INFORMASAUN IHA OIN | LALEHAN MAK FATIN HANESAN SAIDA?
Pergunta sira kona-ba lalehan
Ita mós husu ona pergunta ruma kona-ba lalehan ka lae? Porezemplu, karik Ita hanoin: “Sé-sé deʼit mak hela iha lalehan?” Husi tempu ulukliu kedas toʼo ohin loron, ema koko atu siʼik no imajina buat oioin kona-ba lalehan. Ema balu fiar katak sira-nia beiʼala mak hela iha lalehan. Ema balu tan hanoin katak lalehan mak hela-fatin neʼebé furak no hakmatek ba anju no ema diʼak neʼebé mate ona. Ema seluk tan fiar katak lalehan mak hela-fatin ba maromak rihun ba rihun.
Ema barak hanoin: ‘Oinsá mak ita bele hatene kona-ba lalehan? La iha ema ida mak tun husi lalehan atu esplika kona-ba fatin neʼe.’ Maibé tuir loloos, antes Jesus moris iha mundu, nia hela iha lalehan. Nia hatete ba ulun-naʼin relijiaun judeu sira: “Haʼu tun mai husi lalehan laʼós atu halo haʼu-nia hakarak, maibé atu halo ida neʼebé haruka haʼu mai nia hakarak.” Jesus mós hatete ba ninia apóstolu sira kona-ba buat neʼebé nia haree rasik: “Iha haʼu-nia Aman nia uma iha fatin barak atu hela.”—João 6:38; 14:2.
Jesus nia Aman mak Maromak, neʼebé iha naran Jeová, no Jeová nia “uma” mak iha lalehan. (Salmo [Mazmur] 83:18) Tan neʼe, Maromak Jeová no Jesus Kristu mak hatene liu kona-ba lalehan, neʼebé ema nia matan la bele haree. Maromak ho Jesus fó-hatene ita buat barak kona-ba lalehan hodi fó vizaun oioin ba ema fiar-naʼin sira iha tempu antigu.
Informasaun tuirmai sei esplika kona-ba vizaun oioin neʼebé hakerek ona iha Bíblia laran. Maromak fó vizaun ba ema iha dalan neʼebé fasil ba sira atu komprende. Vizaun sira-neʼe sei ajuda ita atu hatene sé-sé deʼit mak hela iha lalehan. Maibé bainhira ita hanoin kleʼan kona-ba vizaun sira-neʼe, hanoin-hetan nafatin katak lalehan neʼebé temi iha eskritura sira-neʼe mak kona-ba fatin espíritu nian, laʼós buat neʼebé ita-nia matan bele haree.