INFORMASAUN IHA OIN | TESTEMUÑA BA JEOVÁ NIA FIAR NO ATIVIDADE
Testemuña ba Jeová fiar saida?
Ami Testemuña ba Jeová fiar katak “Maromak mak leno Eskritura hotu no neʼe diʼak atu hanorin”. (2 Timóteo 3:16) Ami estuda Bíblia atubele hatene lia-loos kona-ba Maromak Kriadór no oinsá atu halaʼo ami-nia moris ho loloos.
Bíblia dehan: “Atu ema bele hatene katak Ita neʼebé naran Jeová, Ita mesak deʼit mak Maromak Aas Liu Hotu iha mundu tomak.” (Salmo [Mazmur] 83:18) Tan neʼe, ami adora Maromak Jeová mesak ida deʼit, no nuʼudar ninia Testemuña sira, ami haklaken ninia naran ba ema seluk.—Isaías (Yesaya) 43:10-12.
Nuʼudar ema kristaun, ami fiar katak Jesus mak “Maromak nia Oan-Mane”a neʼebé mai toʼo mundu no sai nuʼudar Mesias. (João 1:34, 41; 4:25, 26) Depois Jesus mate, nia moris hiʼas no saʼe ba lalehan. (1 Korinto 15:3, 4) Liutiha tempu balu, nia sai Liurai ba Maromak nia Reinu. (Apokalipse 11:15) Reinu neʼe mak governu ida neʼebé harii ona iha lalehan, no lakleur tan, Liurai Jesus sei halo mundu neʼe sai fatin furak hanesan jardín Eden. (Daniel 2:44) Bíblia dehan: “Ema laran-maus sei simu rai nuʼudar liman-rohan, no sira sei haksolok tebes ho moris neʼebé nakonu ho dame.”—Salmo (Mazmur) 37:11, 29.
‘Bainhira sira lee Bíblia, sira fiar katak neʼe hanesan Maromak mak koʼalia ba sira. Se problema ruma mosu iha sira-nia moris, sira loke Bíblia no buka-hatene oinsá atu rezolve problema neʼe. Sira hafolin duni Maromak nia Liafuan.’—Liafuan husi ulun-naʼin Igreja Katólika, Benjamin Cherayath, iha jornál Münsterländische Volkszeitung, rai-Alemaña
Ami fiar metin katak matadalan husi Bíblia bele ajuda ema hotu nia moris, tan neʼe ami hakaʼas an moris tuir matadalan neʼe. (Isaías [Yesaya] 48:17, 18) Porezemplu, ami la fuma no la uza droga tanba Bíblia hanorin katak ita labele hafoʼer ita-nia neon no isin. (2 Korinto 7:1) Ami mós la halo hahalok sira neʼebé Bíblia bandu duni, hanesan hemu-lanu, naʼok no hahalok la morál hanesan sala-foʼer.—1 Korinto 6:9-11.
a Bíblia mós temi Jesus nuʼudar “Maromak nia Oan-Mane mesak” tanba nia mak ida neʼebé Maromak kria ulukliu, no liuhusi Jesus mak Maromak kria buat seluk hotu.—João 3:18; Koloso 1:13-15.