Nia ‘hatene dalan’

GUY HOLLIS PIERCE, membru Grupu Administradór ida husi Testemuña ba Jeová neʼebé iha esperansa atu hetan moris-hiʼas hodi sai Kristu nia alin ida iha lalehan, ramata ona ninia knaar iha mundu neʼe. Nia mate iha loron 18 Marsu 2014 ho idade 79.—Ebreu 2:10-12; 1 Pedro 3:18.

Guy Pierce moris iha Auburn, Kalifórnia, Estadus Unidus, iha loron 6 Novembru 1934, no hetan batizmu iha tinan 1955. Nia kaben ho Penny iha tinan 1977. Nuʼudar aman diʼak ida, nia mós sempre trata ema seluk ho domin hanesan ninia oan. Iha tinan 1982 nia ho Penny hahú serbí nuʼudar pioneiru. No nia komesa serbí nuʼudar katuas área nian husi tinan 1986 hamutuk tinan 11 iha Estadus Unidus.

Komesa husi tinan 1997, Guy no Penny Pierce hahú serbí iha Betel Estadus Unidus nian. Irmaun Pierce serbisu iha Departamentu Serbisu nian, no toʼo tiha tinan 1998 nia simu knaar seluk hodi serbí iha Komisaun Serbisu-naʼin husi Grupu Administradór. Iha loron 2 Outubru 1999, iha reuniaun tinan nian, avizu fó sai katak irmaun Pierce sai ona nuʼudar membru husi Grupu Administradór ida. Tinan hirak foin liubá, irmaun Pierce mós serbí iha departamentu komisaun oioin hanesan, Komisaun Serbisu-naʼin, Komisaun Hakerek, Komisaun Editora, no Komisaun Koordenadór nian.

Tanba irmaun Pierce sempre oin-midar ba ema no gosta koʼalia komik, ema hotu gosta hakbesik ba nia. Maibé ninia hahalok neʼebé halo ema seluk gosta liu nia mak ninia domin, haraik-an, kaer metin ba morál ka prinsípiu neʼebé loos, no ninia fiar-metin ba Jeová. Ba Guy Pierce, fasil liu atu fiar katak loron ida loron-matan sei la saʼe tan, maibé, atu fiar katak Jeová nia promete sira sei la sai loos, neʼe sei nunka akontese. Nia mós hakarak mundu tomak atu hatene kona-ba neʼe.

Irmaun Pierce nunka sente kole serbí Jeová. Nia serbisu husi dadeer toʼo kalan. Bainhira nia bá rai oioin hodi fó anima ba irmaun-irmán sira, nia nunka halo ema sente katak nia la iha tempu atu koʼalia ho sira. Se irmaun ka irmán ida hakarak koʼalia hamutuk ho nia ka husu konsellu ka ajuda ruma, nia sempre prontu hela deʼit ba sira. Nuneʼe mak, maski tinan barak liutiha ona mós ema barak sei hanoin-hetan ninia hahalok laran-luak, belun ida neʼebé diʼak, no oinsá mak nia uza Eskritura didiʼak hodi ajuda ema.

Ita-nia irmaun belun diʼak neʼe mate husik hela ninia feen ho oan naʼin-neen, no mós bei-oan ho bei-oan ba dala rua. Nia mós iha oan espirituál barak. Iha ninia loron hakoi nian, irmaun Mark Sanderson, membru ida husi Grupu Administradór hatoʼo diskursu ida iha Betel Brooklyn iha loron 22 Marsu 2014. Iha ninia diskursu, koʼalia tiha kona-ba irmaun Pierce nia esperansa atu moris iha lalehan, tuirmai irmaun Sanderson lee sai Jesus nia liafuan iha João 14:2-4: “Iha haʼu-nia Aman nia uma iha fatin barak atu hela. . . . Se haʼu bá no prepara fatin ba imi, haʼu sei mai fali no lori imi ba haʼu-nia fatin, atu nuneʼe iha fatin neʼebé haʼu hela, imi mós sei hela bá. No fatin neʼebé haʼu bá, imi hatene nia dalan.”

Neʼe loos, ita hotu lakon ona irmaun Pierce. Maibé ita haksolok tanba nia hatene dalan atu bá ninia fatin permanente nian.