Ita sai livre ona liuhusi Maromak nia laran-diʼak neʼebé boot
“Sala labele sai nuʼudar imi-nia naʼi, tanba . . . imi simu ona Maromak nia laran-diʼak neʼebé boot.”—ROMA 6:14.
1, 2. Eskritura iha Roma 5:12 ajuda ita iha dalan saida deʼit?
ESKRITURA iha Roma 5:12 hatete: “Liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.” Ita hatene didiʼak ona eskritura neʼe no ita mós sempre uza eskritura neʼe atu hanorin ema kona-ba Bíblia.
2 Livru Tuir Loloos, Saida mak Bíblia Hanorin? uza beibeik eskritura neʼe. Bainhira ita uza —kapítulu 3, 5, no 6 husi livru neʼe atu estuda ho ita-nia oan ka ema seluk, dala barak ita lee Roma 5:12. Karik ita uza eskritura neʼe atu esplika ba sira tansá mak mundu neʼe laʼós tan paraízu, tanbasá mak Jesus tenke mate ba ita, no tanbasá mak ita mate. Maibé eskritura neʼe mós bele ajuda ita atu hatudu agradese tanba iha relasaun neʼebé diʼak ho Jeová, hametin ita-nia hakarak atu halo tuir nia, no tau esperansa ba buat hotu neʼebé nia promete ona ba ita iha futuru.
3. Ita tenke rekoñese saida kona-ba ita-nia an?
3 Ita hotu sala-naʼin, no ita halo sala loron ba loron. Maibé Jeová laran-sadiʼa, nia hatene katak ita la perfeitu no nia hakarak fó perdua ba ita-nia sala. (Salmo [Mazmur] 103:13, 14) Jesus hatete katak ita tenke husu Jeová atu fó perdua ba ita-nia sala sira. (Lucas 11:2-4) Tan neʼe, se Jeová fó ona perdua ba sala sira neʼebé uluk ita halo, ita la presiza rai beibeik sala sira-neʼe iha ita-nia laran. Agora mai ita haree toʼok tanbasá mak Jeová bele fó perdua ba ita.
TANBASÁ JEOVÁ BELE FÓ PERDUA
4, 5. (a) Saida mak bele ajuda ita atu komprende Roma 5:12? (b) Esplika toʼok saida mak “laran-diʼak neʼebé boot”.
4 Eskritura sira iha Roma, liuliu kapítulu 6 ajuda ita atu komprende tanbasá mak Jeová bele fó perdua ba ita-nia sala sira. Iha kapítulu 3 dehan katak “ema hotu halo sala ona” maibé tuirmai eskritura dehan: “Maromak haree sira nuʼudar ema loos tanba folin neʼebé Kristu Jesus selu ona atu salva sira. Neʼe mak prezente ida neʼebé Maromak fó tanba ninia laran-diʼak neʼebé boot.” (Roma 3:23, 24) Liafuan “laran-diʼak neʼebé boot” iha lia-gregu fó ideia kona-ba halo buat ruma ho laran-diʼak no la husu kolen, buat neʼebé ema halo ho hakarak rasik ba ema neʼebé la serve atu simu.
5 Matenek-naʼin John Parkhurst hatete katak bainhira Bíblia temi Maromak ka Kristu nia laran-diʼak neʼebé boot, dala barak neʼe koʼalia kona-ba buat neʼebé sira halo ona hodi salva ema husi sala no mate. Mai ita haree toʼok Maromak halo ona saida ba ita no oinsá mak ninia laran-diʼak neʼebé boot ajuda ita ohin loron no fó esperansa saida ba ita iha futuru.
6. Maromak nia laran-diʼak neʼebé boot lori bensaun ba sé deʼit, no oinsá?
6 Liuhusi Adão mak sala no mate hadaʼet ba ema hotu iha mundu neʼe. Tan neʼe mak Bíblia dehan katak “liuhusi ema ida nia sala mak mate ukun nuʼudar liurai”. Maibé Jeová hatudu laran-diʼak neʼebé boot hodi loke dalan atu salva ema hotu “liuhusi ema ida, Jesus Kristu”. (Roma 5:12, 15, 17) No “liuhusi ema ida deʼit [Jesus] neʼebé halo tuir, Maromak sei haree ema barak nuʼudar ema loos”. Sin, Jeová nia laran-diʼak neʼebé boot “lori moris rohan-laek liuhusi ita Naʼi Jesus Kristu”.—Roma 5:19, 21.
7. Tanbasá mak Jesus nia sakrifísiu hatudu sai Jeová nia laran-diʼak?
7 Tuir loloos Maromak Jeová la presiza fó ninia Oan-Mane nia moris ba ita. Maibé tanba ninia laran-diʼak neʼebé boot mak nia hakarak salva ita husi sala no mate. Ita hotu la serve atu simu buat neʼebé Jeová no Jesus halo ba ita. Tan neʼe mak ita agradese tebes ba sira tanba loke dalan hodi fó perdua ba ita-nia sala no bele iha esperansa atu moris ba nafatin! Mai ita hatudu ita-nia agradese ba Maromak liuhusi dalan neʼebé ita halaʼo ita-nia moris.
AGRADESE BA MAROMAK NIA LARAN-DIʼAK NEʼEBÉ BOOT
8. Ita lakohi atu iha hanoin hanesan saida?
8 Ita hatene katak Maromak hakarak fó perdua ba ita-nia sala sira, maski ita halo sala neʼebé boot. Maibé ita la bele aproveita Maromak nia laran-diʼak hodi hanoin katak la problema atu halo sala tanba Jeová sei fó perdua ba ita. Iha tempu neʼebé apóstolu balu sei moris, ema kristaun balu mós iha hanoin hanesan neʼe. (Lee Judas 4.) Ohin loron ita tenke kuidadu atu la husik ema seluk book ita atu iha hanoin hanesan neʼe hodi neineik-neineik hanoin neʼe sai buras iha ita-nia laran.
9, 10. Oinsá mak apóstolu Paulo no ema seluk sai husi sala no mate nia ukun?
9 Apóstolu Paulo mós hatete ba ema kristaun sira, se sira hanoin katak sira bele kontinua halo sala tanba Maromak sei fó perdua ba sira, neʼe hanoin neʼebé la loos. Apóstolu Paulo dehan katak sira tenke hakribi hanoin la loos neʼe tanba sira ‘mate ona ba sala’. (Lee Roma 6:1, 2, nota-rodapé.) Paulo nia liafuan neʼe katak sá?
10 Liuhusi Jesus nia sakrifísiu Maromak fó perdua ona ba Paulo no ema kristaun seluk iha sira-nia tempu. No Jeová uza espíritu santu hodi hili sira atu sai ninia oan. Se sira mak laran-metin toʼo mate, sira sei moris bá lalehan atu ukun hamutuk ho Kristu. Maibé iha tempu neʼebá, sira sei moris hela iha rai, entaun tanbasá mak nia dehan, “ita mate ba sala”? Atu esplika ba sira, Paulo uza Jesus nia ezemplu hodi hatudu ba sira katak sira-nia moris troka ona. Nia dehan katak bainhira Jesus mate, nia hetan moris-hiʼas ba lalehan nuʼudar espíritu neʼebé la bele mate tan. Hodi nuneʼe mak “mate la iha tan kbiit atu ukun nia”. Hanesan neʼe mós ho sira. Bainhira sira hetan kose-mina, sira-nia moris uluk nian mate ona. Sira la husik tan sira-nia hakarak isin nian atu kontrola sira. Komesa husi tempu neʼebé sira hetan kose-mina, sira hakarak hakaʼas an atu moris iha dalan neʼebé halo Maromak kontente. Sira “hanesan mate ona kona-ba sala”, maibé “moris atu halo Maromak nia hakarak liuhusi Kristu Jesus”.—Roma 6:9, 11.
11. Iha dalan saida mak ema kristaun ohin loron ‘mate ona ba sala’?
11 Oinsá ho ita? Ita mós “mate ba sala” ona ka lae? Antes sai ema kristaun neʼebé loos, karik ita halo ona buat barak neʼebé sala maibé ita la hatene katak Jeová hakribi hahalok sira-neʼe. Ita-nia moris uluk nian mak hanesan “atan ba buat la moos no kontra lei”, moris nuʼudar “atan ba sala”. (Roma 6:19, 20) Maibé bainhira ita aprende tiha lia-loos husi Bíblia, ita troka ita-nia moris, dedika ita-nia an ba Jeová, no hetan batizmu. Hahú husi tempu neʼebá ita hakarak atu halo tuir deʼit Jeová no moris tuir ninia hakarak. Ita “sai livre ona husi sala” hodi “sai atan ba Maromak no halo buat neʼebé loos”.—Roma 6:17, 18.
12. Ita ida-idak bele hili atu halo saida?
12 Maski ita “sai livre ona husi sala”, maibé ita iha nafatin liberdade atu hili. Tan neʼe Paulo dehan: “Keta husik sala ukun nafatin imi nuʼudar liurai iha imi-nia isin neʼebé sei mate, hodi halo tuir isin nia hakarak sira.” (Roma 6:12) Ita bele hili atu husik hanoin no hakarak neʼebé sala hodi kontrola ita, ka ita mak kontrola fali hahalok sira-neʼe. Husu ba ita-nia an: ‘Haʼu husik deʼit hakarak aat atu sai buras toʼo haʼu halo buat neʼebé sala ka lae? Ka haʼu halakon kedas hakarak aat sira-neʼe?’ Se ita mak agradese tebes ba Maromak Jeová nia laran-diʼak neʼebé boot, ita sei hakaʼas an atu halo nia kontente.
ITA BELE MANÁN HASORU SALA
13. Tanbasá mak ita fiar katak ita bele halo buat neʼebé loos?
13 Iha apóstolu sira-nia tempu, ema balu husi kongregasaun Korinto uluk moris nuʼudar naʼok-teen, omoseksuál, halo sala-foʼer ho kaben-naʼin, adora estátua, lanu-teen no halo hahalok aat seluk hanesan neʼe. Maibé bainhira sira hatene ona no hadomi Jeová, sira troka sira-nia moris. Sira sente moe kona-ba buat sira neʼebé uluk sira halo. (Roma 6:21; 1 Korinto 6:9-11) Ema kristaun iha Roma mós presiza halo mudansa ba sira-nia moris. Paulo hatete ba sira: “Keta kontinua fó imi-nia liman-ain ba sala nuʼudar kroʼat atu halo hahalok la loos. Maibé fó imi-nia an ba Maromak nuʼudar ema sira neʼebé moris ona husi mate, no mós fó imi-nia liman-ain ba Maromak nuʼudar kroʼat atu halo hahalok loos.” (Roma 6:13) Paulo tau fiar ba sira katak sira bele halo buat neʼebé loos no kontinua atu simu Maromak nia laran-diʼak neʼebé boot.
14, 15. Ita bele husu ba ita-nia an kona-ba pergunta saida deʼit?
14 Hanesan neʼe mós ohin loron, iha irmaun-irmán balu neʼebé uluk halaʼo moris neʼebé hanesan ho ema Korinto antes hetan lia-loos. Maibé bainhira sira hatene tiha Jeová, sira troka sira-nia moris no “fase moos ona”. Ita hotu presiza troka ita-nia moris hodi Jeová simu ita. Ohin loron ita hakarak fó agradese ba Maromak tanba nia hatudu ona laran-diʼak neʼebé boot no fó ona perdua ba ita-nia sala. Tan neʼe, mai ita hakaʼas an atu luta hasoru hakarak neʼebé aat no uza ita-nia moris atu serbí Jeová.
15 Ita labele halo ho neon sala boot neʼebé ema balu iha Korinto halo. Ita labele kontinua halo sala sira-neʼe hodi hanoin katak tanba Maromak nia laran-diʼak neʼebé boot, entaun nia sei fó perdua ba ita. Maibé oinsá kona-ba sala sira neʼebé ema balu hanoin ladún todan? Ita mós hakarak hakaʼas an atu halo tuir Jeová hodi la halo sala sira-neʼe ka lae?—Roma 6:14, 17.
16. Oinsá mak ita hatene katak ita tenke hasees an husi sala seluk tan neʼebé la temi iha 1 Korinto 6:9-11?
16 Hanoin toʼok kona-ba apóstolu Paulo. Nia dehan: “Haʼu mak isin nian, no faʼan ona hodi sai atan ba sala. Haʼu la hatene saida mak haʼu halo. Basá buat neʼebé haʼu hakarak, haʼu la halo; maibé buat neʼebé haʼu odi, haʼu halo.” (Roma 7:14, 15) Maski Paulo la halo buat sira neʼebé temi iha 1 Korinto 6:9-11, maibé nia rekoñese katak nia sala-naʼin nafatin. Nia hakarak Jeová simu nia, tan neʼe mak nia luta makaʼas hasoru hahalok aat sira. (Lee Roma 7:21-23.) Mai ita banati-tuir ninia ezemplu no hakaʼas an atu halo tuir Jeová ho laran.
17. Tanbasá mak Ita hakarak laran-moos?
17 Porezemplu, hanoin toʼok kona-ba hahalok laran-moos. Jeová hakarak ita atu laran-moos. (Lee Provérbios [Amsal] 14:5;a Éfeso 4:25.) Ita lakohi atu sai hanesan Satanás, “bosok-teen no lia-bosok nia aman”. No ita mós presiza hanoin-hetan katak Ananias ho ninia feen mate tanba sira bosok. Tan neʼe ita lakohi bosok. (João 8:44; Apóstolu 5:1-11) Maibé laran-moos laʼós kona-ba bosok deʼit. Se ita hatudu agradese ba Maromak nia laran-diʼak neʼebé boot, ita hakarak atu laran-moos iha buat hotu.
18, 19. Laran-moos katak sá?
18 Ema neʼebé la bosok mós bele sai laran la moos. Porezemplu, Jeová hatete ba ema Izraél sira: “Imi labele naʼok, imi labele lohi, no imi labele hamatak imi-nia maluk.” Tanbasá mak Jeová hakarak sira halo nuneʼe? Jeová dehan: “Imi tenke sai santu, tanba haʼu, Jeová imi-nia Maromak mak santu.” (Levítico [Imamat] 19:2, 11) Maski ita la koʼalia bosok, maibé se ita mak halo ema seluk fiar kona-ba buat neʼebé la loos, neʼe hatudu katak ita laiha laran neʼebé moos.
Ita sei hakaʼas an atu la bosok no lohi ka lae? (Haree parágrafu 19)
19 Porezemplu, hanoin toʼok se ema ida fó-hatene ba ninia patraun ka kolega serbisu sira, katak aban nia la bele tama serbisu, ka nia tenke fila sedu husi serbisu tanba nia atu bá doutór. Maibé tuir loloos, nia bá atu foti deʼit ai-moruk, ka bá atu selu deʼit. Ninia hakarak loloos mak atu bá pasiar ho ninia família. Karik nia la koʼalia bosok bainhira nia dehan nia atu “bá doutór”, maibé nia laran-moos ka lae? Ka nia lohi ema atu halo sira fiar buat seluk? Dala ruma ema lohi tanba taʼuk atu hetan kastigu, ka sira hakarak hetan buat ruma husi ema seluk. Maibé ita halo tuir Jeová nia liafuan: “Imi labele lohi.” Ita mós hakarak halo tuir Roma 6:19 neʼebé dehan: “Fó imi-nia liman-ain nuʼudar atan ba buat loos hodi halo hahalok santu.”
20, 21. Atu hatudu agradese ba Maromak nia laran-diʼak neʼebé boot, ita presiza hasees an husi saida tan?
20 Ita-nia agradese ba Maromak nia laran-diʼak neʼebé boot laʼós deʼit book ita atu hasees an husi sala boot sira hanesan sala-foʼer, lanu no sala sira seluk neʼebé ema Korinto halo. Ita hakaʼas an atu la halo buat naran deʼit neʼebé Jeová la gosta. Porezemplu, ita laʼós deʼit atu hasees an husi sala-foʼer maibé ita mós sei la halo atividade halimar nian neʼebé la morál. Ita sei la hemu-lanu, maibé ita mós sei la hemu barak toʼo besik atu sai lanu. Presiza duni hakaʼas an atu luta hasoru buat aat sira-neʼe, maibé ita bele manán duni.
21 Ita-nia hakarak mak atu hasees an husi sala hotu, boot no kiʼik. Maski ita hotu sala-naʼin, ita hakaʼas an atu halo hanesan apóstolu Paulo. Nia hatete: “Keta husik sala ukun nafatin imi nuʼudar liurai iha imi-nia isin neʼebé sei mate, hodi halo tuir isin nia hakarak sira.” (Roma 6:12; 7:18-20) Se ita luta makaʼas hasoru sala hotu, ita hatudu katak ita agradese ba Maromak nia laran-diʼak neʼebé boot liuhusi Kristu.
22. Se ita mak hatudu agradese ba Maromak nia laran-diʼak neʼebé boot, ita sei hetan kolen saida iha futuru?
22 Jeová fó ona perdua ba ita-nia sala sira no nia hakarak kontinua fó perdua ba ita. Ita agradese duni ba ninia laran-diʼak neʼebé boot, loos ka lae? Tan neʼe, mai ita hakaʼas an atu la halo buat neʼebé sala, maski ema seluk hanoin katak hahalok sira-neʼe mak sala neʼebé kiʼik deʼit. Atu nuneʼe, ita sei simu kolen iha futuru. Paulo dehan: “Tanba imi sai livre ona husi sala no sai atan ba Maromak, ida-neʼe lori imi ba moris santu, no ikusmai hetan moris rohan-laek.”—Roma 6:22.
a Provérbios 14:5 Sasin neʼebé laran-metin sei la koʼalia bosok, maibé ema neʼebé fó sasin falsu bosok deʼit kona-ba buat hotu.