Banati-tuir profeta sira—Miquéias
1. Karik Miquéias hanoin kona-ba pergunta saida? Maibé tanbasá mak buat neʼebé nia haklaken la saugati deʼit?
1 ‘Bainhira mak mundu aat neʼe nia rohan sei toʼo mai?’ Karik profeta Miquéias mós husu pergunta neʼebé hanesan nuʼudar nia haklaken kona-ba Maromak Jeová nia mensajen tesi-lia nian hasoru Izraél nia suku sanulu no rai-Judá. Maibé, klaru katak buat neʼebé nia haklaken la saugati deʼit. Iha tinan 740 molok Kristu, kuandu Miquéias sei moris hela, Jeová kumpre ninia liafuan neʼebé nia fó sai hasoru rai-Samaria. (Miquéias [Mikha] 1:6, 7) No tuirmai, iha tinan 607 molok Kristu, Jeruzalein mós naksobu. (Miquéias [Mikha] 3:12) Oinsá mak ita bele banati-tuir Miquéias nia ezemplu nuʼudar ita hein ba loron neʼebé Jeová sei tesi lia ba mundu aat neʼe?
2. Oinsá mak ita bele hatudu pasiénsia nuʼudar ita hein ba Jeová nia loron? Tanbasá?
2 Hatudu pasiénsia: Miquéias dehan: “Kona-ba haʼu, haʼu sei hein nafatin ba Jeová. Ho pasiénsia haʼu sei hein ba Maromak neʼebé salva haʼu.” (Miquéias [Mikha] 7:7) Tuir loloos, Miquéias la tuur nonook deʼit hodi hein toʼo Jeruzalein naksobu. Nia kontinua sai okupadu nuʼudar Jeová nia profeta ida. Entaun, nuʼudar ita hein ba Jeová nia loron, ita mós tenke hola parte iha ‘hahalok santu no hatudu katak ita serbí Maromak ho laran-metin’. (2 Pedro 3:11, 12, MF) Jeová hatudu pasiénsia hodi fó tempu ba ema atu arrepende an. (2 Pedro 3:9) Tan neʼe, ita hakarak duni atu simu Maromak nia konsellu atu banati-tuir profeta Miquéias hodi hatudu pasiénsia.—Tiago 5:10.
3. Tanbasá mak ita tenke husu Maromak Jeová kona-ba ninia espíritu santu?
3 Sadere ba Jeová nia kbiit: Maski Miquéias halaʼo knaar neʼebé susar, maibé nia sadere ba Jeová atu hetan kbiit hodi kumpre ninia knaar. (Miquéias [Mikha] 3:8) Tuir loloos, Jeová hatene katak ita presiza kbiit, tan neʼe mak ninia Liafuan haruka ita atu sadere ba nia hodi hetan kbiit. Nia ho laran-luak fó kbiit ba ema sira neʼebé sente kole atu sira bele kumpre sira-nia serbisu ba Maromak. (Salmo [Mazmur] 84:5, 7; Isaías [Yesaya] 40:28-31) Ita rasik sente ona katak Jeová fó kbiit mai ita nuʼudar ita halaʼo ita-nia knaar ka lae? Ita sempre husu ba Jeová atu hetan ajuda husi ninia espíritu santu neʼebé iha kbiit boot ka lae?—Lucas 11:13.
4. Oinsá mak Miquéias nia ezemplu bele ajuda ita ohin loron?
4 Iha profeta Miquéias nia moris tomak, nia tau uluk ninia serbisu atu halaʼo Jeová nia hakarak. Nia hakaʼas an atu laran-metin ba Maromak maski ema sira neʼebé haleʼu nia mak aat tebes. Nuneʼe mós ho ita agora, loron-loron ita sempre hetan koko kona-ba ita-nia laran-metin. Tan neʼe, mai ita hakaʼas an atu “laʼo iha Jeová ita-nia Maromak nia naran ba tempu neʼebé la bele sura”.—Miquéias (Mikha) 4:5.