“Proteje imi-nia neon no matan-moris bá!”

1. Jesus hatete saida ba ninia dixípulu sira kona-ba bainhira “mundu neʼe nia rohan” sei mai no nia fó avizu saida ba sira?

LORON balu antes Jesus mate, ninia dixípulu naʼin-haat husu ba nia: “Sinál saida mak sei hatudu katak . . . mundu neʼe nia rohan mai ona?” (Mt 24:3) Karik dixípulu sira hanoin kona-ba oinsá sira bele hatene bainhira mak Jeruzalein no ninia templu sei lakon. Jesus hatán hodi fó sai kona-ba oinsá Jeruzalein no ninia templu sei lakon, no mós “mundu neʼe nia rohan”, no agora ita hela iha tempu neʼe. Kona-ba bainhira mundu nia rohan sei mai, Jesus hatete: “Kona-ba loron ka oras, ema ida la hatene, anju sira iha lalehan la hatene no Oan-Mane mós la hatene, só Aman deʼit mak hatene.” Tuirmai nia fó avizu ba ninia dixípulu sira atu “matan-moris nafatin bá”.​—Mc 13:32-37.

2. Tanbasá ema Kristaun iha apóstolu sira-nia tempu presiza matan-moris nafatin?

² Ema Kristaun Judeu iha apóstolu sira-nia tempu tenke kontinua matan-moris atu sira bele hetan salvasaun. Jesus fó-hatene ba ninia dixípulu kona-ba buat neʼebé sei akontese bainhira Jeruzalein no ninia templu besik atu lakon. Nia hatete: “Bainhira imi haree tropa sira haleʼu Jeruzalein, imi hatene bá katak sidade neʼe besik ona atu lakon.” Iha tempu neʼebá, sira presiza halo tuir Jesus nia avizu no “halai ba foho”. (Lc 21:20, 21) Ema neʼebé halo tuir la mate bainhira tropa Roma halakon Jeruzalein.

3. Iha lisaun neʼe, ita sei aprende saida?

³ Ita moris iha mundu aat neʼe nia rohan. Tan neʼe ita tenke proteje ita-nia neon no matan-moris nafatin. Iha lisaun neʼe, ita sei aprende oinsá ita bele kontinua iha hanoin neʼebé balansu bainhira haree akontesimentu sira iha mundu, oinsá atu kuidadu ita-nia an no oinsá atu uza didiʼak ita-nia tempu antes mundu nia rohan toʼo mai.

IHA BALANSU BAINHIRA ITA HAREE AKONTESIMENTU SIRA

4. Tanbasá ita interese kona-ba oinsá akontesimentu sira iha mundu kumpre Bíblia nia profesia?

⁴ Ita iha razaun diʼak atu buka-hatene oinsá akontesimentu sira iha mundu kumpre Bíblia nia profesia. Porezemplu, Jesus fó-hatene ita kona-ba akontesimentu espesífiku atu ajuda ita hatene bainhira Satanás nia sistema nia rohan besik ona atu mai. (Mt 24:3-14) Apóstolu Pedro anima ita atu hanoin didiʼak kona-ba oinsá profesia sira sai loos atu ita-nia fiar bele metin nafatin. (2 Ped 1:19-21) Livru ikus iha Bíblia hahú hodi hatete: “Tuirmai neʼe mak liafuan kona-ba buat neʼebé Jesus Kristu hatudu sai ona. Jesus simu buat sira-neʼe husi Maromak, atu nuneʼe nia bele hatudu sai ba Maromak nia atan sira kona-ba buat neʼebé lakleur tan tenke akontese.” (Apok 1:1) Tan neʼe ita hakarak hatene kona-ba akontesimentu iha mundu no oinsá ida-neʼe karik kumpre Bíblia nia profesia. No karik ita mós hakarak atu koʼalia hamutuk ho maluk sira kona-ba akontesimentu sira-neʼe.

5. Ita presiza hakaʼas an atu la halo saida, maibé ita presiza halo saida? (Haree mós foto sira.)

⁵ Maibé bainhira ita koʼalia kona-ba Bíblia nia profesia, ita labele siʼik deʼit saida mak sei akontese. Tanbasá? Ita lakohi fó sai buat neʼebé bele halakon unidade iha kongregasaun. Porezemplu, karik ita rona ulun-naʼin sira koʼalia kona-ba oinsá sira sei halakon funu ruma no lori dame no hakmatek. Duké siʼik deʼit katak sira-nia liafuan kumpre profesia iha 1 Tesalónika 5:3, ita presiza buka-hatene informasaun foun liu husi Jeová nia organizasaun. Bainhira ita-nia diskusaun ho maluk sira bazeia ba ita-nia publikasaun sira, ita ajuda kongregasaun atu iha unidade no “iha hanoin neʼebé hanesan”.​—1 Kor 1:10; 4:6.

6. Ita bele aprende saida husi 2 Pedro 3:11-13?

⁶ Lee 2 Pedro 3:11-13. Apóstolu Pedro ajuda ita atu hanoin kona-ba tanbasá ita presiza estuda Bíblia nia profesia. Nia anima ita atu “hanoin-hetan nafatin kona-ba Jeová nia loron neʼebé atu mai”. Tanbasá? Laʼós tanba ita hakarak buka-hatene “loron no oras” neʼebé Armagedon sei toʼo mai, maibé tanba ita hakarak uza tempu neʼebé sei iha atu “hatudu hahalok santu no laran-metin ba Maromak”. (Mt 24:36; Lc 12:40) Neʼe katak ita hakarak hatudu hahalok diʼak no hakaʼas an atu serbí Jeová tanba hadomi nia. Atu bele halo ida-neʼe, ita presiza kuidadu didiʼak ita-nia an.

KUIDADU DIDIʼAK ITA-NIA AN KATAK SÁ?

7. Oinsá ita bele hatudu katak ita kuidadu didiʼak ita-nia an? (Lucas 21:34)

⁷ Jesus mós haruka ninia dixípulu sira atu kuidadu didiʼak sira-nia an. Nia fó sai ida-neʼe ho klaru iha Lucas 21:34. (Lee.) Jesus hatete: “Kuidadu didiʼak imi-nia an bá.” Ema neʼebé kuidadu didiʼak ninia an sei matan-moris kona-ba perigu sira neʼebé bele estraga ninia relasaun diʼak ho Jeová no nia halo hakat oioin atu hasees an. Hodi halo nuneʼe, nia kontinua hela iha Maromak nia domin.​—Prov 22:3; Jud 20, 21.

8. Apóstolu Paulo haruka ema Kristaun atu halo saida?

⁸ Apóstolu Paulo haruka ema Kristaun atu haree didiʼak sira-nia hahalok. Porezemplu, nia hatete ba ema Kristaun iha Éfeso: “Kontinua haree didiʼak oinsá imi halaʼo imi-nia moris, atu imi la moris nuʼudar ema beik maibé nuʼudar ema matenek.” (Éf 5:15, 16) Satanás sempre koko atu estraga ita-nia relasaun diʼak ho Jeová, tan neʼe Bíblia haruka ita atu “kontinua buka-hatene saida mak Jeová hakarak” ita atu halo hodi bele proteje ita-nia an husi Satanás nia ataka.​—Éf 5:17.

9. Oinsá ita bele buka-hatene Jeová nia hakarak?

⁹ Bíblia la fó sai perigu hotu neʼebé bele estraga ita-nia relasaun diʼak ho Jeová. Dala barak ita presiza halo desizaun kona-ba buat neʼebé Bíblia la temi ho espesífiku. Atu bele halo desizaun ho matenek, ita presiza buka-hatene Jeová nia hakarak ba ita. Ita bele halo nuneʼe liuhusi estuda no medita beibeik Bíblia. Bainhira ita komprende liután Jeová nia hakarak no hakaʼas an atu “iha Kristu nia hanoin”, neʼe sei ajuda ita moris nuʼudar ema matenek, maski la iha regra espesífiku kona-ba situasaun ruma. (1 Kor 2:14-16) Dala ruma fasil deʼit atu rekoñese perigu ruma neʼebé ita presiza hasees an, maibé dala ruma susar.

10. Ita presiza hasees an husi perigu saida?

¹⁰ Perigu balu neʼebé ita presiza hasees an inklui oin-moris ba ema seluk, hemu tua barak demais, han barak demais, koʼalia hodi hakanek ema seluk nia laran, no mós atividade halimar nian neʼebé hatudu violénsia, pornografia no buat seluk hanesan neʼe. (Sal 101:3) Ita-nia inimigu Diabu sempre buka oportunidade atu estraga ita-nia relasaun diʼak ho Jeová. (1 Ped 5:8) Se ita la matan-moris nafatin, Satanás bele kuda sentimentu hanesan laran-moras, la onestu, kaan-teen, odi, foti an no rai odi iha ita-nia neon no laran. (Gal 5:19-21) Karik foufoun ita hanoin katak sentimentu sira-neʼe ladún perigu. Maibé se ita la fokit sai kedas sentimentu sira-neʼe, neʼe sei kontinua moris hanesan ai-horis venenu no hamosu problema.​—Tgo 1:14, 15.

11. Saida mak perigu ida neʼebé susar atu rekoñese no ita tenke hasees an?

¹¹ Perigu ida neʼebé susar atu rekoñese mak ransu neʼebé la diʼak. Hanoin toʼok situasaun neʼe. Ita serbisu hamutuk ho ema ida neʼebé laʼós Testemuña. Ita hakarak ita-nia kolega serbisu atu iha hanoin neʼebé diʼak kona-ba Testemuña sira, tan neʼe Ita hatudu laran-diʼak no sempre prontu atu ajuda nia. Dala ruma Ita mós han-meiudia ho nia. Lakleur, Ita halo ida-neʼe beibeik. Dala ruma nia komesa koʼalia kona-ba buat neʼebé la morál, no foufoun Ita la gosta atu rona. Maibé ikusmai, Ita sai toman no la preokupa tan ho ida-neʼe. Loron ida, nia konvida Ita atu hemu tua hamutuk depois serbisu no Ita konkorda. Ikusmai, Ita komesa iha hanoin neʼebé hanesan nia. Se Ita la kuidadu, lakleur deʼit, Ita mós sei komesa halo buat neʼebé nia halo. La sala atu hatudu respeitu no laran-diʼak ba ema hotu, maibé ita tenke hanoin-hetan katak ita sei hetan influénsia husi ema neʼebé ita ransu beibeik. (1 Kor 15:33) Se ita halo tuir Jesus nia liafuan no kuidadu didiʼak ita-nia an, ita sei la ransu ho ema neʼebé la moris tuir Jeová nia matadalan. (2 Kor 6:15) Ita sei haree perigu neʼe no hasees an.

UZA DIDIʼAK ITA-NIA TEMPU

12. Jesus nia dixípulu sira presiza halo saida nuʼudar sira hein ba sistema nia rohan?

¹² Jesus hakarak ninia dixípulu atu sai okupadu nuʼudar sira hein ba sistema nia rohan. Jesus fó serbisu ba sira atu halo. Nia haruka sira atu haklaken liafuan diʼak “iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu”. (Após 1:6-8) Jesus nia dixípulu iha serbisu barak atu halo! Sira bele uza didiʼak sira-nia tempu hodi hakaʼas an atu haklaken ba ema.

13. Tanbasá ita presiza uza didiʼak ita-nia tempu? (Koloso 4:5)

¹³ Lee Koloso 4:5. Atu bele kuidadu didiʼak ita-nia an, ita presiza hanoin didiʼak kona-ba oinsá ita uza ita-nia tempu. “Situasaun neʼebé mosu derrepente deʼit” bele kona ita hotu. (Ecle 9:11) Ita bele mate derrepente deʼit.

14-15. Oinsá ita bele uza didiʼak ita-nia tempu? (Ebreu 6:11, 12) (Haree mós foto.)

¹⁴ Ita bele uza didiʼak ita-nia tempu hodi halo Jeová nia hakarak no hametin ita-nia relasaun diʼak ho nia. (João 14:21) Ita presiza “laran-metin bá, no hamriik metin bá, no sai badinas nafatin iha Naʼi nia serbisu”. (1 Kor 15:58) Se ita halo nuneʼe, bainhira ita besik mate ka mundu nia rohan toʼo mai, ita sei la arrepende dalan neʼebé ita uza ita-nia tempu.​—Mt 24:13; Rom 14:8.

¹⁵ Ohin loron, Jesus kontinua dirije ninia dixípulu sira nuʼudar sira haklaken kona-ba Maromak nia Ukun iha mundu tomak. Nia kumpre ninia promesa. Liuhusi Jeová nia organizasaun, Jesus treinu ita oinsá atu haklaken no fó ba ita ekipamentu oioin neʼebé ita presiza atu haklaken. (Mt 28:18-20) Ita presiza halo ita-nia parte hodi haklaken no hanorin ho badinas no mós kontinua matan-moris nuʼudar ita hein ba Jeová atu halakon mundu aat neʼe. Hodi halo tuir konsellu iha Ebreu 6:11, 12, ita sei kaer metin ba ita-nia esperansa “toʼo rohan”.​—Lee.

16. Ita hakarak hakaʼas an atu halo saida?

¹⁶ Jeová hili ona loron no oras atu halakon Satanás nia sistema. Bainhira loron neʼe toʼo mai, Jeová sei kumpre profesia hotu neʼebé nia fó sai. Dala ruma ita hanoin katak mundu nia rohan demora. Maibé Jeová nia loron “sei la tarde”! (Hab 2:3) Tan neʼe, mai ita hakaʼas an atu “kontinua hein ba Jeová” no “hein ho pasiénsia ba Maromak neʼebé salva [ita]”.​—Miq 7:7.