Krize ai-han iha mundu tomak tanba funu no mudansa boot iha klima—Saida mak Bíblia dehan?

Funu iha Ukránia no mudansa boot iha klima kontinua hanetik makaʼas distribuisaun ba ai-han iha mundu tomak. Neʼe akontese liuliu iha rai kiak sira neʼebé susar ba ema barak atu hetan ai-han natoon ba moris loroloron nian.

• “Konflitu, mudansa boot iha klima, folin ba enerjia saʼe no buat seluk tan, afeta ba produsaun ai-han no ai-han sai menus ba beibeik.”—António Guterres, sekretáriu jerál Nasoins Unidas, 17 Jullu 2023.

• “Rúsia la hola parte ona iha akordu kona-ba esporta fini sira ho seguru husi Ukránia ba rai seluk. Matenek-naʼin sira hanoin katak neʼe sei halo krize ai-han iha mundu tomak sai aat liután no presu ba ai-han sai karun liután iha rai kiak sira, liuliu iha Áfrika Norte no Médiu Oriente.”—Atalayar.com, 23 Jullu 2023.

Haree toʼok saida mak Bíblia dehan kona-ba krize ai-han no futuru ba mundu neʼe.

Bíblia fó-hatene nanis kona-ba krize ai-han

• Jesus dehan: “Nasaun ida sei kontra nasaun seluk no ukun ida sei kontra ukun seluk, no rai-hamlaha . . . sei mosu iha fatin oioin.”—Mateus 24:7.

• Livru Apokalipse koʼalia kona-ba kuda haat simbóliku. Kuda sira-neʼe ida no ema neʼebé saʼe kuda neʼe reprezenta funu. Kuda ida seluk neʼebé tuir kuda neʼe reprezenta rai-hamlaha, neʼe katak susar ba ema atu hetan ai-han no ai-han nia folin saʼe makaʼas. “Haʼu hateke no haree kuda metan ida mai. Ida neʼebé saʼe kuda neʼe kaer hela dasin iha ninia liman. Haʼu rona lian ida . . . neʼebé dehan: ‘Trigu kilograma ida folin denáriu ida [neʼe mak folin hanesan saláriu loron ida nian] no sevada kilograma tolu folin denáriu ida.’”—Apokalipse 6:5, 6, nota.

Bíblia nia profesia kona-ba krize ai-han sai loos daudaun ohin loron, tempu neʼe mak Bíblia bolu nuʼudar “loron ikus sira”. (2 Timóteo 3:1) Atu buka-hatene liután kona-ba “loron ikus sira” no kuda haat iha livru Apokalipse, haree vídeo Mundu nia situasaun troka ona husi tinan 1914 no lee informasaun “Kuda haat husi livru Apokalipse—Sira reprezenta saida?”

Oinsá mak Bíblia bele ajuda

• Bíblia fó sai matadalan diʼak atu ajuda ita tahan hasoru susar oioin, inklui folin ai-han saʼe no menus ai-han. Haree ezemplu balu iha informasaun “Oinsá atu moris ho osan uitoan deʼit?”

• Bíblia mós fó ita esperansa katak situasaun sei sai diʼak. Bíblia promete kona-ba tempu neʼebé “sei iha ai-han barak iha rai” no ema hotu sei kuda no han husi sira-nia toʼos. (Salmo 72:16) Atu aprende liután kona-ba esperansa ba futuru no tanbasá Ita bele tau fiar, lee informasaun “Esperansa kapás iha futuru”.