Horibainhira mak Maromak nia Reinu hahú ninia ukun?—Parte 2

MAI ITA HANOIN FILAFALI NABUCODONOSOR NIA MEHI

Carlos: Maun João, diʼak ita bele hasoru malu fali. Haʼu kontente estuda Bíblia ho maun semana-semana.a Maun diʼak hela ka lae?

João: Haʼu diʼak hela deʼit.

Carlos: Neʼe diʼak. Maun hanoin-hetan ka lae, horibainhira ita koʼalia hamutuk kona-ba tansá Testemuña ba Jeová fiar katak Maromak nia Reinu hahú ukun ona iha tinan 1914.b Kona-ba ida-neʼe, ita lee tiha ona livru Daniel kapítulu 4 iha Bíblia. Maun João hanoin-hetan eskritura neʼe kona-ba saida?

João: Neʼe mak kona-ba Liurai Nabucodonosor, nia mehi hetan ai-hun boot ida.

Carlos: Loos duni. Liurai neʼe mehi hetan ai-hun ida neʼebé boot tebetebes no aas toʼo lalehan. Tuirmai, nia rona Maromak nia anju ida dehan ai-hun neʼe tenke tesi tiha, hela deʼit ninia fukun ho abut. Depois, liutiha “tempu hitu” ai-hun neʼe sai buras no boot fali.c Hanesan ita koʼalia tiha ona, mehi neʼe sai loos ba dala rua. Maun hanoin-hetan ka lae, saida mak akontese bainhira mehi neʼe sai loos ba dala primeiru?

João: Karik Liurai neʼe sai bulak tiha ba tinan hitu, loos ka lae?

Carlos: Kona loos, maun. Tanba Liurai Nabucodonosor sai bulak, durante tinan hitu, nia la bele halaʼo ninia ukun. Maibé bainhira ninia mehi neʼe sai loos ba dala segundu, Maromak nia ukun mak hanetik tiha ba “tempu hitu”. Hanesan ita koʼalia tiha ona, “tempu hitu” neʼe komesa iha tinan 607 molok Kristu bainhira ema halakon sidade Jeruzalein. Hahú husi tempu neʼebá, la iha tan liurai sira neʼebé reprezenta Maromak Jeová nia ukun iha mundu neʼe. Maibé, toʼo “tempu hitu” neʼe remata tiha, Maromak fó kbiit ba Liurai foun ida iha lalehan atu ukun ninia povu, nuneʼe mak Maromak nia ukun hahú fali. Ita koʼalia ona kona-ba “tempu hitu” neʼe komesa iha tinan 607 molok Kristu. Entaun, pergunta mak: “Tempu hitu” neʼe loloos han tinan hira? Se ita bele hatene resposta ho loloos, ita mós bele hatene bainhira loos mak Maromak nia Reinu, ka Ukun hahú. Maun sei hanoin-hetan buat hirak-neʼe ka lae?

João: Sin, haʼu hanoin-hetan. Maun konta fali hanesan neʼe ajuda tebes haʼu.

Carlos: Diʼak. Agora, mai ita buka-hatene “tempu hitu” neʼe loloos han tinan hira. Haʼu lee ona informasaun kona-ba neʼe. Haʼu sei koko atu esplika didiʼak ba maun.

João: Diʼak maun.

“TEMPU HITU” REMATA, “LORON IKUS SIRA” KOMESA

Carlos: Bainhira Liurai Nabucodonosor nia mehi sai loos ba dala primeiru, “tempu hitu” neʼe mak tinan hitu duni. Maibé bainhira mehi neʼe sai loos ba dala segundu kona-ba Maromak nia Ukun, “tempu hitu” neʼe laʼós tinan hitu deʼit, neʼe tenkesér han tempu kleur liu fali tinan hitu.

João: Neʼe ka? Tanbasá mak hanesan neʼe fali?

Carlos: Tanba razaun balu. Razaun ida mak ita hatene ona katak “tempu hitu” neʼe komesa iha tinan 607 molok Kristu bainhira sidade Jeruzalein naksobu. Se ita sura deʼit ba tinan hitu, neʼe katak “tempu hitu” neʼe tenke remata iha tinan 600 molok Kristu. Maibé realidade mak toʼo tinan 600 neʼe la iha buat ida mak akontese neʼebé hatudu katak Maromak nia Ukun hahú fali ona. Liután neʼe, liutiha tinan atus ba atus husi tempu neʼebé Jeruzalein naksobu, wainhira Jesus sei iha rai, ninia liafuan hatudu katak “tempu hitu” neʼe seidauk remata. Ita mós koʼalia hamutuk ona kona-ba neʼe, loos ka lae?

João: Loos, haʼu foin hanoin-hetan.

Carlos: Entaun, neʼe katak “tempu hitu” neʼe tenkesér han tempu naruk tebes, laʼós tinan hitu deʼit.

João: Se nuneʼe, tempu hira loos?

Carlos: Kona-ba neʼe, livru Apokalipse ajuda ita atu hatene, tanba profesia barak husi livru Daniel mak liga malu ho livru Apokalipse. Tuir Livru Apokalipse, tempu ‘tinan tolu ho balu’ mak iha loron 1.260.d Entaun, ‘tinan hitu’ katak ‘tinan tolu ho balu’ sura fali ba dala rua. Neʼe katak se sura hamutuk, ‘tinan hitu’ mak iha loron 2.520. Maun bele komprende ka lae?

João: Komprende. Maibé haʼu sei duvida hela oinsá ida-neʼe bele liga malu ho Maromak nia Reinu neʼebé hahú iha tinan 1914?

Carlos: Neʼe liga malu duni. Tuir Bíblia, dala ruma loron ida mak hanesan tinan ida.e Tan neʼe, se sura loron ida hanesan tinan ida, neʼe katak “tempu hitu” iha livru Daniel mak loloos tinan 2.520. Agora se ita sura tinan 2.520 hahú husi tinan 607 molok Kristu, toʼo “tempu hitu” neʼe remata iha tinan 1914.f Nuneʼe ita bele hatene katak iha tinan 1914 mak Jesus komesa ona ninia ukun nuʼudar Liurai iha Maromak nia Reinu, ka Ukun. Liután neʼe, hahú husi tinan 1914 toʼo agora, akontesimentu oioin iha mundu neʼe mosu tuituir malu, buat hotu neʼe kumpre profesia sira neʼebé Bíblia fó-hatene nanis ona kona-ba “loron ikus sira”.

João: Akontesimentu oioin neʼe mak saida?

Carlos: Mai ita loke Bíblia iha Mateus 24:7. Jesus fó-hatene nanis ona kona-ba sinál sira neʼebé sei mosu bainhira nia hahú ukun iha lalehan. Jesus dehan: “Nasaun sei hamriik hasoru nasaun seluk no ukun ida sei hamriik hasoru ukun seluk, no rai sei hamlaha no sei iha rai-nakdoko iha fatin oioin.” Haree toʼok, iha eskritura neʼe Jesus fó-hatene nanis katak rai sei hamlaha no nakdoko. Durante tinan 100 nia laran neʼebé sura husi tinan 1914 toʼo ohin loron, terus barak hanesan neʼe mosu ona iha mundu tomak, loos ka lae?

João: Neʼe mós loos.

Carlos: Iha eskritura neʼe, Jesus mós hatete katak bainhira nia sai Liurai ba Maromak nia Ukun, funu sira sei mosu iha mundu. No tuir Livru Apokalipse, iha “loron ikus sira”, funu sei akontese laʼós iha fatin balu deʼit, maibé iha mundu tomak.g Maun João hanoin-hetan ka lae, Funu Mundiál Primeiru hahú iha sá tinan?

João: Neʼe iha tinan 1914. Entaun, Jesus komesa ukun ona iha tinan neʼe! Haʼu foin mak komprende. Afinál, neʼe liga malu duni.

Carlos: Loos kedas. Tuir loloos, profesia kona-ba “tempu hitu” no mós profesia sira seluk husi Bíblia laran kona-ba “loron ikus sira”, ita tenke estuda didiʼak buat hirak-neʼe hamutuk, nuneʼe mak ita bele komprende ho loloos. Testemuña ba Jeová fiar duni katak iha tinan 1914 mak Jesus komesa sai Liurai ba Maromak nia Ukun no iha tinan neʼe duni mak “loron ikus sira” foin hahú.h

João: Loos duni, maibé haʼu mós presiza kadi kakutak atu komprende didiʼak buat hotu neʼe.

Carlos: Haʼu hatene maun. Haʼu mós uluk presiza tempu barak atu bele komprende didiʼak kona-ba neʼe. Maibé pelumenus maun bele hatene ona katak maski Bíblia la temi kedas liafuan “tinan 1914”, maibé buat hotu neʼebé Testemuña ba Jeová sira fiar kona-ba tinan neʼe, mak husi Bíblia duni.

João: Loos. Buat neʼebé haʼu gosta mak maun nia fiar no koʼalia sempre sadere ba Bíblia. Maun nunka inventa deʼit husi maun nia hanoin. Maibé, buat ida neʼebé halo haʼu hanoin hela mak: Tansá mak neʼe tenke komplikadu loos no susar atu komprende? Tansá mak Maromak la fó-hatene kedas deʼit iha Bíblia laran, katak iha tinan 1914 mak Jesus sei sai liurai iha lalehan?

Carlos: Neʼe pergunta diʼak, maun João. Tuir loloos, iha Bíblia laran iha buat barak neʼebé ita tenke kadi kakutak hodi bele komprende didiʼak. Entaun, tansá mak Maromak hakarak ita hakaʼas an atubele komprende ninia Liafuan? Loron seluk haʼu mai fali, ita bele koʼalia liután kona-ba ida-neʼe, bele ka?

João: Bele deʼit maun. Haʼu sei hein.