Vizaun kona-ba kuda haat kona duni Ita!

Kuda haat halai makaʼas no halo tarutu boot! Dalan neʼebé Bíblia konta kona-ba kuda sira-neʼe halo ita sente hanesan sira halai daudauk iha ita-nia oin! Kuda primeiru mak mutin, no ida neʼebé saʼe kuda neʼe mak liurai neʼebé foin simu koroa furak. Kuda segundu mak kór mean lakan, no ida neʼebé saʼe kuda neʼe simu ona kbiit atu halakon dame husi mundu tomak. Tuirmai mak kuda metan. Ida neʼebé saʼe kuda neʼe kaer hela dasin, no lian ida fó sai katak hahán la iha. Kuda ikus mak kuda neʼebé kamutis. Neʼe mak sinál ba moras oioin, no ida neʼebé saʼe kuda neʼe mak Mate, no Rate halai tuir nia!—Apokalipse 6:1-8.

“Bainhira haʼu foin lee kona-ba kuda haat neʼe, haʼu sai taʼuk tebes. Haʼu sente katak lakleur tan ema hotu sei hetan tesi-lia, no tanba haʼu la prontu, haʼu hanoin haʼu sei mate.”​—Crystal.

“Haʼu gosta vizaun kona-ba kuda haat ho kór oioin. No bainhira haʼu komprende ho loloos vizaun neʼe katak sá, haʼu sente kontente tebes.”​—Ed.

Oinsá ho Ita? Vizaun kona-ba kuda haat iha livru Apokalipse halo Ita sente taʼuk hanesan Crystal? Ka Ita sente hanesan Ed? Tuir loloos, vizaun kona-ba kuda haat neʼe mak vizaun importante ida husi livru Apokalipse, livru ikus husi Bíblia. Oinsá mak Ita rasik bele hetan benefísiu hodi komprende didiʼak vizaun ida-neʼe? Maromak promete katak, se ita lee no halo tuir buat neʼebé hakerek iha livru Apokalipse, ita sei hetan haksolok neʼebé loos.​—Apokalipse 1:1-3.

Maski vizaun kona-ba kuda haat halo ema balu sente taʼuk, maibé tuir loloos, vizaun neʼe ajuda ona ema barak atu hametin sira-nia fiar no fó esperansa kona-ba futuru neʼebé kapás. Tan neʼe, ami hakarak Ita atu lee informasaun tuirmai neʼe.