Inflasaun neʼebé aas iha mundu tomak—Saida mak Bíblia dehan?

Iha Juñu 2022, prezidente husi Grupu Banku Mundiál nian fó sai iha relatóriu ida hodi dehan: “Dala ida tan mundu hasoru situasaun perigu kona-ba ekonomia. Hahán no sasán nia folin aumenta lalais tebes no iha tempu hanesan ema nia osan mós menus.”

Relatóriu husi International Monetary Fund fó sai katak, “folin gazolina, gazóleu no ai-han aumenta lalais tebes, no neʼe afeta ema barak neʼebé hela iha nasaun neʼebé kiak”.

Bíblia ajuda ita komprende tanbasá ita hasoru problema ekonomia hanesan neʼe, oinsá ita bele tahan hasoru ida-neʼe, no iha ka lae solusaun neʼebé permanente.

Folin sasán neʼebé aumenta durante “loron ikus sira”

• Bíblia bolu ita-nia tempu nuʼudar “loron ikus sira”.—2 Timóteo 3:1.

• Jesus dehan katak ‘buat neʼebé halo ema taʼuk’ ka akontesimentu neʼebé halo ema taʼuk sei mosu durante tempu neʼe. (Lucas 21:11) Ema barak sente taʼuk kuandu folin sasán aumenta makaʼas. Ema hanoin barak kona-ba sira-nia futuru no mós oinsá sira bele tau matan ba família nia presiza.

• Livru Apokalipse fó sai nanis kona-ba sasán nia folin neʼebé aumenta durante loron ikus sira. “Hau rona buat ida hanesan ema nia lian . . . dehan: ‘Osan nebee ema manaan iha loron ida, sei too deit para sosa trigu kilu tolu. Se trigu diak nian, hetan deit kilu ida.’”—Apokalipse 6:6, Bíblia Kadi Kapasidade.

Atu aprende liután kona-ba “loron ikus sira” no profesia husi livru Apokalipse, haree vídeo Mundu nia situasaun troka ona husi tinan 1914 no lee informasaun “Kuda haat husi livru Apokalipse—Sira reprezenta saida?”

Solusaun ba problema hotu kona-ba ekonomia

• “Sira sei harii uma no hela iha laran, no sira sei kuda uvas iha toʼos no han ninia fuan. Sira sei harii uma, laʼós ba ema seluk mak atu hela, no sira sei kuda, laʼós ba ema seluk mak atu han.”—Isaias 65:21, 22.

• “Sei iha ai-han barak iha rai; foho-tutun sira sei nakonu ho ai-han.”—Salmo 72:16.

• “Jeová dehan: ‘Haʼu sei hamriik tanba ema hanehan sira neʼebé iha terus laran, no tanba ema kiak sira-nia halerik.’”—Salmo 12:5.a

Lakleur tan Maromak sei halakon hotu problema kona-ba ekonomia, laʼós deʼit iha nasaun ida maibé iha mundu tomak. Atu haree oinsá, lee informasaun “Iha ka lae, sistema ekonomia neʼebé bele lori diʼak ba ema hotu?”

Bíblia mós bele ajuda Ita ohin loron atu tahan hasoru situasaun kona-ba sasán no hahán nia folin neʼebé kontinua aumenta. Iha dalan oinsá? Bíblia fó sai matadalan kapás kona-ba oinsá ita bele uza osan ho matenek. (Provérbios 23:4, 5; Eclesiastes 7:12) Atu aprende liután, lee informasaun “Proteje Ita-nia osan” no “Oinsá atu moris ho osan uitoan deʼit?”