Resposta ba pergunta sira kona-ba Bíblia

Saida mak ita bele aprende kona-ba Maromak?

Ita la bele haree Maromak tanba nia mak espíritu. Nia kria lalehan, rai, no buat hotu neʼebé moris. La iha ema ida neʼebé kria Maromak. Maromak la iha hun. (Salmo [Mazmur] 90:2) Maromak hakarak ema atu buka nia no atu buka-hatene lia-loos kona-ba nia.—Lee Apóstolu 17:24-27.

Ita bele hatene Maromak nia naran. Ita mós bele hatene ninia hahalok balu hodi hanoin kleʼan kona-ba buat neʼebé nia kria. (Roma 1:20) Maibé atu hatene kona-ba Maromak diʼak liután, ita presiza estuda ninia Liafuan, Bíblia. Tanba Bíblia mak ajuda ita atu hatene Maromak nia hahalok furak sira.—Lee Salmo (Mazmur) 103:7-10.

Maromak sente oinsá kona-ba buat neʼebé la justisa?

Ita-nia Kriadór, Maromak Jeová, odi buat neʼebé la loos, ka la justisa. (Deuteronômio [Ulangan] 25:16) No tanba nia kria ema tuir ninia ilas, ita barak mós odi buat neʼebé la justisa. Buat la loos neʼebé akontese iha mundu neʼe, laʼós Maromak mak halo. Maromak fó ema liberdade atu foti desizaun rasik. Maibé triste katak ema barak liu hili atu uza liberdade neʼe iha dalan neʼebé sala no halo buat neʼebé la justisa. Ho nuneʼe, sira halo Maromak Jeová nia laran kanek.—Lee Gênesis (Kejadian) 6:5, 6; Deuteronômio (Ulangan) 32:4, 5.

Maromak Jeová hadomi justisa, no nia sei la husik buat neʼebé la justisa kontinua ba nafatin. (Salmo [Mazmur] 37:28, 29) Bíblia promete katak lakleur tan Maromak sei halakon buat hotu neʼebé la justisa iha mundu neʼe.—Lee 2 Pedro 3:7-9, 13.