Oinsá mak ita bele hatudu katak ita hadomi Jeová?
“Ita hadomi tanba nia hadomi uluk ita.”—1 JOÃO 4:19.
1, 2. Tuir apóstolu João, oinsá mak Jeová hanorin ita atu hadomi nia?
EMA hotu konkorda katak dalan diʼak liu hotu ba aman ida atu hanorin oan mak liuhusi ninia ezemplu rasik. Iha apóstolu João nia karta, nia dehan: “Ita hadomi tanba [Maromak] hadomi uluk ita.” (1 João 4:19) Ita haree duni katak Jeová hatudu ezemplu domin barak atu ajuda ita hodi hadomi nia.
2 Maromak “hadomi uluk ita” liuhusi dalan saida? Apóstolu Paulo dehan: “Maromak hatudu nia domin ba ita nuneʼe: Kristu mate ba ita kuandu ita sei sala-naʼin hela.” (Roma 5:8) Jeová, ita-nia Aman neʼebé domin, fó ninia Oan-Mane mesak nia moris hodi salva ita husi sala no mate. Liuhusi Jesus nia sakrifísiu, nia loke dalan ba ita atu bele hakbesik ba nia no hadomi nia. Jeová nia ezemplu neʼe hanorin ita katak ita mós tenke hatudu domin no laran-luak.—1 João 4:10.
3, 4. Oinsá mak ita bele hatudu domin ba Jeová?
3 Jeová nia hahalok prinsipál mak domin, tan neʼe mak Jesus hatete katak Maromak nia mandamentu importante liu hotu mak: “Ó tenke hadomi Jeová ó-nia Maromak ho ó-nia laran tomak, ho ó-nia moris tomak, ho ó-nia neon tomak, no ho ó-nia kbiit tomak.” (Marcos 12:30) Husi Jesus nia liafuan neʼe ita bele aprende katak domin ba Jeová hahú husi ita-nia laran. Jeová la simu domin neʼebé la ho laran. Jesus mós hatete katak ita tenke hadomi Jeová ho moris, neon no kbiit tomak. Neʼe katak hatudu domin neʼebé loos ba Jeová laʼós liuhusi sentimentu deʼit, maibé envolve mós ita-nia hanoin no hahalok sira.—Lee Miquéias (Mikha) 6:8.a
4 Se nuneʼe, oinsá mak ita bele hatudu katak ita hadomi tebes ita-nia Aman iha lalehan, Jeová? Jesus hatete katak ita tenkesér hadomi Jeová ho buat hotu neʼebé ita iha. Neʼe hatudu katak ita tenkesér hadomi nia liu buat hotu. Iha lisaun uluk, ita aprende ona kona-ba dalan haat neʼebé Jeová hatudu ninia domin ba ninia oan sira. Agora mai ita haree toʼok oinsá mak ita bele hametin ita-nia domin ba nia no oinsá mak ita bele hatudu katak ita hadomi nia iha dalan neʼebé nia simu.
AGRADESE BA JEOVÁ TAU MATAN ITA
5. Se ita hanoin kona-ba buat sira neʼebé Jeová halo ba ita, neʼe book ita atu halo saida?
5 Bainhira ita simu prezente ida, ita halo saida ho prezente neʼe? Dala barak ita hatudu ita-nia agradese uluk ba prezente neʼe, loos ka lae? Tuirmai, ita hakarak uza prezente neʼe ho kuidadu. Dixípulu Tiago hatete: “Prezente diʼak ida-idak no prezente hotu neʼebé kompletu mak husi leten, no tun mai husi ida neʼebé mak Aman ba naroman lalehan nian; nia la hanesan ho lalatak, no nia la muda ka la troka.” (Tiago 1:17) Jeová sempre fó buat neʼebé ita presiza atu moris no kontente. Neʼe book ita hakarak hadomi fali nia, loos ka lae?
6. Ema Izraél sira presiza halo saida atu bele kontinua simu Jeová nia bensaun?
6 Iha tinan atus ba atus nia laran, Jeová tau matan ho domin ba ema Izraél sira. Jeová fó bensaun barak tebes ba sira iha sira-nia presiza loroloron nian no mós iha dalan espirituál nian. (Deuteronômio [Ulangan] 4:7, 8) Maibé, atu bele simu nafatin Jeová nia bensaun, sira presiza halo tuir Jeová nia Ukun-Fuan. Porezemplu, sira presiza hasaʼe beibeik husi sira-nia rai “buat diʼak liu hotu husi fuan primeiru” ba Jeová. (Êxodo [Keluaran] 23:19) Hodi halo hanesan neʼe mak ema Izraél sira hatudu ba Jeová katak sira hafolin tebes Jeová nia domin no bensaun neʼebé nia fó ba sira.—Lee Deuteronômio (Ulangan) 8:7-11.b
7. Oinsá mak ita bele uza sasán neʼebé ita iha atu hatudu domin ba Jeová?
7 Oinsá ho ita? Ohin loron ita la presiza halo buat neʼebé ema Izraél uluk halo atu hasaʼe buat ruma ba Jeová, maibé ita bele hatudu nafatin ita-nia domin ba Maromak liuhusi fó buat neʼebé mak iha folin boot husi ita. (Provérbios [Amsal] 3:9) Entaun, iha dalan saida mak ita bele halo nuneʼe? Ita bele uza sasán neʼebé ita iha atu fó apoia ba Maromak nia serbisu sira iha ita-nia fatin ka iha mundu tomak. Maski ita fó uitoan ka barak, ida-neʼe mak dalan neʼebé diʼak tebes atu hatudu ita-nia domin ba Jeová. (2 Korinto 8:12) Maibé, iha dalan seluk tan atu ita bele hatudu ba Jeová katak ita hadomi nia.
8, 9. Oinsá fiar liga ho ita-nia domin ba Jeová? Fó toʼok ezemplu.
8 Jesus fó-hanoin mai ita katak buat neʼebé ita presiza halo mak kontinua buka uluknanain Maromak nia Ukun, maibé la presiza hanoin beibeik kona-ba atu han saida ka hatais saida. Nia dehan tanba Aman hatene buat saida mak ita presiza. (Mateus 6:31-33) Ita-nia fiar ba buat neʼebé Jeová promete mak hatudu ita-nia domin neʼebé kleʼan ba nia tanba fiar laʼo hamutuk ho domin. Hanoin toʼok ita bele hadomi ema ida ka lae se ita la fiar ema neʼe? (Salmo [Mazmur] 143:8) Tan neʼe diʼak atu husu ba ita-nia an: ‘Haʼu-nia planu ba moris ka dalan neʼebé haʼu moris hatudu duni katak haʼu hadomi Jeová ka lae? Buat neʼebé haʼu halo loroloron, hatudu duni katak haʼu iha fiar ba Jeová nia kbiit atu tau matan ba haʼu-nia presiza ka lae?’
9 Irmaun ida naran Mike hatudu duni ninia domin no fiar ba Jeová. Husi joven kedas Mike iha ona hakarak atu serbí Jeová iha rai seluk. Maski ikusmai nia kaben ho oan naʼin-rua ona, ninia hakarak neʼe iha nafatin. Tanba lee no rona beibeik esperiénsia kona-ba irmaun-irmán sira neʼebé serbí iha rai neʼebé presiza haklaken-naʼin, nia no ninia família foti desizaun ida atu halo simples sira-nia moris. Sira faʼan tiha sira-nia uma no muda ba fatin kiʼik ida. Nia halo kiʼik ninia kontratu no aprende atu uza internét deʼit hodi tau matan ba ninia negósiu husi rai seluk. Ikusmai sira muda duni ba rai seluk no serbí tiha ho haksolok ba tinan rua. Mike hatete: “Ami esperiénsia rasik Jesus nia liafuan neʼebé nia hatete iha Mateus 6:33 mak loos.”
HANOIN DIDIʼAK KONA-BA JEOVÁ NIA HANORIN
10. Haree husi Liurai David nia ezemplu, tanbasá mak diʼak atu hanoin didiʼak kona-ba Jeová?
10 Uluk, Liurai David hanoin didiʼak tiha kona-ba Jeová nia matenek liuhusi ninia kriasaun sira, neʼe halo nia hakarak hakbesik no hatudu ninia domin ba Jeová. Nia hatete: “Lalehan fó sai Maromak nia glória; no lalehan dehan sai serbisu neʼebé nia halo ho ninia liman. Jeová nia lei mak perfeitu, halo ema iha kbiit fali. Jeová nia liafuan neʼebé fó-hanoin ema, ita bele fiar, halo ema neʼebé la iha esperiénsia sai matenek. Haʼu hein katak liafuan husi haʼu-nia ibun no hanoin iha haʼu-nia laran sai buat neʼebé monu loos ba Ita, oh, Jeová, haʼu-nia Fatuk no haʼu-nia Naʼi neʼebé Sosa Fali haʼu.” Husi liafuan sira-neʼe ita bele haree katak David iha duni relasaun neʼebé diʼak ho Jeová.—Salmo (Mazmur) 19:1, 7, 14.
11. Oinsá mak ita bele uza koñesimentu neʼebé ita simu husi Jeová atu hatudu fali domin ba nia? (Haree foto iha pájina 23.)
11 Ohin loron, Jeová fó ona koñesimentu barak mai ita kona-ba ninia kriasaun no ninia planu sira. Mundu neʼe book ema atu buka edukasaun boot, maibé ita haree ona esperiénsia barak neʼebé hatudu katak sira neʼebé buka tuir edukasaun boot, ikusmai lakon sira-nia fiar no domin ba Jeová. Bíblia anima ita laʼós atu buka koñesimentu deʼit, maibé buka mós matenek no komprensaun, hodi ita bele uza koñesimentu neʼebé ita aprende husi Maromak iha ita-nia moris no atu ajuda ema seluk. (Provérbios [Amsal] 4:5-7) Bíblia hatete katak Maromak nia “hakarak mak atu ema hotu hetan salvasaun no hatene didiʼak kona-ba lia-loos”. (1 Timóteo 2:4) Tan neʼe mak ita hakarak haklaken ho laran ba ema no ajuda sira komprende kona-ba Maromak nia hakarak ba ema hotu, neʼe mak dalan neʼebé ita hatudu ita-nia domin ba Jeová.—Lee Salmo (Mazmur) 66:16, 17.c
12. Oinsá mak alin feto ida hatudu katak nia hafolin prezente neʼebé Jeová fó ba nia?
12 Labarik sira mós bele hatudu sira-nia domin ba Jeová liuhusi hatudu katak sira hafolin buat neʼebé Jeová hanorin sira. Shannon sei hanoin-hetan bainhira nia sei tinan 11. Nia ho ninia alin-feto ida neʼebé foin tinan 10 bá tuir reuniaun boot loron tolu nian ho sira-nia inan-aman. Reuniaun boot nia tema mak “Godly Devotion”. Iha diskursu ida, sira husu labarik hotu atu tuur iha fatin espesiál ida. Nia tuir sira bá, maibé ninia laran tuku-tuku tebes. Tuirmai, sira fó ba labarik, livru ida-idak nuʼudar prezente furak ida ba sira, livru neʼe ho títulu Pertanyaan Kaum Muda—Jawaban yang Praktis. Livru neʼe halo Shannon sente oinsá kona-ba Jeová? Nia dehan: “Iha tempu neʼebá mak haʼu foin sente katak Jeová iha duni no nia hadomi tebetebes haʼu. Ita agradese tebes ba Maromak Jeová hodi fó ita prezente neʼebé diʼak no furak tebes!”
SIMU KONSELLU NO DIXIPLINA HUSI MAROMAK
13, 14. Oinsá mak ita bele hatudu ita-nia domin ba Jeová liuhusi rona ninia konsellu sira?
13 Bíblia hatete katak “Jeová fó dixiplina ba ema neʼebé nia hadomi hanesan aman ida fó dixiplina ba oan neʼebé monu loos ba nia laran”. (Provérbios [Amsal] 3:12) No apóstolu Paulo dehan katak “dixiplina hotu la lori ksolok iha tempu neʼe, só halo moras deʼit; maibé ikusmai sira neʼebé simu treinu husi dixiplina neʼe sei fó fuan dame nian, katak hahalok loos”. (Ebreu 12:11) Dixiplina mak hanesan treinu ida husi Jeová. Tan neʼe, ita labele sai hirus ka la liga bainhira ita simu konsellu ruma husi Jeová. Ba ema balu, neʼe difisil atu halo tuir, maibé tanba ita hadomi Jeová, ita-nia domin sei ajuda ita atu halo tuir konsellu sira-neʼe.
14 Iha Malaquias nia tempu, ema judeu barak la hafolin Jeová nia konsellu. Sira hatene katak Moisés nia Ukun-Fuan fó matadalan kona-ba hasaʼe sakrifísiu sira, maibé sira la fó laran atu halo tuir ukun-fuan sira-neʼe. Tan neʼe Jeová fó konsellu neʼebé makaʼas ba sira. (Lee Malaquias [Maleakhi] 1:12, 13.d) Maski Jeová fó konsellu beibeik ba sira, maibé sira la rona nafatin, neʼe lori konsekuénsia neʼebé todan ba sira rasik. Rona toʼok saida mak Jeová hatete ba sira: “Haʼu sei haruka malisan ba imi, no haʼu sei troka imi-nia bensaun ba fali malisan. Loos duni, haʼu troka ona imi-nia bensaun sira ba malisan, tanba imi la tau haʼu-nia mandamentu neʼe iha imi-nia laran.” (Malaquias [Maleakhi] 2:1, 2) Husi neʼe ita bele haree katak se ita mak iha toman ka ho neon la liga ka la rona ba Jeová nia konsellu sira, neʼe sei lori konsekuénsia neʼebé sériu ba ita rasik.
Halo tuir Jeová nia konsellu duké halo tuir mundu (Haree parágrafu 15)
15. Ita presiza kuidadu kona-ba hahalok saida husi Satanás nia mundu neʼe?
15 Iha Satanás nia mundu, ema hanoin diʼak ba sira-nia an deʼit no foti-an. Sira la gosta ema seluk atu korrije ka fó konsellu ba sira, sá tan atu rona. Maski iha ema balu simu, maibé sira simu ho muramura deʼit. Bíblia fó konsellu ba ema kristaun katak “keta halo tuir mundu ohin neʼe nian”, maibé “hatene ho loloos kona-ba Maromak nia hakarak neʼebé diʼak no loos”. (Roma 12:2) Liuhusi ninia organizasaun Jeová sempre fó konsellu neʼebé ita presiza iha tempu neʼebé loos. Porezemplu, nia fó-hanoin ita kona-ba ita tenke iha hahalok saida bainhira hamutuk ho feto ka mane ida, ransu, no atividade halimar nian. Bainhira ita rona no halo tuir konsellu sira-neʼe ho laran, ita hatudu katak ita hadomi Jeová husi laran.—João 14:31; Roma 6:17.
BUKA PROTESAUN NO SALVASAUN HUSI JEOVÁ
16, 17. (a) Tanbasá mak ita tenke hanoin uluk kona-ba Jeová nia hakarak antes atu halo desizaun ruma? (b) Oinsá mak ema Izraél hatudu katak sira laiha domin no la tau fiar ba Jeová?
16 Bainhira labarik haree perigu ruma, sira halai kedas ba sira-nia inan-aman. Nuʼudar sira sai boot ba daudaun, sira mós aprende oinsá atu halo desizaun rasik. Maibé se sira mak iha relasaun neʼebé diʼak ho inan-aman, sira sempre koʼalia nakloke ba inan-aman hodi husu sira-nia hanoin antes atu foti desizaun ruma. Hanesan neʼe mós ho ita, Jeová fó liberdade ba ita hotu atu halo desizaun rasik. Se ita iha domin no tau fiar ba nia, nia sei fó espíritu santu atu ajuda ita halo desizaun. Maibé se ita mak la hanoin uluk kona-ba Jeová nia hanoin ka hakarak antes halo desizaun ruma hodi halo tuir deʼit ita rasik nia hakarak, neʼe hatudu katak ita laiha fiar no domin ba Jeová.—Filipe 2:13.
17 Iha Samuel nia tempu, ema Izraél lakon funu hasoru ema Filístia sira. Duké bá husu Jeová saida mak sira presiza halo, sira dehan: “Mai ita bá lori Jeová nia arka aliansa husi Silo, atu hamutuk ho ita no salva ita husi inimigu nia liman.” Neʼe lori rezultadu saida ba sira? “Funu neʼe oho ema barak; husi Izraél, soldadu laʼo-ain naʼin-30.000 mak mate. No Maromak nia Arka mós ema prende tiha.” (1 Samuel 4:2-4, 10, 11) Ema Izraél sira hanoin katak se sira lori Maromak nia Arka bá ho sira, neʼe hanesan sira buka ona Jeová nia ajuda. Maibé tuir loloos sira halo tuir deʼit sira rasik nia hanoin, laʼós liuhusi Jeová nia hakarak, tan neʼe mak neʼe sai azár boot ida ba sira.—Lee Provérbios (Amsal) 14:12.e
18. Bíblia hatete saida kona-ba tau fiar ba Jeová?
18 Ema neʼebé hakerek salmu hatete: “Hein ba Maromak, tanba haʼu sei hahiʼi tan nia nuʼudar haʼu-nia salvadór neʼebé boot. Haʼu-nia Maromak, haʼu iha susar laran. Tan neʼe mak haʼu hanoin-hetan Ita.” (Salmo [Mazmur] 42:5, 6) Neʼe mak sentimentu no domin neʼebé kleʼan tebes ba Jeová! Ita mós iha domin no fiar hanesan neʼe ba Jeová ka lae? Karik ita rasik sente katak ita iha duni domin no fiar ba Jeová, maibé Bíblia dehan katak ita sei bele tau fiar liután ba Jeová. Eskritura hatete: “Tau fiar ba Jeová ho ó-nia laran tomak no labele sadere ba ó-nia matenek rasik. Iha ó-nia dalan hotu tau atensaun ba nia, no nia rasik sei halo ó-nia dalan sai loos.”—Provérbios (Amsal) 3:5, 6.
19. Iha dalan saida deʼit mak Ita rasik hakarak hatudu Ita-nia domin ba Jeová?
19 Hodi hatudu uluk ninia domin mai ita, Jeová hanorin ita oinsá atu hatudu fali ita-nia domin ba nia. Mai ita hotu hanoin nafatin kona-ba Jeová nia ezemplu diʼak neʼe. Mai ita hatudu ita-nia domin liután ba nia ‘ho ita-nia laran tomak, ho ita-nia moris tomak, ho ita-nia neon tomak, no ho ita-nia kbiit tomak.’—Marcos 12:30.
a Miquéias 6:8: “Hei ó ema, nia hatete ona ba ó saida mak diʼak. No saida mak Jeová hakarak ó atu halo? Nia hakarak deʼit ó halo hahalok loos, hafolin laran-metin, no laʼo ho ó-nia Maromak ho haraik-an!”
b Deuteronômio 8:7-11: “7 Tanba Jeová, imi-nia Maromak, sei lori imi atu tama rai neʼebé diʼak, rai ho mota sira, be matan barak no be barak, neʼebé suli husi área foho nian no rai tetuk iha foho leet sira, 8 rai ho trigu, sevada, uvas, figeira no romaun, rai ho mina oliveira no bani-been, 9 iha rai neʼebé la menus hahán no la menus buat ida, rai neʼebé ho fatuk besi no husi ninia foho sira imi sei su’u riti. 10 Depois imi han tiha no bosu, imi sei hahiʼi Jeová, imi-nia Maromak ba rai diʼak neʼebé nia fó ba imi. 11 Kuidadu imi-nia an atu imi labele haluha Jeová, imi-nia Maromak, hodi la halo tuir ninia mandamentu, ninia lei no regra neʼebé haʼu hatoʼo ba imi iha loron neʼe.”
c Salmo 66:16, 17: “16 Mai, no rona bá, imi hotu neʼebé taʼuk ba Maromak, haʼu sei konta ba imi buat neʼebé nia halo ona ba haʼu.17 Haʼu bolu nia ho haʼu-nia ibun, no haʼu hahiʼi nia ho nanál.”
d Malaquias 1:12, 13: “12 Maibé imi hotu hafoʼer haʼu hodi hatete, ‘Jeová nia meza mak foʼer, no ai-fuan, hahán, mak buat neʼebé aat.’ 13 No imi hatete: ‘Haree! Ida-neʼe halo ita kole tebes!’ no imi la simu ida-neʼe,” Jeová, Naʼi funu-naʼin hatete. ‘No imi lori buat neʼebé hadau tiha, no ain-aat, no moras; sin, imi lori buat neʼe nuʼudar prezente. Haʼu bele haksolok hodi simu buat neʼe husi imi-nia liman ka lae?’ Jeová hatete.”
e Provérbios 14:12: “Iha dalan neʼebé loos tuir ema nia haree, maibé dalan neʼe nia rohan mak lori ba mate.”