Katuas kristaun sira ‘serbisu ba ita-nia ksolok’
“Ami serbisu ba imi-nia ksolok.”—2 KOR 1:24.
1. Tanbasá mak Paulo kontente kona-ba ema kristaun iha Korinto?
IHA tinan 55, apóstolu Paulo rona katak ninia maluk kristaun sira iha sidade Korinto haksesuk malu beibeik. Tanba Paulo hadomi sira hanesan aman hadomi ninia oan, nia haruka karta ida atu fó konsellu ba sira. (1 Kor 1:11; 4:15) Nia mós haruka ninia maluk Tito atu vizita sira no halo planu ho nia atu hasoru malu fali iha sidade Tróade. Liutiha fulan balu, Paulo bá Tróade no hein Tito atu mai hodi bele rona kona-ba irmaun sira iha Korinto. Maibé, tanba Tito la mai, Paulo sente triste no deside atu saʼe ró ba Masedónia. Ikusmai, Paulo hasoru malu fali ho Tito iha Masedónia, no ida-neʼe halo nia kontente. Tito hatete katak irmaun sira iha Korinto halo tuir Paulo nia konsellu no sira hein namanas atu simu Paulo nia vizita. Hodi rona nuneʼe, Paulo sente “haksolok liután”.—2 Kor 2:12, 13; 7:5-9.
2. (a) Paulo hatete saida ba ema kristaun iha Korinto? (b) Ita sei koʼalia kona-ba pergunta saida deʼit?
2 Lakleur depois neʼe, Paulo hakerek karta ida tan ba kongregasaun iha Korinto. Nia hatete: “Laʼós atu hatodan imi-nia fiar, maibé ami serbisu ba imi-nia ksolok; basá imi-nia fiar metin ona.” (2 Kor 1:24) Paulo nia liafuan neʼe katak sá? No saida deʼit mak katuas kristaun sira ohin loron bele aprende husi liafuan neʼe?
ITA-NIA FIAR NO KSOLOK
3. (a) Paulo nia liafuan “imi-nia fiar metin ona” katak sá? (b) Iha dalan saida deʼit mak katuas kristaun ohin loron halo tuir Paulo nia ezemplu?
3 Iha eskritura neʼe, Paulo koʼalia kona-ba hahalok rua neʼebé importante tebes ba ema kristaun, neʼe mak fiar no ksolok. Kona-ba fiar, nia hatete: “Laʼós atu hatodan imi-nia fiar, . . . basá imi-nia fiar metin ona.” Ho liafuan neʼe, Paulo hakarak dehan katak ema kristaun iha Korinto serbí Maromak ho laran-metin ho sira rasik nia fiar, laʼós tanba nia ka ema seluk. Nia fiar katak sira hadomi Maromak no hakarak halo buat neʼebé loos. Tan neʼe, Paulo hatene katak nia la presiza kontrola ninia maluk sira-nia fiar, no nia mós lakohi halo ida-neʼe. (2 Kor 2:3) Katuas kristaun ohin loron mós halo tuir Paulo nia ezemplu hodi la duvida katak sira-nia maluk kristaun iha fiar metin no hakarak atu serbí Maromak ho laran. (2 Tes 3:4) Sira mós la halo lei oioin iha kongregasaun, maibé hakaʼas an atu ajuda maluk kristaun sira atu bele halo desizaun rasik hodi tuir matadalan husi Bíblia no husi Jeová nia organizasaun. Hanesan ho Paulo, katuas kristaun ohin loron mós la hatodan maluk kristaun sira-nia fiar.—1 Ped 5:2, 3.
4. (a) Kuandu Paulo hatete: “Ami serbisu ba imi-nia ksolok”, nia hakarak fó-hatene saida? (b) Oinsá mak katuas kristaun ohin loron halo tuir Paulo nia ezemplu?
4 Paulo mós hatete: “Ami serbisu ba imi-nia ksolok.” Sé mak “ami”? Neʼe mak sira neʼebé serbisu hamutuk ho Paulo atu ajuda ema kristaun iha Korinto. Oinsá mak ita bele hatete nuneʼe? Tanba iha karta neʼebé hanesan, Paulo temi kona-ba ninia maluk naʼin-rua, hodi dehan katak “Silvano no Timóteo no haʼu” mak haklaken kona-ba Jesus ba sira. (2 Kor 1:19) Iha lia orijinál, liafuan neʼebé tradús nuʼudar “ami serbisu” mós katak “ami maluk serbisu”. Nuneʼe, kuandu Paulo hakerek iha ninia karta kona-ba maluk serbisu, nia koʼalia kona-ba sira neʼebé halo serbisu haklaken ho badinas hamutuk ho nia, hanesan Apolo, Áquila, Prisca, Timóteo, no Tito. (Rom 16:3, 21; 1 Kor 3:6-9; 2 Kor 8:23) Tan neʼe, kuandu Paulo hatete: “Ami serbisu ba imi-nia ksolok”, Paulo hakarak fó-hatene ba ema kristaun iha Korinto katak nia ho ninia maluk sira hakarak duni atu halo buat hotu neʼebé sira bele hodi haburas haksolok iha kongregasaun. Nuneʼe mós ho katuas kristaun ohin loron. Sira hakarak halo buat hotu neʼebé sira bele halo atu ajuda maluk kristaun sira “serbí Jeová ho laran-haksolok”.—Sal 100:2; Flp 1:25.
5. Irmaun-irmán balu fó resposta ba pergunta saida? Nuʼudar ita haree sira-nia resposta, ita mós bele hanoin kona-ba saida deʼit?
5 Foin daudauk, Maromak nia organizasaun husu irmaun-irmán balu iha rai oioin atu fó resposta ba pergunta: “Katuas kristaun nia hahalok no liafuan saida deʼit mak halo ita haksolok liután?” Agora, mai ita haree sira-nia resposta. Nuʼudar ita halo nuneʼe, ita mós bele hanoin kona-ba irmaun katuas sira-nia hahalok ka liafuan neʼebé lori haksolok ba ita rasik. Liután neʼe, diʼak atu ita mós hanoin kona-ba oinsá mak ita hotu bele haburas haksolok iha ita-nia kongregasaun.a
“KUMPRIMENTU BA DOBEN PERSICE”
6, 7. (a) Saida mak dalan ida neʼebé katuas sira bele halo tuir ezemplu husi Jesus, Paulo no Maromak nia atan sira seluk? (b) Kuandu ita hanoin-hetan irmaun-irmán sira-nia naran, tanbasá mak ida-neʼe halo sira kontente?
6 Ita-nia irmaun-irmán barak hatete katak sira sente kontente kuandu katuas kristaun sira hatudu interese ba sira. Dalan ida neʼebé katuas sira halo ida-neʼe mak hodi halo tuir ezemplu husi David, Eliú, no Jesus. (Lee 2 Samuel 9:6;b Jó 33:1;c Lucas 19:5.) Sira naʼin-tolu neʼe hatudu interese ba ema seluk hodi temi sira-nia naran. Paulo mós hatene katak importante atu temi ninia maluk kristaun sira-nia naran. Porezemplu, iha Paulo nia karta ida, nia temi kona-ba irmaun-irmán naʼin-25 liu hodi uza sira ida-idak nia naran, inklui mós feto kristaun ida naran Persice. Kona-ba irmán neʼe, Paulo hatete: “Hatoʼo haʼu-nia kumprimentu ba doben Persice.”—Rom 16:3-15.
7 Katuas kristaun balu susar atu hanoin-hetan irmaun-irmán sira-nia naran. Maibé, kuandu sira hakaʼas an atu hatene ema ida-idak nia naran, ida-neʼe halo irmaun-irmán sira sente katak katuas sira-neʼe hafolin sira. (Êx 33:17) Irmaun-irmán sira mós sente kontente kuandu katuas sira temi sira-nia naran atu fó komentáriu iha reuniaun Estudu Livru Haklaken no iha reuniaun sira seluk.—Kompara ho Joao 10:3.
“PERSICE, NEʼEBÉ SERBISU MAKAʼAS IHA NAʼI”
8. Iha dalan importante saida mak Paulo halo tuir Jeová no Jesus nia ezemplu?
8 Paulo mós hatudu interese ba ninia maluk sira hodi gaba sira. Ida-neʼe mak dalan ida seluk neʼebé katuas sira ajuda maluk kristaun atu serbí Maromak ho laran-haksolok. Porezemplu, kuandu Paulo hakerek ba ema kristaun iha Korinto, nia gaba sira no hatete katak nia kontente kona-ba sira-nia hahalok. (2 Kor 7:4) Ita bele fiar katak Paulo nia liafuan neʼe halo maluk kristaun iha Korinto sente katak Paulo hadomi sira. Paulo mós gaba kongregasaun seluk kona-ba sira-nia hahalok diʼak. (Rom 1:8; Flp 1:3-5; 1 Tes 1:8) Tuir loloos, kuandu Paulo temi kona-ba Persice iha ninia karta ba kongregasaun iha Roma, nia hatete: “Hatoʼo haʼu-nia kumprimentu ba doben Persice, neʼebé serbisu makaʼas iha Naʼi.” (Rom 16:12) Ita fiar katak kuandu Persice rona liafuan neʼe, nia sente laran-manas. Sin, Paulo halo tuir Jeová no Jesus nia ezemplu hodi gaba ema seluk.—Lee Marcos 1:9-11; Joao 1:47; Apok 2:2, 13, 19.
9. Tanbasá mak importante ba ita atu gaba ita-nia maluk iha kongregasaun?
9 Katuas kristaun ohin loron mós hatene katak importante tebes atu fó sai oinsá sira hafolin maluk kristaun hodi gaba sira. (Prov 3:27; 15:23) Kuandu katuas sira halo nuneʼe, sira hatudu katak sira hanoin maluk kristaun sira no haree ba buat neʼebé sira halo. Irmaun-irmán sira iha kongregasaun presiza rona liafuan hanesan neʼe husi katuas sira hodi simu laran-manas. Irmán ida ho tinan 50 liu ona hatete: “Iha serbisu-fatin, ema la gaba haʼu. Ema la hanoin malu no buka deʼit atu sai diʼak liu fali ema seluk. Tan neʼe, kuandu katuas ida gaba haʼu kona-ba buat neʼebé haʼu halo iha kongregasaun, ida-neʼe halo haʼu kontente no fó forsa mai haʼu! Ida-neʼe halo haʼu sente katak haʼu-nia Aman iha lalehan hadomi haʼu.” Irmaun ida neʼebé haboot mesak ninia oan naʼin-rua mós sente hanesan neʼe kuandu katuas ida gaba nia ho laran. Nia hatete katak katuas neʼe nia liafuan fó laran-manas tebes ba nia atu kontinua hakaʼas an hodi serbí Maromak. Klaru katak kuandu katuas sira gaba maluk kristaun sira ho laran, ida-neʼe ajuda sira atu kontinua laʼo iha dalan neʼebé loos ho haksolok hodi “la sai kole”.—Isa 40:31.
“TAU MATAN BA MAROMAK NIA KONGREGASAUN”
10, 11. (a) Oinsá mak katuas sira bele halo tuir Neemias nia ezemplu? (b) Kuandu katuas sira vizita irmaun-irmán sira, saida deʼit mak ajuda katuas sira atu hametin maluk sira-nia fiar?
10 Saida mak dalan ida seluk neʼebé katuas kristaun sira hatudu domin ba maluk kristaun sira no ajuda sira serbí Maromak ho haksolok? Katuas sira halo ida-neʼe hodi lalais atu hakbesik ba maluk neʼebé presiza simu laran-manas. (Lee Apostolu 20:28, MF.d) Kuandu katuas sira halo ida-neʼe, sira banati-tuir Maromak nia atan sira iha tempu uluk. Porezemplu, Bíblia hatete katak kuandu Neemias haree katak ninia maluk judeu balu sente laran-tun, nia halo kedas buat ruma atu fó aten-brani ba sira. (Neem 4:14) Katuas kristaun sira ohin loron mós hakarak halo hanesan neʼe. Kuandu sira haree katak sira-nia maluk ruma sente laran-tun, sira buka dalan atu fó laran-manas ba sira. Hodi halo nuneʼe, katuas sira vizita maluk kristaun sira-nia uma no fahe “kmanek espirituál” ba sira, katak koʼalia kona-ba buat neʼebé hametin maluk sira-nia fiar. (Rom 1:11) Saida deʼit mak ajuda katuas sira atu halo nuneʼe?
11 Antes atu vizita irmaun-irmán sira, katuas sira presiza hanoin didiʼak kona-ba maluk ida-idak nia situasaun. Porezemplu, katuas sira bele husu ba sira-nia an: ‘Susar saida deʼit mak irmaun ka irmán neʼe hasoru daudauk? Haʼu bele hatete saida atu halo nia sente kontente? Eskritura saida ka ezemplu saida husi Bíblia mak haʼu bele temi atu fó laran-manas ba nia?’ Se katuas sira hanoin uluk kona-ba irmaun ka irmán neʼebé atu vizita, sira bele koʼalia kona-ba buat neʼebé ajuda duni iha maluk sira-nia situasaun duké koʼalia kona-ba buat baibain deʼit. Kuandu halo vizita hanesan neʼe, katuas sira mós rona didiʼak ba buat neʼebé irmaun-irmán koʼalia nuʼudar sira fó sai sira-nia sentimentu. (Tgo 1:19) Irmán ida hatete: “Kuandu katuas ida rona didiʼak buat neʼebé haʼu koʼalia, ida-neʼe halo haʼu sente kmaan.”—Lc 8:18.
Katuas sira hanoin didiʼak kona-ba oinsá atu fó laran-manas ba maluk sira antes atu vizita sira
12. Iha kongregasaun laran, sé deʼit mak presiza simu laran-manas? Tanbasá?
12 Sé deʼit mak presiza simu laran-manas husi katuas sira? Paulo hatete ba katuas sira atu tau atensaun ba “bibi-luhan tomak”. Sin, ema hotu iha kongregasaun laran presiza hetan laran-manas, inklui mós sira neʼebé serbí tinan barak ona nuʼudar haklaken-naʼin no pioneiru. Tanbasá mak sira presiza hetan laran-manas husi katuas sira? Tanba maski sira fiar metin, maibé sira mós dala ruma sente katak sira la bele tahan ona ho susar oioin neʼebé sira hasoru iha mundu aat neʼe. Atu hatene katak Maromak nia atan neʼebé fiar metin mós presiza maluk nia ajuda, mai ita hanoin kona-ba situasaun perigu ida neʼebé Liurai David hasoru.
ABISAI “MAI KEDAS ATU AJUDA DAVID”
13. (a) Bainhira mak Isbi-benob hanoin atu oho David? (b) Oinsá mak Abisai ajuda David iha tempu neʼebé loos?
13 Kuandu joven David simu kose-mina atu sai liurai, lakleur nia funu hasoru Golias, ema jigante ida husi rasa Refaim. David hatudu aten-brani no oho jigante neʼe. (1 Sam 17:4, 48-51; 1 Crôn 20:5, 8) Liutiha tinan barak, iha funu entre ema Israel no ema Filístia sira, no dala ida tan David halo funu hasoru jigante ida, naran Isbi-benob, neʼebé mós husi rasa Refaim. (2 Sam 21:16) Maibé, iha tempu neʼebá, jigante neʼe besik atu oho David. Tanbasá? Ida-neʼe akontese laʼós tanba David lakon aten-brani, maibé tanba nia lakon ninia forsa. Bíblia hatete katak “David sai kole”. Kuandu Isbi-benob haree katak David kole ona, nia hanoin katak neʼe mak tempu diʼak atu oho David. Maibé, foin antes nia atu sona David, Abisai “mai kedas” hodi ajuda David no oho ema Filístia neʼe. (2 Sam 21:15-17) David besik ona atu lakon ninia moris! Ita fiar katak David agradese tebes ba Abisai tanba Abisai haree didiʼak ba David hodi bele ajuda kedas kuandu David hasoru perigu boot! Istória neʼe hanorin saida mai ita?
14. (a) Saida deʼit mak bele ajuda ita atu manán hasoru susar boot oioin? (b) Iha dalan saida mak katuas sira bele ajuda ita atu hetan fali forsa no haksolok? Fó toʼok ezemplu.
14 Iha mundu tomak, ita nuʼudar Jeová nia povu kontinua serbí nia maski Satanás ho ninia ema sira fó susar oioin. No ita balu hasoru ona susar boot hanesan David neʼebé hasoru jigante, maibé hodi tau fiar tomak ba Jeová, ita manán hasoru susar sira-neʼe. Maski nuneʼe, dala ruma ita mós sai kole no sente katak ita la iha tan forsa atu kontinua luta hasoru Satanás nia mundu aat. Situasaun hanesan neʼe bele halo ita sai laran-tun lalais kona-ba problema sira neʼebé ita baibain bele tahan. Maibé, hodi hetan ajuda husi katuas kristaun ida iha tempu neʼebé loos, ida-neʼe bele halo ita iha forsa fali atu kontinua serbí Maromak ho haksolok. Irmaun-irmán barak iha ona esperiénsia hanesan neʼe. Porezemplu, irmán ida ho tinan 60 liu, neʼebé serbí nuʼudar pioneiru, hatete: “Tempu balu liubá, kuandu haʼu-nia saúde ladún diʼak no serbisu haklaken halo haʼu kole tebes, katuas ida haree haʼu la iha forsa, no hakbesik ba haʼu. Ami koʼalia kona-ba eskritura sira husi Bíblia no ida-neʼe fó laran-manas ba haʼu. Depois neʼe, haʼu halo tuir ninia sujestaun no ida-neʼe ajuda duni haʼu.” Nia hatutan tan: “Haʼu sente domin husi katuas neʼe tanba nia haree haʼu-nia situasaun ladiʼak no nia ajuda haʼu!” Sin, ita kontente tanba iha katuas kristaun sira neʼebé tau matan didiʼak ba ita no sempre prontu atu ajuda ita, hanesan Abisai neʼebé prontu atu ajuda David.
SIRA HATENE PAULO HADOMI SIRA
15, 16. (a) Tanbasá mak ema kristaun sira iha tempu uluk hadomi Paulo? (b) Tanbasá mak ita hadomi ita-nia katuas sira?
15 Katuas sira halo serbisu makaʼas hodi tau matan ba irmaun-irmán sira. Dala ruma sira la toba-dukur tanba hanoin barak kona-ba maluk kristaun sira, no mós halo orasaun iha kalan-boot hodi husu Maromak nia ajuda ba maluk sira. (2 Kor 11:27, 28) Maibé, katuas sira halaʼo sira-nia knaar ho haksolok hanesan Paulo. Nia hatete ba ema kristaun iha Korinto: “Kona-ba haʼu, ho laran-haksolok haʼu sei fó buat hotu neʼebé haʼu iha no fó haʼu-nia an tomak ba imi.” (2 Kor 12:15, MF) Tanba Paulo hadomi ninia maluk sira, nia prontu atu uza buat hotu neʼebé nia iha inklui mós ninia forsa hotu hodi bele hametin sira. (Lee 2 Korinto 2:4; Flp 2:17; 1 Tes 2:8) Tan neʼe mak ema kristaun sira iha tempu neʼebá hadomi tebes Paulo!—Apos 20:31-38.
16 Ita mós hadomi ita-nia katuas kristaun sira no fó-agradese ba Jeová tanba nia uza sira atu tau matan ba ita. Ita kontente tanba katuas sira hanoin ita ida-idak no vizita ita hodi fó laran-manas ba ita. No ita mós kontente tanba sira sempre prontu atu ajuda ita kuandu ita la bele ona atu tahan hasoru susar ho ita rasik nia forsa. Sin, katuas kristaun sira neʼebé halo hanesan neʼe serbisu makaʼas ba ita-nia ksolok.
a Pergunta ida seluk neʼebé irmaun-irmán sira hatán mak: “Husi hahalok diʼak oioin neʼebé katuas kristaun sira hatudu, hahalok saida mak ita gosta liu?” Sira barak liu dehan katak hahalok neʼebé sira gosta mak laran-diʼak no fasil atu hakbesik. Iha futuru, Livru Haklaken sei koʼalia kona-ba tanbasá mak hahalok neʼe importante ba katuas sira.
b 2 Samuel 9:6: “Kuandu Mefiboset, Saul nia oan Jónatas nia oan, mai hasoru David, nia taka kedas ninia oin ba rai no hakneʼak. David hatete: ‘Mefiboset!’ Nia hatete: ‘Ita-nia atan mak neʼe.’”
c Jó 33:1: “Maibé agora, oh, Job, rona haʼu-nia liafuan bá, no see tilun ba buat hotu neʼebé haʼu koʼalia.”
d Apostolu 20:28: “Tau atensaun ba ba imi-nia an no ba bibi-luhan tomak, tanba espíritu santu foti imi nuʼudar katuas iha sira leet, atu tau matan ba Maromak nia kongregasaun, neʼebé nia sosa ona ho ninia Oan rasik nia raan.”