MATAN-MORIS BÁ NAFATIN!
Funu iha Ukránia hamosu krize ai-han iha mundu tomak
Iha 19 Maiu 2022, Konsellu Seguransa ONU rona husi membru naʼin-75 liu neʼebé tuir enkontru neʼe katak “krize ai-han neʼebé mosu tanba pandemia COVID-19 sai aat liu iha mundu tomak tanba funu neʼebé akontese iha Ukránia, toʼo sei mosu rai-hamlaha iha nasaun balu”. Lakleur depois neʼe, revista The Economist fó sai katak “iha mundu neʼebé nakonu ona ho susar, funu sei halo ema barak liután kona situasaun hamlaha”. Bíblia fó-hatene nanis katak rai-hamlaha sei mosu iha ita-nia tempu, no Bíblia mós fó ajuda mai ita atu bele tahan situasaun susar neʼe.
Bíblia fó-hatene nanis kona-ba krize ai-han
Jesus dehan: “Nasaun ida sei kontra nasaun seluk no ukun ida sei kontra ukun seluk, no rai-hamlaha . . . sei mosu iha fatin oioin.”—Mateus 24:7.
Livru Apokalipse koʼalia kona-ba kuda simbóliku haat. Kuda sira-neʼe ida no ema neʼebé saʼe kuda neʼe reprezenta funu. Kuda ida seluk neʼebé tuir kuda neʼe reprezenta rai-hamlaha, neʼe katak susar ba ema atu hetan ai-han no ninia folin saʼe makaʼas. “Haʼu hateke no haree kuda metan ida mai. Ida neʼebé saʼe kuda neʼe kaer hela dasin iha ninia liman. Haʼu rona lian ida . . . neʼebé dehan: ‘Trigu kilograma ida folin denáriu ida [neʼe mak folin hanesan saláriu loron ida nian] no sevada kilograma tolu folin denáriu ida. Keta estraga mina-oliveira no tua-uvas.’”—Apokalipse 6:5, 6.
Bíblia nia profesia kona-ba krize ai-han sai loos daudaun ohin loron iha tempu neʼebé Bíblia bolu nuʼudar “loron ikus sira”. (2 Timóteo 3:1) Atu buka-hatene liután kona-ba “loron ikus sira” no kuda haat iha livru Apokalipse, haree vídeo Mundu nia situasaun troka ona husi tinan 1914 no lee informasaun “Kuda haat husi livru Apokalipse—Sira reprezenta saida?”
Oinsá mak Bíblia bele ajuda
Bíblia fó sai matadalan diʼak atu ajuda ita tahan hasoru susar oioin, inklui folin ai-han saʼe no menus ai-han. Haree ezemplu balu iha informasaun “Oinsá atu moris ho osan uitoan deʼit?”
Bíblia mós fó ita esperansa katak situasaun sei sai diʼak. Bíblia promete kona-ba tempu neʼebé “sei iha ai-han barak iha rai” no ema hotu sei kuda no han husi sira-nia toʼos. (Salmo 72:16) Atu aprende liután esperansa husi Bíblia kona-ba futuru no tanbasá Ita bele tau fiar, lee informasaun “Esperansa kapás iha futuru”.