Resposta ba pergunta sira kona-ba Bíblia

Ita bele komprende Bíblia ka lae?

Bíblia mak Maromak nia Liafuan. Neʼe hanesan surat ida husi aman neʼebé hadomi ninia oan sira. (2 Timoteo 3:16) Liuhusi Bíblia, Maromak esplika oinsá mak ita bele halo nia kontente, tanbasá mak nia husik buat aat akontese, no saida mak nia sei halo ba ema iha futuru. Maibé ulun-naʼin relijiaun sira la hanorin buat neʼebé Bíblia hanorin, no tan neʼe, ema barak sente katak sira sei nunka bele komprende Bíblia.—Apostolu 20:29, 30.

Maromak Jeová hakarak ita atu hatene lia-loos kona-ba nia. Tan neʼe, nia fó mai ita livru neʼebé ita bele komprende.—Lee 1 Timoteo 2:3, 4.

Oinsá mak ita bele komprende Bíblia?

Maromak Jeová laʼós fó deʼit Bíblia, maibé nia mós ajuda ita atu komprende ida-neʼe. Nia haruka Jesus atu hanorin ita. (Lucas 4:16-21) Jesus ajuda ema neʼebé rona nia atu komprende Maromak nia Liafuan, hodi temi beibeik liafuan husi eskritura sira.—Lee Lucas 24:27, 32, 45.

No mós, Jesus harii kongregasaun kristaun hodi ema bele kontinua halaʼo serbisu neʼebé uluk nia mak hahú. (Mateus 28:19, 20) Ohin loron, Jesus nia dixípulu sira neʼebé loos ajuda ema atu komprende buat neʼebé Bíblia hanorin kona-ba Maromak. Se Ita hakarak atu komprende Bíblia, Testemuña ba Jeová kontente atu ajuda Ita.—Lee Apostolu 8:30, 31.