2023: Tinan neʼebé ema barak sente laran-taridu​—Saida mak Bíblia dehan?

Buat oioin neʼebé akontese iha mundu tomak durante tinan 2023 hatudu ho klaru katak ita moris iha tempu neʼebé Bíblia bolu nuʼudar “loron ikus sira”. (2 Timóteo 3:1) Haree toʼok oinsá buat neʼebé akontese daudauk hanesan ho buat neʼebé Bíblia fó sai nanis kona-ba ita-nia tempu.

Bíblia no akontesimentu sira iha mundu tomak

“Imi sei rona kona-ba funu iha fatin oioin.”​—Mateus 24:6.

• “Konflitu ho violénsia aumenta sai barak ba beibeik iha fatin oioin iha mundu neʼe.”a

“Rai-nakdoko sei mosu iha fatin oioin.”​—Marcos 13:8.

• “Husi Janeiru 2023 toʼo agora, akontese ona rai-nakdoko hamutuk 13 neʼebé liu magnitude 7 iha mundu tomak, neʼe mak maizumenus númeru boot liu husi tempu neʼebé ami komesa halibur relatóriu.”b

“Ema sei haree buat neʼebé halo sira taʼuk.”​—Lucas 21:11.

• “Tempu ‘mundu nia temperatura saʼe’ remata ona, maibé agora ita moris iha tempu neʼebé ‘planeta mundu nia temperatura nakali’.”​—António Guterres, sekretáriu jerál husi Nasoins Unidas.c

“Rai-hamlaha . . . sei mosu.”​—Mateus 24:7.

• “2023: Tinan ida tan neʼebé susar tebes ba sira neʼebé iha difikuldade atu hetan ai-han hodi sustenta sira-nia família.”d

“Sei iha problema barak neʼebé susar atu tahan.”​—2 Timóteo 3:1.

• “Iha mundu tomak, ema ida husi ema naʼin-ualu hetan problema ruma kona-ba saúde mentál.”e

Saida mak ita bele espera iha tinan 2024?

La iha ema ida neʼebé hatene ho loloos saida mak sei akontese iha tinan 2024. Maibé buat neʼebé akontese daudauk iha mundu, hatudu katak lakleur tan Maromak nia Ukun, ka governu iha lalehan sei troka ema nia governu hotu. Maromak nia governu sei halakon buat hotu neʼebé hamosu terus ka laran-taridu iha ema nia moris.​—Daniel 2:44; Apokalipse 21:4.

Nuʼudar ita hein ba tempu neʼe, bainhira sente laran-taridu, ita bele buka Maromak nia ajuda. Bíblia dehan:

“Bainhira haʼu taʼuk, haʼu tau fiar ba Ita.”​—Salmo 56:3.

Oinsá mak ita bele hatudu katak ita tau fiar ba Maromak? Ami konvida Ita atu aprende liután Bíblia nia promesa kona-ba futuru neʼebé sei la iha tan terus no susar. Koko toʼok kursu Bíblia interativu ho gratuitu atu haree oinsá Ita no Ita-nia família bele hetan benefísiu husi Bíblia nia promesa.