Ema haree, ka la haree ita-nia serbisu, importante ka lae?

BA Bezalel no Oholiab, konstrusaun laʼós buat foun ba sira. Tanba bainhira sira sei atan ba ema Ejitu, ema obriga sira halo tezolu toʼo sira mak bosan. Maibé, tempu sira-neʼe liu ona. Agora sira simu knaar importante ida nuʼudar badain matenek liu hotu atu harii tabernákulu. (Êxodo [Keluaran] 31:1-11) Maski nuneʼe, ema uitoan deʼit mak haree ona buat neʼebé sira halo. Neʼe halo sira la kontente ka lae? Ba sira, importante ka lae, atu ema haree, ka la haree buat neʼebé sira halo? Ba ita, buat hanesan neʼe importante ka lae?

SERBISU MURAK NEʼEBÉ EMA HIRAK DEʼIT MAK HATENE

Buat balu iha tabernákulu laran presiza duni matenek mak bele halo. Porezemplu, hanoin toʼok kona-ba kerubín osan-mean sira neʼebé iha arka aliansa nia leten. Apóstolu Paulo bolu sira nuʼudar “kerubín sira neʼebé kmanek”. (Ebreu 9:5) Imajina toʼok kona-ba sira-nia murak neʼebé halo husi osan-mean neʼe!—Êxodo (Keluaran) 37:7-9.

Se ohin loron mak ema buka-hetan buat sira neʼebé Bezalel no Oholiab halo, sira sei amostra buat sira neʼe iha muzeu boot laran atu ema hotu bele haree. Maibé iha tempu Bezalel no Oholiab foin halo buat sira-neʼe, bandu ema seluk la bele haree. Porezemplu, kerubín bele hetan deʼit iha Fatin neʼebé Santu Liu Hotu. Tan neʼe, amlulik boot deʼit mak haree sira, haree mós tinan ida dala ida deʼit, iha loron Halo Dame nian. (Ebreu 9:6, 7) Tan razaun neʼe mak ema uitoan deʼit mak haree ona buat sira-neʼe.

MASKI LA IHA NARAN BOOT MAIBÉ KONTENTE

Se Ita mak Bezalel ka Oholiab, Ita sente oinsá bainhira Ita halo ona buat ida ho kosar-been, maibé ema uitoan deʼit mak hatene ka haree buat sira-neʼe? Ohin loron ema sente orgullu ho sira-nia an se ema seluk gaba ka hahiʼi sira ba buat neʼebé sira halo. Maibé Jeová nia atan la hanesan. Ita sente solok no kontente hanesan ho Bezalel no Oholiab, tanba ita halo Jeová nia hakarak no tanba nia kontente ho buat neʼebé ita halo.

Iha Jesus nia tempu, ulun-naʼin relijiaun sira baibain gosta halo orasaun hodi dada ema nia atensaun. Maibé Jesus anima ema atu halo orasaun husi laran, laʼós atu halo hodi ema gaba ita. Tanba Jesus dehan: “Ó-nia Aman neʼebé haree buat hotu sei fó kolen ba ó.” (Mateus 6:5, 6) Loos duni, importante mak atu hatene Jeová sente oinsá kona-ba ita-nia orasaun, laʼós ema gosta ka la gosta. Jeová nia haree mak folin liu buat hotu. Hanesan neʼe mós ho buat hotu neʼebé ita halo iha lia-loos. Ita lakohi halo atu ema haree hodi sira gaba ita, maibé ita hakarak halo ba Jeová, Ida neʼebé haree husi lalehan.

Bainhira tabernákulu kompletu ona, kalohan ida “komesa taka tenda reuniaun nian no tabernákulu sai nakonu ho Jeová nia glória”. (Êxodo [Keluaran] 40:34) Ida-neʼe hatudu duni katak Jeová simu no kontente ho buat neʼebé sira halo. Tuir ita-nia hanoin, iha tempu neʼebá Bezalel no Oholiab sente oinsá? Maski sira-nia naran la bahat iha buat neʼebé sira halo, maibé ita fiar katak sira sente haksolok tebes tanba Jeová fó bensaun ba buat hotu neʼebé sira halo. (Provérbios [Amsal] 10:22) Sira mós haksolok tanba iha tinan barak nia laran, ema uza buat neʼebé sira halo hodi serbí Jeová. Kuandu bainhira sira hetan moris-hiʼas iha mundu foun, sira sei hakfodak se sira hatene katak ema uza tabernákulu hodi halaʼo adorasaun neʼebé loos ba tinan maizumenus 500 nia laran.

Iha Jeová nia organizasaun ohin loron, irmaun-irmán sira neʼebé halo filme boneka, halimar filme, kanta, hasai retratu, tradús, hakerek livru, sira hotu halo ho nonook deʼit, ema la hatene sira mak sé. Hanesan neʼe mós iha kongregasaun 110.000 liu nia laran iha mundu tomak, serbisu barak mak ema ladún hatene sesé deʼit mak halo. Porezemplu, sé mak hatene atan kongregasaun presiza prenxe formuláriu saida deʼit kona-ba kontribuisaun iha fulan ida-idak nia rohan? Sé mak hatene sekretáriu presiza halo relatóriu saida deʼit kona-ba haklaken iha kongregasaun ida-idak? Sé mak hatene irmaun-irmán sira neʼebé hadiʼa Reuniaun-Fatin, sira halo serbisu saida deʼit?

Toʼo Bezalel no Oholiab mate mós sira nunka simu tasa ida, medalla ruma, ka letreiru neʼebé hakerek katak sira mak halo buat sira-neʼe. Maibé sira simu buat ida neʼebé folin boot liu buat hotu, neʼe mak Jeová nia oin-midar. Ita bele fiar duni katak Jeová hatene no haree hela buat hotu neʼebé sira halo. Tan neʼe, mai ita banati-tuir sira-nia ezemplu atu halo ita-nia serbisu ho haraik-an no ho laran.