INFORMASAUN IHA OIN | TANBASÁ MAK JESUS TERUS NO MATE?
Neʼe akontese duni ka lae?
Maizumenus iha fulan-Marsu iha tinan 33, ema oho Jesus Nazaré. Antes neʼe, sira duun matak nia, baku nia, no hedi nia iha ai-riin ida. Maibé Maromak halo nia moris hiʼas fali, no loron 40 liu tiha, nia saʼe ba lalehan.
Istória neʼe hakerek iha Evanjellu haat husi Bíblia. Maibé ema barak husu: Neʼe akontese duni ka lae? Pergunta neʼe importante tebes, tanba se istória neʼe mak ema inventa deʼit, entaun ema kristaun hotu nia fiar sai saugati, no esperansa ba moris rohan-laek mós sai hanesan mehi deʼit. (1 Korinto 15:14) Maibé, se neʼe mak loloos akontese duni, neʼe loke dalan ba ita ema atu iha esperansa ba futuru neʼebé furak tebes. Tuir Ita-nia hanoin, istória neʼe tebes ka lae?
EVIDÉNSIA SIRA
Evanjellu sira la hanesan ho avó sira-nia istória neʼebé dala ruma ema inventa deʼit. Evanjellu sira-neʼe fó sai informasaun sira neʼebé loos hotu. Porezemplu, sira fó sai fatin oioin nia naran neʼebé ema barak ohin loron bele bá vizita. Livru sira-neʼe mós temi ema oioin nia naran, neʼebé mós temi iha livru istória sira seluk.—Lucas 3:1, 2, 23.
Livru istória balu iha tempu antigu nian mós temi kona-ba Jesus.a Kona-ba dalan neʼebé Jesus hetan kastigu-mate, neʼe tuir duni dalan neʼebé estadu Roma fó kastigu-mate ba ema kriminozu sira iha tempu neʼebá. Liután neʼe, Evanjellu fó sai apóstolu sira-nia sala oioin, neʼe hatudu katak istória neʼe hakerek iha dalan neʼebé la subar buat ida. (Mateus 26:56; Lucas 22:24-26; João 18:10, 11) Evidénsia sira-neʼe hatudu mai ita katak istória iha Evanjellu laʼós istória bosok, maibé fó sai istória neʼebé akontese duni ba Jesus.
JESUS MORIS HIʼAS DUNI KA LAE?
Ema barak simu katak Jesus moris no mate, maibé ema balu la simu katak Jesus moris hiʼas fali husi mate. Tuir loloos, Jesus nia apóstolu sira mós foufoun sente susar atu fiar katak Jesus moris hiʼas fali. (Lucas 24:11) Maibé tanba sira haree Jesus ho sira-nia matan rasik, ida-neʼe halo sira fiar duni. Loron ida, Jesus mosu fali iha ema naʼin-500 nia oin.—1 Korinto 15:6.
Ida-neʼe book Jesus nia dixípulu sira atu haklaken kona-ba Jesus ho aten-brani maski ema koko atu oho sira. Loloos, sira mós haklaken ba ema sira neʼebé oho Jesus. (Apóstolu 4:1-3, 10, 19, 20; 5:27-32) Entaun hanoin toʼok: Se istória kona-ba Jesus nia moris-hiʼas mak bosok deʼit, ninia dixípulu sira sei haklaken ho aten-brani hanesan neʼe ka lae? Lae. Maibé tanba Jesus nia moris-hiʼas mak akontese duni, neʼe halo ema kristaun sira habelar Jesus nia hanorin iha mundu tomak.
Kuandu ita lee ho didiʼak informasaun iha Evanjellu kona-ba Jesus nia mate no moris-hiʼas, ida-neʼe sei hametin ita-nia fiar katak istória neʼe akontese duni. Ita mós bele hametin liután ita-nia fiar ba Jesus se ita hatene ho loloos tanbasá mak Jesus mate no moris hiʼas. Informasaun tuirmai sei esplika kona-ba neʼe.
a Porezemplu, istória-naʼin ida naran Tácito, neʼebé moris maizumenus tinan 55 liutiha Kristu, hakerek katak, durante Tibério nia ukun, Pónsio Pilatos fó kastigu-mate ba Kristu. Liután neʼe, istória-naʼin sira husi tempu neʼebá, Suetónio, Josefo, no governadór Bitínia nian naran Pilínio mós temi kona-ba Jesus iha sira-nia livru.