Hetan benefísiu liután husi lee Bíblia

1. Oinsá ita hatene katak Eskritura sira mak importante ba Jesus?

IMAJINA ita bele rona Jesus bainhira nia hanorin. Dala barak nia temi eskritura sira neʼebé nia dekór ona. Tuir loloos, Jesus nia liafuan primeiru neʼebé hakerek iha Bíblia depois nia hetan batizmu no ninia liafuan ikus antes nia mate mak liafuan neʼebé nia foti husi Eskritura sira.b (Deut 8:3; Sal 31:5; Lc 4:4; 23:46) No durante tinan tolu ho balu, dala barak Jesus lee no temi Eskritura sira no mós esplika ba ema.​—Mt 5:17, 18, 21, 22, 27, 28; Lc 4:16-20.

2. Saida mak ajuda Jesus atu hatene didiʼak Eskritura sira nuʼudar nia sai boot? (Haree dezeñu iha livru oin.)

² Tinan barak antes Jesus hahú ninia serbisu haklaken, Jesus lee no rona beibeik Maromak nia Liafuan. Ita bele fiar katak loroloron iha uma, Jesus rona Maria no José temi Eskritura sira bainhira sira-nia família koʼalia hamutuk.c (Deut 6:6, 7) Ita bele fiar katak Jesus bá sinagoga hamutuk ho ninia família Sábadu-Sábadu. (Lc 4:16) Iha neʼebá, nia rona didiʼak bainhira ema lee Eskritura sira. Ikusmai, Jesus mós aprende atu lee rasik Liafuan Sagradu sira-neʼe. Tan neʼe, Jesus hatene didiʼak no hafolin Eskritura sira no mós husik ida-neʼe fó influénsia ba ninia hahalok. Porezemplu, hanoin-hetan buat neʼebé akontese bainhira Jesus tinan 12. Mestre sira neʼebé hatene didiʼak Moisés nia Ukun-Fuan “admira tebes kona-ba [Jesus nia] matenek no ninia resposta sira”.​—Lc 2:46, 47, 52.

3. Iha lisaun neʼe, ita sei aprende saida?

³ Ita mós bele hatene no hafolin Bíblia bainhira ita lee beibeik ida-neʼe. Maibé oinsá mak ita bele hetan benefísiu liután husi buat neʼebé ita lee? Ita bele aprende husi Jesus nia liafuan ba ema neʼebé hatene Ukun-Fuan, inklui ema Farizeu, ema Saduseu no eskriba sira. Ulun-naʼin relijiaun sira-neʼe lee beibeik Eskritura sira, maibé sira la hetan benefísiu. Jesus fó sai buat tolu neʼebé mane sira-neʼe presiza halo atu bele hetan benefísiu husi Eskritura sira. Ninia liafuan ba sira sei ajuda ita aumenta ita-nia matenek (1) atu komprende buat neʼebé ita lee, (2) atu buka rikusoin husi Bíblia, no (3) atu husik Maromak nia Liafuan fó influénsia ba ita-nia hahalok.

KOMPRENDE BUAT NEʼEBÉ ITA LEE

4. Lucas 10:25-29 hanorin saida mai ita kona-ba lee Maromak nia Liafuan?

⁴ Ita hakarak atu komprende buat neʼebé ita lee iha Bíblia. Se ita la komprende, karik ita sei la hetan benefísiu. Porezemplu, hanoin toʼok kona-ba Jesus nia liafuan ba “ema ida neʼebé hatene didiʼak Ukun-Fuan”. (Lee Lucas 10:25-29.) Bainhira ema neʼe husu Jesus saida mak nia presiza halo atu hetan moris ba nafatin, Jesus ajuda nia hetan resposta husi Eskritura sira hodi husu: “Ukun-Fuan dehan saida? Ó komprende oinsá?” Ema neʼe bele fó resposta neʼebé loos hodi temi fali eskritura sira kona-ba hadomi Maromak no hadomi ninia maluk. (Lev 19:18; Deut 6:5) Maibé tuirmai nia hatete: “Sé loos mak haʼu-nia maluk?” Ema neʼe hatudu katak nia ladún komprende buat neʼebé nia lee. Tan neʼe nia la hatene oinsá atu halo tuir eskritura sira-neʼe ho didiʼak.

5. Oinsá mak orasaun no lee ho neineik bele ajuda ita komprende liután Bíblia?

⁵ Ita bele komprende liután Bíblia bainhira ita haburas toman diʼak atu lee. Tuirmai mak sujestaun balu neʼebé bele ajuda Ita. Halo orasaun antes lee. Ita presiza Jeová nia ajuda atu bele komprende Eskritura sira, tan neʼe ita bele husu nia fó espíritu santu atu ajuda ita tau fokus ba buat neʼebé ita lee. Tuirmai lee ho neineik. Ida-neʼe sei ajuda Ita komprende buat neʼebé Ita lee. Karik Ita mós bele hetan benefísiu hodi lee ho lian ka rona tuir gravasaun áudio. Se Ita halo nuneʼe, neʼe bele ajuda Ita komprende, hanoin-hetan no aprende liután husi buat neʼebé Ita lee. (Jos 1:8) Bainhira lee hotu tiha, halo orasaun dala ida tan atu fó agradese ba Jeová tanba nia fó ninia Liafuan nuʼudar prezente no husu nia atu ajuda Ita aplika buat neʼebé Ita lee.

6. Tanbasá husu pergunta ba Ita-nia an no hakerek nota badak bele ajuda Ita? (Haree mós foto.)

⁶ Tuirmai mak sujestaun rua tan neʼebé bele ajuda Ita komprende liután Bíblia. Husu pergunta ba Ita-nia an kona-ba buat neʼebé Ita lee. Bainhira Ita lee istória ida iha Bíblia, husu: ‘Sé mak ema importante iha istória neʼe? Sé mak temi liafuan sira-neʼe? Nia koʼalia ba sé no tanbasá? Iha neʼebé no bainhira mak ida-neʼe akontese?’ Pergunta hanesan neʼe sei ajuda Ita hanoin no komprende ideia importante sira neʼebé Ita lee. Ita mós bele hakerek nota badak. Neʼe bele book Ita atu hanoin liután, ajuda Ita komprende liután no mós hanoin-hetan buat neʼebé Ita lee. Ita bele hakerek pergunta sira, pontu importante sira, buat neʼebé Ita aprende husi riset, oinsá Ita bele uza ida-neʼe, ka Ita sente oinsá ho buat neʼebé Ita lee. Bainhira Ita hakerek nota sira, neʼe bele ajuda Ita haree Bíblia nuʼudar Maromak nia mensajen ba Ita rasik.

7. Ita presiza halo saida bainhira ita lee no tanbasá? (Mateus 24:15)

⁷ Jesus fó sai buat seluk neʼebé ita presiza halo atu bele komprende buat neʼebé ita lee iha Bíblia, neʼe mak hanoin didiʼak ka haburas kbiit atu tetu didiʼak. (Lee Mateus 24:15.) “Hanoin didiʼak” iha eskritura neʼe katak sá? Neʼe refere ba kbiit atu komprende oinsá ideia sira liga malu, oinsá ideia ida la hanesan ho ideia seluk no mós komprende buat neʼebé la fó sai ho klaru. Jesus mós esplika katak ita presiza kbiit neʼe atu bele komprende oinsá akontesimentu sira kumpre Bíblia nia profesia. Ita mós presiza hanoin didiʼak atu bele hetan benefísiu husi buat hotu neʼebé ita lee iha Bíblia.

8. Oinsá mak ita bele lee no hanoin didiʼak?

⁸ Jeová fó kbiit atu tetu didiʼak ba ninia atan sira. Tan neʼe, halo orasaun ba nia no husu ninia ajuda atu haburas kbiit neʼe. (Prov 2:6) Oinsá mak Ita bele halo tuir Ita-nia orasaun? Analiza didiʼak buat neʼebé Ita lee, no hanoin oinsá ida-neʼe liga ho buat seluk neʼebé Ita hatene ona. Ita bele uza publikasaun sira hanesan Livru atu ajuda Testemuña ba Jeová buka informasaun. Publikasaun sira-neʼe bele ajuda Ita komprende didiʼak buat neʼebé Ita lee iha Bíblia no hatene oinsá Ita bele halo tuir. (Ebr 5:14) Bainhira Ita lee no hanoin didiʼak, neʼe sei ajuda Ita komprende Eskritura sira ho diʼak liután.

BUKA RIKUSOIN HUSI BÍBLIA

9. Lia-loos importante saida mak ema Saduseu la simu?

⁹ Ema Saduseu hatene didiʼak livru lima primeiru husi Eskritura Lian Ebraiku, maibé sira la simu lia-loos importante sira husi livru sira-neʼe. Porezemplu, hanoin toʼok kona-ba Jesus nia liafuan ba ema Saduseu neʼebé husu Jesus kona-ba moris-hiʼas. Jesus husu sira: “Imi seidauk lee istória neʼebé Moisés hakerek kona-ba ai-hun tarak neʼebé lakan ka? Maromak . . . dehan ba Moisés: ‘Haʼu mak Abraão nia Maromak, Isaac nia Maromak no Jacob nia Maromak.’” (Mc 12:18, 26) Maski ema Saduseu lee istória neʼe dala barak ona, maibé Jesus nia pergunta ba sira hatudu katak sira la simu lia-loos importante kona-ba moris-hiʼas.​—Mc 12:27; Lc 20:38.d

10. Ita presiza tau fokus ba saida bainhira ita lee?

¹⁰ Saida mak ita bele aprende? Bainhira ita lee, ita hakarak buka-hetan lisaun hotu neʼebé ita bele aprende husi versíkulu ida ka istória ida iha Bíblia. Ita lakohi buka deʼit hanorin báziku, maibé mós buka lia-loos no prinsípiu sira neʼebé kleʼan neʼebé subar hela hanesan rikusoin.

11. Tuir 2 Timóteo 3:16, 17, oinsá Ita bele hetan rikusoin husi Bíblia?

¹¹ Oinsá Ita bele hetan rikusoin husi Bíblia kuandu Ita lee? Hanoin toʼok buat neʼebé 2 Timóteo 3:16, 17 hatete. (Lee.) Versíkulu neʼe dehan katak “Eskritura hotu . . . diʼak” atu (1) hanorin, (2) fó konsellu, (3) halo loos buat hotu, no (4) fó dixiplina. Ita bele hetan benefísiu haat neʼe husi livru hotu iha Bíblia, inklui mós livru sira neʼebé Ita ladún uza beibeik. Analiza istória neʼebé Ita lee hodi buka-hatene ida-neʼe hanorin saida kona-ba Jeová, ninia hakarak ka kona-ba Bíblia nia prinsípiu sira. Hanoin kona-ba oinsá ida-neʼe diʼak atu fó konsellu. Ita bele halo nuneʼe liuhusi haree oinsá versíkulu neʼe ajuda Ita rekoñese no hasees an husi hanoin no toman neʼebé sala no kontinua laran-metin ba Jeová. Buka-hatene oinsá Ita bele uza versíkulu neʼe atu halo loos buat hotu ka korrije hanoin neʼebé sala, karik neʼe mak hanoin ruma neʼebé ema fó sai ba Ita bainhira Ita haklaken. No buka-hatene dixiplina husi versíkulu sira neʼebé bele treinu Ita atu iha hanoin hanesan Jeová nian. Bainhira Ita kontinua hanoin kona-ba buat haat neʼe, Ita sei hetan rikusoin neʼebé folin-boot.

HUSIK BÍBLIA FÓ INFLUÉNSIA BA ITA

12. Tanbasá Jesus husu ba ema Farizeu: “Imi seidauk lee?”

¹² Atu hatudu katak ema Farizeu iha hanoin sala kona-ba Eskritura sira, Jesus mós husu pergunta: “Imi seidauk lee?” (Mt 12:1-7)e Iha tempu neʼebá, ema Farizeu duun katak Jesus la halo tuir loron Sábadu. Atu hatán ba sira, Jesus temi ezemplu rua husi Eskritura no temi versíkulu husi livru Oseias neʼebé hatudu katak ema Farizeu la komprende tanbasá Jeová fó ukun-fuan kona-ba loron Sábadu no sira mós la hatudu laran-sadiʼa. Tanbasá Maromak nia Liafuan la fó influénsia ba sira? Tanba sira lee ida-neʼe ho objetivu atu kritika ka buka ema seluk nia sala no foti an. Sira-nia atitude hanetik sira atu komprende buat neʼebé sira lee.​—Mt 23:23; João 5:39, 40.

13. Ita presiza iha atitude saida kuandu lee Bíblia, no tanbasá?

¹³ Jesus nia liafuan hanorin katak ita presiza lee Bíblia ho atitude neʼebé loos. Ita lakohi sai hanesan ema Farizeu, ita presiza haraik an no prontu atu aprende. “Ho laran-maus”, ita tenke “simu Maromak nia liafuan neʼebé nia kuda daudaun”. (Tgo 1:21) Se ita laran-maus, ita sei husik Bíblia troka ita-nia hahalok. Ita presiza hasees an husi hahalok kritika ema no foti an atu nuneʼe ita bele hetan influénsia husi Bíblia nia hanorin kona-ba laran-sadiʼa, laran-diʼak no domin.

14. Oinsá ita bele hatene se ita husik Bíblia fó influénsia ba ita? (Haree mós foto.)

¹⁴ Dalan neʼebé ita trata ema seluk bele hatudu sai se ita husik Bíblia fó influénsia ba ita. Ema Farizeu la husik Eskritura sira atu book sira-nia laran, tan neʼe sira “tesi-lia ba sira neʼebé la halo sala”. (Mt 12:7) Ita-nia hanoin kona-ba ema seluk no dalan neʼebé ita trata sira mós bele hatudu sai se ita husik Bíblia troka ita-nia hahalok. Porezemplu, ita toman atu gaba ema seluk nia hahalok diʼak ka ita toman atu koʼalia deʼit kona-ba sira-nia fraku? Ita hatudu laran-sadiʼa no prontu atu perdua ema ka ita kritika ema no rai hirus ba sira? Ita-nia resposta bele hatudu se ita husik buat neʼebé ita lee atu fó influénsia ba ita-nia hanoin, sentimentu no hahalok.​—1 Tim 4:12, 15; Ebr 4:12.

LEE BÍBLIA LORI KONTENTE

15. Jesus sente oinsá kona-ba Eskritura Sagrada?

¹⁵ Jesus hafolin tebes Eskritura Sagrada. Salmo 40:8 fó sai nanis kona-ba Jesus nia sentimentu ba Maromak nia Liafuan: “Oh haʼu-nia Maromak, haʼu gosta tebes atu halo tuir Ita-nia hakarak, no Ita-nia ukun-fuan iha haʼu-nia fuan-laran.” Tan neʼe, Jesus kontente no kontinua serbí Jeová. Ita mós bele moris kontente no kontinua serbí Jeová se ita hakaʼas an atu lee Bíblia no aprende atu hafolin ida-neʼe.​—Sal 1:1-3.

16. Ita hakarak halo saida atu hetan benefísiu liután husi lee Bíblia? (Haree kaixa “Jesus nia liafuan bele ajuda Ita komprende buat neʼebé Ita lee”.)

¹⁶ Mai ita halo tuir Jesus nia liafuan no ezemplu hodi aumenta ita-nia matenek atu lee Bíblia. Ita bele komprende liután istória sira iha Bíblia hodi halo orasaun, lee ho neineik, husu pergunta sira no hakerek nota badak. Ita bele komprende buat neʼebé ita lee hodi uza ita-nia publikasaun sira atu analiza ida-neʼe. Ita bele aprende atu uza Bíblia ho diʼak liután liuhusi buka rikusoin husi eskritura sira, inklui mós husi versíkulu sira neʼebé ita ladún uza beibeik. No ita bele husik Bíblia fó influénsia ba ita hodi iha atitude neʼebé loos bainhira ita lee. Bainhira ita hakaʼas an atu halo buat sira-neʼe, ita sei hetan benefísiu liután husi lee Bíblia no hakbesik liután ba Jeová.​—Sal 119:17, 18; Tgo 4:8.