Jeová fó bensaun boot ba sira neʼebé fó ho laran

ITA-NIA Kriadór fó mai ita prezente furak ida, neʼe mak liberdade. Nia fó bensaun ba ema neʼebé uza liberdade neʼe hodi apoia adorasaun neʼebé loos no hahiʼi ninia naran neʼebé santu. Jeová la gosta ninia povu adora nia tanba obriga an ka sente taʼuk. Nia hakarak ita atu adora nia tanba ita hadomi nia no hafolin buat neʼebé nia halo ona mai ita.

Porezemplu, bainhira ema Izraél iha rai-fuik maran Sinai, Jeová haruka sira harii fatin adorasaun nian. Nia hatete: “Halibur kontribuisaun ida husi imi-nia leet ba Jeová. Kontribuisaun husi ema ida-idak nia laran hodi fó ba Jeová.” (Êxodo [Keluaran] 35:5) Ema Izraél ida-idak bele fó tuir ninia kbiit. Kontribuisaun hotu, boot ka kiʼik, iha folin no bele uza hodi halaʼo Maromak nia hakarak. Saida mak ema Izraél sira halo?

“Ema ida-idak neʼebé ninia laran book nia” no “ema ida-idak neʼebé ninia neon mak book nia” fó kontribuisaun ba Jeová ho “ninia hakarak rasik”. Mane no feto sira fó alfinete, brinkus, kadeli, osan-mean, osan-mutin, riti, kabas azúl, bibi-fulun kór-uvas, hena mean, hena folin-boot, bibi kulit mean, asu-tasi nia kulit, fatuk-murak sira, ai-kasi, bálsamu no mina. Ikusmai, “sasán sira neʼebé atu uza ba serbisu neʼe toʼo ona, no liu tiha buat neʼebé presiza”.—Êxodo (Keluaran) 35:21-24, 27-29; 36:7.

Maromak Jeová la haree ba sasán neʼebé sira fó, maibé Jeová hafolin tebes sira tanba sira fó ho hakarak rasik hodi apoia adorasaun neʼebé loos. Ema sira-neʼe mós fó sira-nia tempu no forsa. Bíblia hatete katak feto matenek sira neʼebé sira-nia laran book atu suku bibi-fulun ho liman. Liután neʼe, Jeová fó ba Bezalel “espíritu kona-ba matenek, kona-ba hatene loloos no kona-ba koñesimentu no kona-ba serbisu badain nian oioin”. Jeová fó ba Bezalel no mós Oholiab matenek neʼebé sira presiza hodi halo serbisu neʼe.—Êxodo (Keluaran) 35:25, 26, 30-35.

Bainhira Jeová konvida ema Izraél atu fó kontribuisaun, nia fiar katak ema hotu neʼebé sira-nia laran book sira sei apoia adorasaun neʼebé loos. Nia fó bensaun ba ema laran-luak sira hodi fó ba sira matadalan no ksolok. Ho ida-neʼe, Jeová hatudu katak bainhira nia atu kumpre ninia hakarak, nia sempre haree didiʼak katak sasán hotu toʼo, no iha mós ema neʼebé matenek hodi halo serbisu neʼe. Nia sei la fó bensaun ho liman mamuk deʼit. (Salmo [Mazmur] 34:9) Ita mós bele fiar katak Jeová sei fó bensaun mai ita tanba ita fó ba nia ho laran-luak.

Dalan balu atu fó kontribuisaun ba serbisu iha mundu tomak

Hanesan iha apóstolu Paulo nia tempu, ema barak ohin loron “tau ketak” osan uitoan atu bele tau iha kaixa kontribuisaun ho marka “Serbisu iha Mundu Tomak”. (1 Korinto 16:2) Fulan-fulan, kongregasaun sira haruka osan sira-neʼe ba sukursál husi Testemuña ba Jeová neʼebé tau matan ba serbisu iha sira ida-idak nia rai. Ita rasik mós bele haruka kedas kontribuisaun ba sukursál husi Testemuña ba Jeová neʼebé tau matan ba Ita-nia rai. Atu hatene ho loloos organizasaun nia naran neʼebé Testemuña ba Jeová uza, favór ida, kontaktu sukursál neʼebé tau matan ba Ita-nia rai. Ita bele hetan informasaun kona-ba sukursál liuhusi internét, www.jw.org. Informasaun tuirmai mak kona-ba dalan balu neʼebé Ita bele fó kontribuisaun:

KONTRIBUISAUN NEʼEBÉ FÓ DEʼIT

Osan, kadeli, korrente, ka buat seluk tan neʼebé iha folin.
Hakerek karta hodi hatete katak osan ka sasán sira-neʼe mak kontribuisaun neʼebé Ita fó deʼit ho hakarak rasik.

ARRANJU KONA-BA HUSIK ORGANIZASAUN UZA ITA-NIA OSAN

Ita bele halo arranju ho Testemuña ba Jeová hodi sira bele uza Ita-nia osan, maibé kuandu Ita presiza osan neʼe, Ita bele hetan fali. Atu hetan informasaun liután, bele kontaktu sukursál neʼebé tau matan ba kontribuisaun sira hodi hakerek ba diresaun iha kraik.

PLANU KONA-BA FÓ KONTRIBUISAUN

Maski Ita bele fó osan ka sasán neʼebé folin nuʼudar kontribuisaun, maibé iha mós dalan seluk tan atu Ita bele fó kontribuisaun ba serbisu iha mundu tomak. Dalan sira-neʼe mak hakerek tuirmai neʼe. Antes atu fó kontribuisaun hanesan neʼe, kontaktu uluk lai ho sukursál neʼebé tau matan ba Ita-nia rai. Tanba lei kona-ba impostu la hanesan iha rai ida-idak, importante atu koʼalia ho kobradór ka advogadu sira kona-ba dalan neʼebé Ita fó osan.

Asuransi: Fó kontribuisaun ba Testemuña ba Jeová atu uza Ita-nia asuransi ka Ita-nia pensaun.

Saham no obligasi: Fó kontribuisaun ba Testemuña ba Jeová atu uza Ita-nia saham no obligasi.

Uma ka rai: Ita bele fó uma ka rai neʼebé bele faʼan nuʼudar prezente ba Testemuña ba Jeová. Se Ita hakarak hela iha uma neʼe, Ita bele halo arranju atubele kontinua hela nafatin toʼo Ita mate.

Testamentu: Liuhusi surat legál neʼebé Ita asina, Ita bele fó sai Ita-nia hakarak atu fó rai, uma ka osan ba Testemuña ba Jeová bainhira Ita mate.

Atu hetan informasaun liután, Ita bele kontaktu Watchtower Bible and Tract Society of Australia liuhusi telefone ka hodi hakerek karta ba diresaun iha kraik, ka bele mós kontaktu sukursál neʼebé tau matan ba Ita-nia rai.