TAHAN HASORU PROBLEMA EKONOMIA
Adapta ho situasaun foun
Baibain karik ita ladún nota bainhira sasán nia folin saʼe neineik-neineik, liuliu se ita-nia saláriu mós aumenta. Maibé se sasán nia folin saʼe derrepente no ita-nia saláriu nafatin deʼit, neʼe bele halo ita hanoin barak no estrese, liuliu se ita mak sustenta ita-nia família.
Ita la iha kbiit atu kontrola sasán nia folin. Maibé se ita koko atu adapta an ho situasaun foun, neʼe bele ajuda ita.
TANBASÁ IMPORTANTE?
Se ita rekoñese katak ita la iha kbiit atu kontrola sasán nia folin, neʼe bele ajuda ita atu . . .
kalma nafatin. Kuandu ita kalma, ita bele hanoin ho klaru no halo desizaun neʼebé diʼak.
hasees an husi toman neʼebé la diʼak. Porezemplu, ita sei la gasta osan arbiru.
la diskute malu ho ita-nia família kona-ba osan.
buka-hatene buat neʼebé ita presiza liu no tuirmai halo mudansa kona-ba oinsá ita gasta osan bazeia ba buat neʼebé ita presiza.
SAIDA MAK ITA BELE HALO?
Prontu atu adapta ho situasaun foun. Bainhira sasán nia folin saʼe derrepente, matenek atu hamenus ita-nia gastu sira. Ema balu iha toman atu gasta osan barak liu fali buat neʼebé sira iha toʼo la iha osan atu taka sira-nia presiza, no neʼe halo sira-nia situasaun sai susar liu no ikusmai sira sai kole tanba tenke uza oras barak liután atu serbisu. Klaru katak importante atu tau matan ba Ita-nia família nia presiza. Maibé hanoin-hetan, Ita-nia família presiza liu Ita-nia domin, tempu, no atensaun.
Se ita toman atu gasta osan barak liu fali buat neʼebé ita iha toʼo la iha osan atu taka ita-nia presiza, neʼe sei halo ita-nia situasaun sai susar liu