Oinsá mak ita bele hein ho pasiénsia?

1. Saida mak bele halo ita lakon ita-nia pasiénsia?

IHA tinan 1914, kuandu Kristu sai Liurai, loron ikus sira husi Satanás nia mundu komesa ona. Iha tinan neʼe, funu ida hahú iha lalehan no Jesus soe tun Diabu no ninia anju aat sira ba rai. (Lee Apokalipse 12:7-9.) Satanás hatene katak ninia “loron sira toʼo ona rohan”. (Apokalipse 12:12) Maibé loron sira-neʼe naruk liu fali buat neʼebé karik ita uluk hanoin. Tan neʼe, ita lakon pasiénsia ona ka lae nuʼudar ita hein ba Jeová atu halakon Satanás nia mundu neʼe?

2. Lisaun neʼe sei hatán pergunta saida deʼit?

² Se ita lakon pasiénsia, ida-neʼe bele perigu ba ita. Tanbasá? Tanba se ita la iha pasiénsia, karik ita bele halo buat ruma hodi la hanoin didiʼak uluk. Tan neʼe, saida mak bele ajuda ita atu hatudu pasiénsia nafatin? Lisaun neʼe sei ajuda ita hodi hatán pergunta sira tuirmai neʼe. (1) Saida mak ita bele aprende kona-ba pasiénsia husi profeta Miquéias nia ezemplu? (2) Akontesimentu saida deʼit mak sei hatudu katak mundu nia rohan besik ona? (3) Oinsá mak ita bele hatudu katak ita agradese ba Jeová nia pasiénsia?

SAIDA MAK ITA APRENDE HUSI MIQUÉIAS NIA EZEMPLU?

3. Durante Miquéias nia tempu, situasaun iha Israel mak oinsá?

³ Jeová nia profeta Miquéias haree ema Israel nia hahalok neʼebé la hatudu laran-metin ba Jeová no durante Liurai Acaz nia ukun, sira sai aat liu. (Miquéias [Mikha] 7:2-6) Miquéias kompara ema Israel hanesan ai-tarak neʼebé bele hakanek ema. Sira hanesan ai-tarak neʼe tanba sira trata aat ema seluk. Sira-nia situasaun aat tebes hodi halo ema iha família laran mós la hadomi malu ona. Miquéias hatene katak nia rasik la bele troka sira-nia situasaun, tan neʼe nia halo orasaun ba Jeová ho laran. Depois, nia hein ho pasiénsia ba Maromak atu hadiʼa. Miquéias la iha dúvida katak Jeová sei hadiʼa situasaun tuir Ninia tempu rasik.

4. Ita hasoru susar saida deʼit?

⁴ Hanesan Miquéias, ita mós hela iha ema sira-nia leet neʼebé hanoin an deʼit. Ema barak “la hatene fó-agradese, la hatene Maromak; la hatene sadiʼa maluk”. (2 Timoteo 3:2, 3) Kuandu kolega iha eskola, serbisu-fatin ka viziñu sira hatudu hahalok hanoin an deʼit, ida-neʼe bele halo ita sente estrese iha ita-nia moris. Maibé ita balu hasoru susar neʼebé boot liu fali ida-neʼe. Jesus hatete katak ninia dixípulu sira sei hetan terus husi sira-nia família rasik. Ninia liafuan sira-neʼe atu hanesan ho buat neʼebé ita lee iha Miquéias 7:6. Jesus hatete: “Basá haʼu mai atu haketak oan-mane husi nia aman, oan-feto husi nia inan no feto-foun husi nia banin-feto, hodi halo ema nia parente sira rasik sai ninia funu-balun.” (Mateus 10:35, 36) Susar tebes kuandu ita-nia família neʼebé la adora Jeová goza no kontra ita. Se ita hasoru situasaun hanesan neʼe, la bele rende an. Ita tenke laran-metin nafatin ba Jeová no hein ho pasiénsia ba nia atu hadiʼa situasaun. Se ita halo orasaun nafatin ba Jeová atu hetan ajuda, nia sei fó kbiit no matenek neʼebé ita presiza atu laran-metin nafatin ba nia.

5, 6. Oinsá mak Jeová fó bensaun ba Miquéias? Saida mak Miquéias la haree durante ninia moris?

⁵ Jeová fó bensaun ba Miquéias tanba ninia pasiénsia. Miquéias sei iha kuandu Liurai Acaz nia ukun ramata. Nia mós haree Acaz nia oan Ezequias sai liurai neʼebé diʼak no ajuda ema Israel atu harii fali adorasaun neʼebé loos. Miquéias mós haree oinsá buat neʼebé nia hakerek nanis kona-ba Samaria sai loos kuandu ema Asíria ataka parte norte iha nasaun Israel.—Miquéias (Mikha) 1:6.

⁶ Maibé Miquéias mate antes nia seidauk haree buat hotu neʼebé nia hakerek nanis sai loos. Porezemplu, Miquéias hakerek: “No sei mosu duni iha loron sira-nia rohan, katak foho, uma Jeová nian, sei hamriik metin aas liu fali foho sira seluk, no loloos sei sai aas liu fali foho sira, no ema sei laʼo nadodon ba neʼebá. Nasaun barak sei bá duni no dehan: ‘Mai, imi hotu, no mai ita saʼe ba Jeová nia foho.’” (Miquéias [Mikha] 4:1, 2) Miquéias hakaʼas an duni atu laran-metin nafatin ba Jeová toʼo nia mate, maski ema seluk la halo ida-neʼe. Nia hakerek: “Ba ema hotu, sira sei laʼo ho sira ida-idak nia maromak nia naran, maibé ba ita, ita sei laʼo iha Jeová ita-nia Maromak nia naran ba tempu neʼebé la bele sura, no ba nafatin.” (Miquéias [Mikha] 4:5) Miquéias hein ho pasiénsia durante tempu neʼebé susar, tanba nia fiar metin katak Jeová sei kumpre ninia promete hotu. Sin, profeta Miquéias tau ninia fiar metin ba Jeová.

7, 8. (a) Tanbasá mak ita bele tau fiar ba Jeová? (b) Atu sente katak tempu liu lalais, ita sei halo saida?

⁷ Ita mós tau fiar ba Jeová hanesan Miquéias ka lae? Iha razaun diʼak atu halo nuneʼe. Tanbasá? Tanba ita haree Miquéias nia liafuan sai loos. Durante loron ikus sira-neʼe, ema rihun ba rihun husi nasaun, língua no rasa oioin mai toʼo ‘foho uma Jeová nian’. Maski sira husi nasaun oioin neʼebé halo funu hasoru malu, maibé fiar-naʼin sira-neʼe “baku sira-nia surik sai ai-suak” no sira “la aprende tan funu”. (Miquéias [Mikha] 4:3) Loos duni, hodi sai Maromak Jeová nia povu neʼebé iha dame mak buat neʼebé espesiál tebes!

⁸ Ita hotu hakarak Jeová atu halakon mundu aat neʼe. Maibé atu ita bele hein ho pasiénsia, ita presiza hanoin iha dalan neʼebé Jeová hanoin. Nia hili ona Jesus Kristu atu tesi lia ba ema, no nia mós hili ona loron atu halo ida-neʼe. (Apostolu 17:31) Maibé antes toʼo tempu neʼe, Maromak fó oportunidade ba ema hotu atu “simu matenek kona-ba lia-loos”, no atu halo tuir buat neʼebé sira aprende hodi sira bele hetan salvasaun. Ita la bele haluha katak ema nia moris iha perigu laran. (Lee 1 Timoteo 2:3, 4.) Lakleur tan, mundu neʼe sei ramata. Se ita badinas nafatin hodi ajuda ema atu aprende kona-ba Jeová, ita sei sente katak tempu liu lailais deʼit. No kuandu mundu neʼe ramata, ita sei kontente katak ita uza ita-nia tempu iha serbisu haklaken!

AKONTESIMENTU SAIDA DEʼIT MAK HATUDU KATAK MUNDU ATU RAMATA?

9-11. Liafuan iha 1 Tesalonika 5:3 kumpre ona ka seidauk? Esplika toʼok.

⁹ Lee 1 Tesalonika 5:1-3. Lakleur tan, nasaun sira sei fó avizu hodi hatete: “Loron sira-neʼe hakmatek no iha dame.” Ita presiza ‘matan-moris nafatin no oin-moos’ hodi liafuan sira-neʼe la lohi ita. (1 Tesalonika 5:6) Mai ita koʼalia kona-ba buat balu neʼebé akontese ona neʼebé hatudu katak lakleur tan ema sei fó sai avizu neʼe.

¹⁰ Depois Funu Mundiál Primeiru no Segundu, nasaun sira hakarak tebes iha dame. Sira harii “Liga Nasaun sira-nian” depois Funu Mundiál Primeiru hodi bele lori dame. Kuandu Funu Mundiál Segundu ramata ona, ema espera katak “Nasoins Unidas” mak sei lori dame. Governu sira no ulun-naʼin relijiaun sira tau fiar ba organizasaun rua neʼe. Porezemplu, iha tinan 1986 Nasoins Unidas fó sai katak tinan neʼe mak Tinan ba Dame Internasionál. Iha tinan neʼe, ulun-naʼin polítiku no relijiaun nian hasoru malu ho Igreja Katólika nia ulun-naʼin atu halo orasaun ba dame.

¹¹ Maibé, laʼós Tinan ba Dame Internasionál no avizu seluk neʼebé ema fó sai mak kumpre profesia iha 1 Tesalonika 5:3 kona-ba “loron sira-neʼe hakmatek no iha dame”. Tanbasá? Tanba akontesimentu neʼebé Bíblia bolu nuʼudar “buat aat sira” seidauk mosu.

12. Saida mak ita hatene kona-ba avizu katak “loron sira-neʼe hakmatek no iha dame”?

¹² Sé mak sei fó sai avizu kona-ba loron sira neʼebé ‘hakmatek no dame’? Oinsá mak ulun-naʼin relijiaun kristaun nian no relijiaun sira seluk neʼebé falsu sei hola parte iha avizu neʼe? Oinsá mak governu sira sei hola parte? Bíblia la dehan. Maibé buat neʼebé ita hatene mak, maski ema fó sai avizu neʼe ho fiar-metin, maibé tuir loloos, tempu neʼe sei la iha hakmatek no dame. Iha tempu neʼebé avizu neʼe fó sai, Satanás sei kontrola nafatin mundu. Mundu neʼe sai aat loos no ema la bele troka ona sistema neʼe. Triste tebes se ita fiar ba Satanás nia lia-bosok neʼe hodi apoia buat polítiku nian!

13. Tanbasá mak anju sira hein atu husik ‘anin raiklaran nian’?

¹³ Lee Apokalipse 7:1-4. Nuʼudar ita hein ba liafuan iha 1 Tesalonika 5:3 atu sai loos, anju sira ‘kaer anin raiklaran nian’ hodi terus boot seidauk bele hahú. Anju sira-neʼe hein ba saida? Apóstolu João hakerek katak Maromak nia atan sira neʼebé hetan kose-mina tenke simu sinál ikus.a (Haree nota iha kraik.) Kuandu ida-neʼe akontese ona, anju sira sei husik ‘anin raiklaran nian’. Depois neʼe, saida mak sei akontese?

14. Oinsá mak ita hatene katak lakleur tan Babilónia Boot sei lakon?

¹⁴ Babilónia Boot, katak relijiaun falsu hotu, sei lakon. No kuandu Babilónia Boot lakon ona, ema ida la bele halo buat ida atu ajuda. Ita bele haree ona katak lakleur tan ida-neʼe sei akontese. (Apokalipse 16:12; 17:15-18; 18:7, 8, 21) Agora ita haree katak ema neʼebé apoia relijiaun sai menus ona. Dala ruma mós notísias fó sai katak ema kritika relijiaun no nia ulun-naʼin sira. Maski nuneʼe, relijiaun nia ulun-naʼin sira sente seguru hela. Maibé sira hanoin mak sala duni. Tanba depois ema fó sai avizu kona-ba loron sira neʼebé ‘hakmatek no dame’, derrepente deʼit governu sira sei ataka relijiaun falsu no halakon kedas. Neʼe katak Babilónia Boot sei lakon ba nafatin! Ita hakarak hein ho pasiénsia ba akontesimentu neʼe, loos ka lae?—Apokalipse 18:8, 10.

OINSÁ MAK ITA HATUDU AGRADESE BA JEOVÁ NIA PASIÉNSIA?

15. Tanbasá mak Jeová hein ho pasiénsia?

¹⁵ Maski ema la hatudu respeitu ba Jeová nia naran, maibé nia hein ho pasiénsia ba tempu neʼebé loos. Jeová lakohi ema laran-moos ida atu mate. (2 Pedro 3:9, 10) Ita mós sente hanesan neʼe ka lae? Antes mundu neʼe ramata, ita bele hatudu ita-nia agradese ba Maromak nia pasiénsia iha dalan tuirmai neʼe.

16, 17. (a) Tanbasá mak diʼak atu ajuda ema neʼebé para ona atu serbí Jeová? (b) Agora, tanbasá mak importante ba ema hanesan neʼe atu fila ba Jeová?

¹⁶ Ajuda ema neʼebé para ona atu serbí Jeová. Jesus hatete katak lalehan haksolok kuandu bibi ida neʼebé lakon, hetan fila fali. (Mateus 18:14; Lucas 15:3-7) Jeová hanoin tebes ema hotu neʼebé uluk hatudu katak sira hadomi nia, maski sira agora daudaun la serbí ona nia. Jeová no anju sira kontente tebes kuandu ita ajuda ema atu fila fali ba Jeová.

¹⁷ Ita mak ema ida neʼebé agora daudaun la serbí Jeová ka lae? Karik Ita para atu tuir reuniaun sira tanba ema ida iha kongregasaun hakanek Ita-nia laran. Agora, karik tempu balu liu ona. Husu ba Ita-nia an: ‘Agora, haʼu kontente no haʼu-nia moris diʼak liu fali uluk ka lae? Sé mak ida neʼebé halo haʼu laran-kanek, Jeová ka ema neʼebé sala-naʼin? Maromak Jeová halo buat ruma atu hakanek haʼu-nia laran ka lae?’ Tuir loloos, Maromak Jeová sempre halo buat neʼebé diʼak ba ita. Maski karik agora ita ladún kumpre ita-nia promesa atu serbí nia, maibé Jeová nafatin fó buat neʼebé diʼak ba ita. (Tiago 1:16, 17) Maibé, lakleur tan, Jeová nia loron sei toʼo mai. Agora mak tempu atu fila fali ba ita-nia Aman Jeová, no fila fali ba kongregasaun tanba neʼe mak fatin neʼebé seguru liu iha loron ikus sira-neʼe.—Deuteronômio (Ulangan) 33:27; Ebreu 10:24, 25.

18. Tanbasá mak ita tenke apoia sira neʼebé dirije ita?

¹⁸ Apoia sira neʼebé iha responsabilidade atu tau matan ba kongregasaun. Nuʼudar Bibi-Atan, Jeová dirije ita no proteje ita. Nia foti Jesus atu sai bibi-atan nuʼudar sira-nia ulun neʼebé boot. (1 Pedro 5:4) Katuas sira iha kongregasaun hamutuk 100.000 liu uza sira-nia tempu atu tau matan ba Maromak nia bibi sira. (Apostolu 20:28) Hodi apoia katuas sira neʼebé dirije ita, ita hatudu katak ita agradese ba Jeová no Jesus ba buat hotu neʼebé sira halo mai ita.

19. Saida mak ita bele halo hodi hakbesik ba malu?

¹⁹ Hakbesik liután ba ita-nia maluk kristaun sira. Neʼe katak sá loos? Hanoin toʼok kona-ba ezemplu neʼe. Kuandu soldadu sira iha tropa ida hetan ataka husi sira-nia inimigu, soldadu sira hamriik rabat malu hodi la husik fatin mamuk iha sira-nia leet. Se sira defende an hanesan neʼe, la fasil ba inimigu atu ataka sira. Satanás hakaʼas an atu ataka Maromak nia povu. Tan neʼe, duké kontra hasoru ita-nia maluk, ita presiza sai besik liután ho sira. Ita mós lakohi haree deʼit ba ita-nia maluk sira-nia sala, no nafatin tau fiar ba Jeová.

20. Agora saida mak ita tenke halo?

²⁰ Nuneʼe, mai ita nafatin iha relasaun neʼebé metin ho Maromak Jeová no hein ho pasiénsia. Ita sei hein ba tempu neʼebé ema sei fó avizu kona-ba loron sira neʼebé “hakmatek no iha dame” no hein ba ema kose-mina sira atu simu sinál ikus. Depois neʼe, anju haat sei husik anin raiklaran nian hodi halakon Babilónia Boot. Nuʼudar ita hein ba akontesimentu sira-neʼe, mai ita halo tuir matadalan neʼebé ita simu husi sira neʼebé iha knaar atu dirije ita iha Jeová nia organizasaun. Hakbesik ba maluk kristaun sira hodi defende an hasoru Satanás no anju aat sira. Agora mak tempu atu halo tuir konsellu neʼebé bele hetan iha Salmo (Mazmur) 31:24: “Aten-brani bá, no halo imi-nia laran metin bá, imi hotu neʼebé hein ba Jeová.”