Dala ruma, ita mós presiza tahan deʼit ho rezultadu aat husi ita-nia sala ka desizaun ladiʼak neʼebé ita halo. Maibé, hanoin beibeik kona-ba sala neʼebé uluk ita halo sei la ajuda ita. Tuir loloos, ida-neʼe bele lori susar ba ita atu serbí Maromak ho laran tomak.

11. (a) Atu bele simu Jeová nia laran-diʼak no domin, ita presiza halo saida deʼit? (b) Tuir Bíblia, atu bele iha dame iha laran no la sente sala, ita presiza halo saida deʼit?

¹¹ Ema balu hanoin katak sala neʼebé uluk sira halo boot demais toʼo sira la merese atu simu Maromak nia laran-luak. Sira hanoin katak sira halo sala neʼebé todan ka barak liu. Maibé, tuir loloos, maski ita halo sala boot naran deʼit, ita bele arrepende an, troka ita-nia hahalok no husu Maromak nia perdua. (Apos 3:19) Se ita halo nuneʼe, Jeová bele hatudu laran-diʼak no domin ba ita, hanesan nia halo tiha ona ba ema seluk barak. Jeová sei hatudu laran-diʼak hodi fó perdua ba ema naran deʼit neʼebé haraik-an, laran-moos, no triste kona-ba ninia sala. Porezemplu, Maromak fó perdua ba Job, neʼebé arrepende ninia sala ho laran. (Jó 42:6) Atu ita iha dame iha laran no la sente sala, ita presiza halo tuir Bíblia nia matadalan neʼebé dehan: “Ema neʼebé taka nia sala sei la hetan diʼak, maibé ema neʼebé dehan sai no husik nia sala sei simu laran-sadiʼa.” (Prov 28:13; Tgo 5:14-16) Sin, ita presiza fó sai ita-nia sala ba Maromak, halo orasaun hodi husu Ninia perdua, no hatudu liuhusi ita-nia hahalok katak ita arrepende an duni. (2 Kor 7:10, 11) Hodi halo nuneʼe, ita bele hetan laran-diʼak husi Jeová, neʼebé ‘fó perdua neʼebé boot tebes’.—Isa 55:7.

12. (a) Kuandu ita sente sala, oinsá mak ita bele halo tuir David nia ezemplu? (b) Kuandu Bíblia hatete katak Jeová “sente triste” kona-ba buat neʼebé uluk nia halo, neʼe katak sá? (Haree kaixa iha leten.)

¹² Dalan ida neʼebé Maromak ajuda ita mak liuhusi orasaun. Iha livru Salmo, Liurai David hatudu sai ninia fiar katak Jeová hatán duni ninia orasaun. (Lee Salmo 32:2, 3, 5.b) Kuandu David seidauk fó sai ninia sala ba Maromak, ida-neʼe halo nia sente sala no ladiʼak. Nia mós sente moras, laran-susar, no laran-tun. Maibé, oinsá mak David hetan perdua no kmaan? Tanba nia fó sai ninia sala ba Maromak. Jeová hatán duni David nia orasaun no fó forsa ba David atu kontinua halo buat neʼebé loos. Nuneʼe mós ho ita. Se ita hanoin barak kona-ba sala neʼebé uluk ita halo, ita presiza halo orasaun ba Jeová ho laran no hakaʼas an atu hadiʼa ita-nia hahalok. Hodi halo nuneʼe, ita bele fiar katak Jeová rona ita-nia orasaun no fó perdua ba ita.—Sal 86:5.

TAU ATENSAUN BA FUTURU

13, 14. (a) Agora daudauk, ita presiza tau atensaun ba saida? (b) Pergunta saida deʼit mak bele ajuda ita atu hanoin kona-ba buat neʼebé ita halo daudauk?

¹³ Ita bele aprende husi buat neʼebé akontese iha tempu uluk, maibé ita labele hanoin beibeik kona-ba buat neʼebé liu tiha ona. Duké halo nuneʼe, ita presiza tau atensaun ba buat neʼebé ita halo agora daudauk no mós ba futuru. Husu ba ita-nia an: ‘Buat neʼebé haʼu halo daudauk sei halo haʼu triste iha aban-bainrua ka lae? Haʼu sei sente triste kona-ba desizaun neʼebé haʼu halo agora ka lae? Haʼu serbí daudauk Maromak ho laran metin hodi nuneʼe aban bainrua haʼu sei la triste kona-ba buat neʼebé haʼu halo ka lae?’

¹⁴ Nuʼudar terus boot besik ona daudauk, diʼak ba ita atu husu ba ita-nia an: ‘Haʼu bele aumenta haʼu-nia serbisu ba Maromak ka lae? Haʼu bele serbí nuʼudar pioneiru ka lae? Saida deʼit mak hanetik haʼu atu la hetan knaar nuʼudar atan ba kongregasaun? Haʼu hakaʼas an duni atu hadiʼa liután haʼu-nia hahalok ka lae? Haʼu mak ema neʼebé monu loos iha Jeová nia laran no bele tama iha mundu foun ka lae?’ Duké hanoin barak kona-ba buat neʼebé uluk ita halo, diʼak liu ita hanoin buat neʼebé ita halo daudauk no hakaʼas an atu serbí Jeová ho laran tomak. Se lae, ita sei sente triste liután iha aban-bainrua.—2 Tim 2:15.

KETA SENTE TRISTE KONA-BA ITA-NIA SERBISU BA MAROMAK

15, 16. (a) Ema kristaun barak neʼebé tau uluk serbisu ba Jeová iha sira-nia moris halo ona sakrifísiu saida deʼit? (b) Tanbasá mak ita lalika sente triste kona-ba buat neʼebé ita lakon hodi serbí Jeová?

¹⁵ Maibé, oinsá se ita halo ona sakrifísiu hodi husik buat oioin atu serbí Jeová tempu-tomak? Karik ita husik serbisu diʼak atu manán osan boot no halo ita-nia moris simples hodi bele uza ita-nia tempu barak liután atu serbí Jeová. Karik ita balu deside atu la kaben ka atu la iha oan hodi bele kontinua serbí iha Betel, harii reuniaun-fatin sira iha rai seluk, ka serbí nuʼudar katuas área nian ka misionáriu. Nuʼudar ita sai ferik-katuas daudauk, ita sente triste kona-ba desizaun neʼebé uluk ita halo ka lae? Ita sente katak tuir loloos diʼak liu ita la halo sakrifísiu boot hanesan neʼe ka lae? Lalika hanoin hanesan neʼe!

¹⁶ Ita halo desizaun sira-neʼe tanba ita hadomi Jeová no hakarak ajuda ema seluk atu serbí nia. Ita la presiza hanoin katak diʼak liu ita la halaʼo ita-nia moris hanesan neʼe. Ita bele sente kontente kona-ba desizaun neʼebé ita halo! Ita deside atu halo buat hotu neʼebé ita bele halo hodi serbí Jeová. Jeová sei la haluha buat neʼebé ita lakon ona atu serbí nia, no iha aban-bainrua, kuandu ita sei iha ‘moris loloos’, nia sei fó ita bensaun barak liu fali buat neʼebé ita hakarak atu simu!—Sal 145:16; 1 Tim 6:19.

OINSÁ ATU SERBÍ JEOVÁ HODI LA HANOIN FALI BUAT NEʼEBÉ LIU ONA

17, 18. (a) Saida mak apóstolu Paulo halo hodi labele sai triste liután kona-ba ninia moris? (b) Oinsá mak ita bele halo tuir Paulo nia ezemplu?

¹⁷ Entaun, hodi la hanoin fali buat neʼebé liu ona, saida mak apóstolu Paulo halo? Nia hatete: “Haʼu haluha buat neʼebé liu tiha ona, no haʼu halai makaʼas ba oin atu toʼo ba rohan; haʼu matan hateke ba kolen neʼebé Maromak . . . bolu ita atu buka.” (Lee Filipe 3:13, 14.) Paulo la hanoin beibeik kona-ba hahalok aat neʼebé uluk nia halo kuandu nia tuir relijiaun judeu nian. Duké halo nuneʼe, nia uza ninia forsa tomak atu serbí Maromak ho laran-metin atu nia bele hetan moris rohan-laek nuʼudar ninia kolen.

¹⁸ Ita bele aprende saida husi Paulo nia liafuan neʼe? Duké hanoin barak kona-ba buat neʼebé liu tiha ona, neʼebé la bele troka, ita presiza tau atensaun ba buat neʼebé ita halo daudauk hodi bele hetan bensaun iha futuru. Karik ita la bele haluha hotu kona-ba sala neʼebé uluk ita halo, maibé ita la presiza sente sala beibeik kona-ba neʼe. Sin, mai ita hakaʼas an atu la hanoin beibeik kona-ba buat neʼebé liu ona, no agora serbí Maromak ho laran tomak, no hein atu hetan futuru neʼebé diʼak tebes!