Iha ka lae, sistema ekonomia neʼebé bele lori diʼak ba ema hotu?
Iha rai oioin, ema halo demo iha dalan sira tanba sente katak sistema ekonomia la justu. Pandemia COVID-19 halo situasaun ekonomia sai aat liután tanba serka sanitária, sasán sai menus, no susar atu hetan tratamentu médiku. Buat sira-neʼe hatudu ho klaru diferensa entre ema riku no ema kiak, no neʼe halo ema sente la kontente.
Loron ida, ema bele sai livre husi problema ekonomia ka lae? Sin, Bíblia fó sai kona-ba buat neʼebé Maromak sei halo atu rezolve problema sira-neʼe.
Problema ekonomia neʼebé Maromak sei rezolve
Problema: Ema seidauk konsege kria sistema ekonomia neʼebé halo ema hotu bele hetan buat neʼebé sira presiza.
Solusaun: Maromak nia Ukun iha lalehan mak sei troka ema nia governu hotu. Maromak nia governu sei ukun mundu tomak.—Daniel 2:44; Mateus 6:10.
Rezultadu: Maromak sei uza ninia governu atu tau matan mundu tomak iha dalan neʼebé perfeitu. Ema sei nunka sai kiak no nunka sente laran-susar ho problema ekonomia. (Salmo 9:7-9, 18) Ema sei haksolok ho rezultadu husi sira-nia serbisu no moris kontente ho sira-nia família. Bíblia promete: “Sira sei harii uma no hela iha laran, no sira sei kuda uvas iha toʼos no han ninia fuan. Sira sei harii uma, laʼós ba ema seluk mak atu hela, no sira sei kuda, laʼós ba ema seluk mak atu han.”—Isaias 65:21, 22.
Problema: Ema labele hasees an husi akontesimentu neʼebé lori susar ba sira-nia moris no halo ema falta sira-nia presiza.
Solusaun: Liuhusi Maromak nia Ukun ka governu, Maromak sei halakon buat hotu neʼebé halo ema laran-susar no la sente seguru.
Rezultadu: Bainhira Maromak ukun mundu tomak, ema sei la hasoru tan akontesimentu aat neʼebé halo sira sai kiak. Porezemplu, funu, rai-hamlaha, no pandemia sei nunka akontese tan. (Salmo 46:9; 72:16; Isaias 33:24) Maromak dehan: “Haʼu-nia povu sei hela iha fatin neʼebé iha dame, sira sei hela iha fatin neʼebé hakmatek no seguru.”—Isaias 32:18.
Problema: Ema neʼebé hanoin an deʼit no kaan-teen dala barak hamatak ema seluk.
Solusaun: Maromak nia povu sei aprende atu hatudu domin neʼebé loos ba ema seluk duké hanoin an deʼit.—Mateus 22:37-39.
Rezultadu: Bainhira Maromak nia Governu mak ukun mundu tomak, ema hotu sei banati-tuir Maromak nia domin neʼebé “la buka diʼak ba ninia an rasik”. (1 Korinto 13:4, 5) Bíblia dehan: “Sira sei la halo buat aat ida no mós la estraga buat ida iha haʼu-nia foho santu tomak, tanba mundu tomak sei nakonu ho koñesimentu kona-ba Jeováa hanesan bee taka tasi tomak.”—Isaias 11:9.
Bíblia esplika katak ita moris iha loron ikus sira no lakleur tan Maromak sei kumpre ninia promesa atu halakon problema ekonomia hotu.b (Salmo 12:5) Antes ida-neʼe akontese, Bíblia nia prinsípiu sira bele ajuda Ita atu tahan problema ekonomia oioin neʼebé Ita hasoru. Porezemplu, haree informasaun “Oinsá atu moris ho osan uitoan deʼit?” no “Pandangan yang Benar tentang Uang”.
a Jeová mak Maromak nia naran neʼebé temi iha Bíblia.—Salmo 83:18.
b Atu aprende tanbasá mak ita bele tau fiar ba Bíblia, haree informasaun “Bíblia hatoʼo lia-loos neʼebé ita bele fiar”.