Book ita-nia família nia laran atu simu lia-loos
KUANDU Jesus iha besik sidade Gadara, iha parte súl husi Tasi Galileia nian, nia hatete ba mane ida neʼebé hakarak sai ninia dixípulu: “Bá ó-nia uma no ó-nia família no konta buat hotu neʼebé Jeová halo ona ba ó no laran-sadiʼa neʼebé nia hatudu ba ó.” Jesus nia liafuan neʼe hatudu katak nia komprende didiʼak kona-ba ema nia hakarak. Baibain ema hakarak atu fahe ba sira-nia família buat neʼebé sira gosta ka buat neʼebé importante.—Marcos 5:19.
Nuneʼe mós ohin loron, maski ema iha kultura ida hatudu sai ninia hakarak neʼe klaru liu fali kultura seluk, maibé ita hotu hakarak atu fahe buat neʼebé ita gosta ba ita-nia família. Tan neʼe, kuandu ema ida komesa adora Maromak Jeová, baibain sira hakarak atu fahe sira-nia fiar foun neʼe ba sira-nia família. Maibé, oinsá mak sira bele halo ida-neʼe? No oinsá mak sira bele ajuda família neʼebé fiar la hanesan hodi koʼalia iha dalan neʼebé book sira-nia laran? Bíblia fó konsellu neʼebé diʼak kona-ba neʼe.
“AMI HETAN ONA MESIAS”
Iha Jesus nia tempu, André ho ema balu seluk mak ema neʼebé ulukliu rekoñese katak Jesus mak Mesias. Depois neʼe, André fó sai ba sé kona-ba buat neʼebé nia foin hatene? Bíblia hatete: “Uluk liu André buka-hetan ninia maun Simão, no dehan: ‘Ami hetan ona Mesias’ (katak Kristu).” Tuirmai, André lori Pedro ba Jesus, hodi fó oportunidade ba Pedro atu sai Jesus nia dixípulu ida.—João 1:35-42.
Maizumenus tinan neen depois neʼe, kuandu Pedro hela iha Jope, nia hetan konvite atu laʼo ba Sezareia atu vizita Cornélio, kapitaun tropa nian ida. Kuandu Pedro toʼo iha Cornélio nia uma, sé deʼit mak nia haree iha uma neʼe? Bíblia hatete: “Cornélio hein hela sira no nia bolu hamutuk ona ninia família no belun diʼak sira.” Ho ida-neʼe, Cornélio fó oportunidade ba ninia família sira atu rona ba Pedro no atu halo desizaun tuir buat neʼebé sira rona.—Apóstolu 10:22-33.
Ita bele aprende saida husi André no Cornélio nia hahalok?
André no Cornélio la tuur nonook deʼit hodi hein katak sira-nia família mós bele simu lia-loos. Tuir loloos, André rasik mak fó-koñese Pedro ba Jesus, no Cornélio mós halo arranju atu ninia família sira bele rona buat neʼebé Pedro hatete. Maski nuneʼe, André no Cornélio la obriga sira-nia família atu sai Kristu nia dixípulu. Entaun, saida mak ita aprende husi ida-neʼe? Ita mós presiza hatudu hahalok hanesan sira. Ita bele haklaken ba ita-nia família hodi fó oportunidade ba sira atu hatene lia-loos no atu koñese ita-nia maluk fiar-naʼin sira. Maibé, ita mós tenke respeitu sira-nia liberdade atu hili no labele obriga sira. Atu hatete kona-ba oinsá mak ita bele ajuda ita-nia família, mai ita hanoin kona-ba ezemplu husi kaben-naʼin ida iha rai-Alemaña naran Jurgen no Petra.
Petra estuda Bíblia ho Testemuña ba Jeová no ikusmai nia hetan batizmu. Iha tempu neʼebá, ninia laʼen, Jurgen, mak ulun-naʼin tropa nian ida, no foufoun nia la gosta kona-ba ninia feen nia desizaun. Maibé, nuʼudar tempu balu liu tiha, nia komprende katak Testemuña sira haklaken mensajen lia-loos husi Bíblia. Ikusmai, nia mós dedika nia an ba Jeová, no agora nia serbí nuʼudar katuas kristaun ida iha kongregasaun. Saida mak irmaun Jurgen hatete ba sira neʼebé koko atu fahe lia-loos ba sira-nia família neʼebé iha fiar la hanesan?
Jurgen hatete: “Ita labele obriga ita-nia fiar no keta hatoʼo informasaun barak demais ba ita-nia família. Ida-neʼe bele halo sira sai la gosta liután. Karik diʼak liu atu fahe lia-loos neineik-neineik ba sira. Diʼak mós atu fó-koñese ita-nia família ba irmaun ka irmán sira neʼebé iha idade hanesan sira no gosta buat neʼebé sira gosta. Halo hanesan neʼe bele ajuda sira.”
“Ita labele obriga ita-nia fiar no keta hatoʼo informasaun barak demais ba ita-nia família.”—Jurgen
Apóstolu Pedro no Cornélio nia família simu kedas mensajen husi Bíblia. Maibé, iha Jesus nia tempu mós iha ema balu neʼebé presiza tempu kleur atu simu lia-loos.
OINSÁ HO JESUS NIA ALIN SIRA?
Durante Jesus halaʼo ninia serbisu haklaken, nia família balu hatudu fiar ba nia. Porezemplu, karik apóstolu Tiago no João mak Jesus nia primu no sira-nia inan Salomé mak Jesus nia tia. Karik Salomé mós hamutuk ho feto sira seluk hodi ajuda Jesus ho “sira-nia rikusoin”.—Lucas 8:1-3.
Maibé, Jesus nia família balu tan la hatudu kedas fiar ba nia. Porezemplu, tinan ida depois Jesus hetan batizmu, ema-lubun halibur iha uma ida hodi rona nia. Maibé, “kuandu ninia família rona kona-ba neʼe, sira bá atu kaer nia, tanba sira hatete: ‘Nia bulak ona.’” Tempu balu depois neʼe, kuandu Jesus nia alin husu kona-ba ninia planu atu halo viajen, Jesus la hatán kedas ba sira. Tanbasá? “Tuir loloos, ninia alin sira la hatudu fiar ba nia.”—Marcos 3:21; João 7:5.
Ita aprende saida husi hahalok neʼebé Jesus hatudu ba ninia família sira? Nia la sai hirus kuandu ninia família balu dehan katak nia bulak ona. Liután neʼe, kuandu Jesus hetan kastigu-mate no moris fali ona, nia fó laran-manas ba ninia família sira hodi mosu ba ninia alin Tiago. No karik ida-neʼe laʼós deʼit ajuda Tiago, maibé mós ajuda ninia alin sira seluk atu fiar duni katak Jesus mak Mesias. Tan neʼe, sira halibur hamutuk ho apóstolu no ema seluk iha kuartu ida iha Jeruzalein no sira simu espíritu santu. Ikusmai, Tiago no Judas, Jesus nia alin ida seluk, hetan knaar espesiál barak.—Apóstolu 1:12-14; 2:1-4; 1 Korinto 15:7.
EMA BALU PRESIZA TEMPU BARAK
“Ita bele hetan buat diʼak barak hodi pasiénsia, pasiénsia, no pasiénsia liután.”—Roswita
Hanesan iha apóstolu sira-nia tempu, família balu ohin loron presiza tempu barak atu halo desizaun hodi laʼo iha dalan neʼebé lori ba moris. Porezemplu, hanoin toʼok kona-ba Roswita. Kuandu ninia laʼen hetan batizmu nuʼudar Testemuña ba Jeová iha tinan 1978, Roswita mak ema neʼebé laran-metin ba igreja Katóliku Roma nian. Tan neʼe, foufoun nia kontra nia laʼen. Maibé nuʼudar tinan balu liu tiha, nia para atu kontra nia laʼen no nia komesa atu komprende katak Testemuña sira hanorin lia-loos. No ikusmai nia hetan batizmu iha tinan 2003. Saida mak ajuda nia? Ninia laʼen la sai hirus ba ninia fiar, no nia laʼen fó oportunidade ba Roswita atu troka ninia hanoin. Konsellu saida mak Roswita hakarak atu fahe? “Ita bele hetan buat diʼak barak hodi pasiénsia, pasiénsia, no pasiénsia liután.”
Monika hetan batizmu iha tinan 1974, no depois tinan sanulu, ninia oan naʼin-rua mós sai Testemuña. Maski ninia laʼen, Hans, nunka kontra nia, maibé iha tinan 2006 mak Hans foin hetan batizmu. Liuhusi sira-nia esperiénsia rasik, konsellu saida mak família neʼe hakarak fó? Sira dehan: “Kontinua laran-metin ba Jeová, no keta laran-rua, maibé kaer metin ba ita-nia fiar.” Maibé, importante mós atu halo Hans fiar katak família kontinua hadomi nia. No sira nunka lakon esperansa katak loron ida Hans mós sei simu lia-loos.
HETAN KSOLOK HUSI BEE LIA-LOOS NIAN
Jesus kompara mensajen lia-loos nian hanesan ho bee neʼebé fó moris rohan-laek. (João 4:13, 14) Ita hakarak ita-nia família sira sente ksolok hodi hemu bee moos lia-loos nian. Tuir loloos, ita lakohi atu sira nisik tanba obriga atu hemu bee ho lalais. Dalan neʼebé ita esplika lia-loos ba sira bele halo sira sente ksolok ka sente nisik. Bíblia hatete katak “ema loos hanoin kleʼan iha nia laran atu bele hatán” no katak “ema matenek nia laran book nia atu koʼalia ho matenek no halo ema bele tau fiar ba ninia liafuan”. Oinsá mak ita bele halo tuir konsellu neʼe?—Provérbios (Amsal) 15:28; 16:23.
Porezemplu, se feen ida hakarak atu esplika ninia fiar ba nia laʼen, nia sei “hanoin kleʼan” antes nia koʼalia, hodi hili liafuan ho didiʼak no la koʼalia ho ansi. Nia labele hatudu katak nia mak loos liu ka diʼak liu. Ninia liafuan neʼebé hanoin ho didiʼak bele fó ksolok no haburas dame. Bainhira mak ninia laʼen la okupadu no bele iha tempu atu koʼalia? Nia gosta koʼalia ka lee informasaun saida? Nia gosta siénsia, polítika, ka desportu? Oinsá mak feen bele haburas nia laʼen nia hakarak atu hafolin Bíblia, no iha tempu hanesan respeitu ninia sentimentu no hanoin? Hodi hanoin didiʼak kona-ba pergunta sira-neʼe sei ajuda feen atu koʼalia no hatudu hahalok iha dalan neʼebé matenek.
Atu book ita-nia família nia laran hodi simu lia-loos laʼós deʼit katak esplika ita-nia fiar ba sira. Buat neʼebé ita koʼalia tenke laʼo hamutuk ho ita-nia hahalok diʼak.
NAFATIN HATUDU HAHALOK DIʼAK
Irmaun Jurgen neʼebé temi uluk dehan: “Nafatin halo tuir Bíblia nia matadalan iha ita-nia moris loroloron nian. Neʼe mak dalan diʼak liu hotu atu book ita-nia família nia hanoin maski karik sira sei la fó sai kona-ba neʼe.” Hans, neʼebé hetan batizmu tinan 30 depois nia feen, mós konkorda kona-ba neʼe hodi dehan: “Hahalok diʼak mak importante atu ita-nia família bele haree rezultadu diʼak tanba ita simu lia-loos.” Karik ita-nia família bele haree dalan oioin neʼebé lia-loos halo ita-nia moris la hanesan ho ema seluk nian. Maibé, ita lakohi sira atu haree ita la hanesan ho ema seluk tanba hatudu hahalok aat.
“Hahalok diʼak mak importante atu ita-nia família bele haree rezultadu diʼak tanba ita simu lia-loos.”—Hans
Apóstolu Pedro fó konsellu diʼak ba feen sira neʼebé nia laʼen laʼós fiar-naʼin, hodi dehan: “Imi feen sira, hakruʼuk an ba imi-nia laʼen, atu nuneʼe, se sira la halo tuir Maromak nia liafuan, imi bele lori sira ba fiar laʼós liuhusi imi-nia liafuan maibé liuhusi imi-nia hahalok, tanba sira haree ho matan rasik imi-nia hahalok neʼebé moos hamutuk ho respeitu neʼebé kleʼan. Keta hafurak imi-nia an tuir deʼit buat neʼebé ema haree, katak fuuk ho modelu oioin ka tau osan-mean ka roupa furak, maibé buat neʼebé imi tenke hafurak mak imi-nia laran, hodi tau hatais neʼebé la bele mohu, katak hahalok laran-maus no laran-diʼak neʼebé iha folin boot iha Maromak nia oin.”—1 Pedro 3:1-4.
Pedro hakerek kona-ba laʼen neʼebé bele sai fiar-naʼin tanba ninia feen nia hahalok. Kuandu irmán Crista foin hetan batizmu iha tinan 1972, nia planu atu halo tuir konsellu neʼe hodi ajuda nia laʼen liuhusi hahalok. Maski ninia laʼen uluk estuda Bíblia ho Testemuña, maibé nia la halo lia-loos sai ninian. Ninia laʼen tuir ona reuniaun balu no sai belun diʼak ho ema sira iha kongregasaun. No ninia belun sira-neʼe respeitu ninia direitu atu hili. Entaun, oinsá mak Crista book nia laʼen nia laran?
Irmán Crista dehan: “Haʼu laran-metin hodi laʼo tuir nafatin Jeová nia dalan. Iha tempu hanesan, haʼu koko atu manán haʼu-nia laʼen ‘laʼós liuhusi liafuan’, maibé liuhusi haʼu-nia hahalok diʼak. Kuandu buat neʼebé nia hakarak la kontra Bíblia nia matadalan, haʼu hakaʼas an duni atu kumpre ninia hakarak neʼe. No loloos, haʼu respeitu ninia direitu atu hili no haʼu entrega buat hotu ba Jeová.”
Crista nia esperiénsia hatudu katak importante atu la ulun-toos. Nia kontinua halaʼo ninia atividade atu serbí Maromak, hanesan tuir reuniaun no hola parte iha serbisu haklaken. Maibé, nia mós hatudu ba nia laʼen katak nia komprende ninia laʼen presiza nia domin no tempu. Hodi la ulun-toos no komprende mak dalan neʼebé matenek atu hasoru ita-nia família neʼebé laʼós fiar-naʼin. Bíblia hatete: “Buat hotu-hotu iha nia tempu.” Ida-neʼe inklui tempu atu hamutuk ho família, liuliu ho ita-nia kaben neʼebé fiar la hanesan ho ita. Tempu neʼebé ita uza hamutuk bele haburas toman atu koʼalia ba malu. Esperiénsia sira hatudu katak se ita koʼalia ba malu iha dalan neʼebé diʼak, ida-neʼe ajuda ita-nia kaben atu la sente mesamesak, ka sente laran-moras.—Eclesiastes (Pengkhotbah) 3:1.
KETA LAKON ESPERANSA
Irmaun ida naran Holger, neʼebé ninia aman hetan batizmu tinan 20 depois ninia família sira seluk, hatete: “Importante tebes atu hatudu katak ita hadomi família no katak ita halo orasaun kona-ba sira.” Crista hatutan tan hodi dehan: ‘Ha’u nunka lakon esperansa katak ikusmai haʼu-nia laʼen sei adora Jeová no simu lia-loos.’ Sin, ita tenke iha nafatin hanoin neʼebé diʼak kona-ba ita-nia família neʼebé fiar la hanesan ho ita, neʼe katak ita labele lakon esperansa.
Ita-nia hakarak mak atu iha relasaun diʼak nafatin ho ita-nia família, atu fó oportunidade ba sira hodi simu lia-loos no atu book sira-nia laran ho mensajen husi Bíblia. No iha buat hotu ita tenke hatudu hahalok “laran-maus no respeitu”.—1 Pedro 3:15.