Gastu mundiál ba militár mak dolar Amerikanu triliaun rua liu—Saida mak Bíblia hatete?

Durante tinan 2022, governu sira iha mundu tomak gasta osan hamutuk dolar Amerikanu triliaun 2,24 (US$ 2.240.000.000.000) ba militár, neʼe osan neʼebé barak liu fali uluk. Razaun boot ida mak tanba Rúsia halo invazaun ba Ukránia. Iha Abríl 2023, Stockholm International Peace Research Institute (SIPRI) neʼebé fó sai relatóriu katak durante tinan 2022:

• Osan neʼebé militár husi nasaun Europeu gasta “aumenta porsentu 13 durante tinan neʼe nia laran. Neʼe mak porsentu neʼebé boot liu se kompara ho tinan sira seluk depois tempu Guerra Fria toʼo agora.”

• “Rúsia…aumenta ninia gastu maizumenus porsentu 9,2, neʼe muda ninia pozisaun husi númeru lima ba númeru tolu entre nasaun sira iha mundu tomak neʼebé gasta osan ba militár.”

• Estadus Unidus nafatin nasaun neʼebé gasta osan barak liu se kompara ho nasaun sira seluk. Estadus Unidus gasta osan “hamutuk porsentu 39 husi gastu mundiál ba militár”.

Dr. Nan Tian, neʼebé hakerek relatóriu husi SIPRI hatete: “Gastu mundiál ba militár neʼebé aumenta ba beibeik durante tinan hirak neʼe nia laran hatudu katak ita moris iha mundu neʼebé sai perigu liután.”

Bíblia fó-hatene nanis katak konflitu entre governu sira neʼebé iha kbiit boot sei aumenta ba beibeik no esplika mós oinsá mak mundu neʼe bele iha dame neʼebé loos.

Bíblia fó-hatene nanis katak konflitu sei aumenta ba beibeik

• Bíblia fó sai katak ita moris daudaun iha “tempu nia rohan”.—Daniel 8:19.

• Livru Daniel fó-hatene nanis katak durante tempu neʼe, governu sira sei kompete malu. Governu sira-neʼe sei “dudu malu”, ka koko atu domina malu atu sai ida neʼebé forte liu. Bainhira sira koko atu domina malu, neʼe gasta “rikusoin” ka osan barak tebetebes.—Daniel 11:40, 42, 43.

Atu aprende liután kona-ba Bíblia nia profesia neʼe, haree vídeo Profesia neʼebé kumpre ona—Daniel kapítulu 11.

Oinsá dame neʼebé loos sei sai realidade

• Bíblia hatete katak Maromak sei troka ema nia governu hotu. Nia “sei harii ukun ida neʼebé sei nunka lakon. No ukun neʼe sei la entrega ba povu sira seluk. Ukun neʼe sei harahun no halakon liurai sira-neʼe hotu nia ukun, no ukun neʼe mesak mak sei hamriik ba nafatin.”—Daniel 2:44.

• Lakleur tan, Maromak Jeováa sei halo buat neʼebé ema nunka bele halo, neʼe mak halo mundu neʼe iha dame neʼebé loos ba nafatin. Oinsá? Maromak nia Ukun, ka governu iha lalehan mak sei halakon armas no violénsia hotu iha mundu tomak.—Salmo 46:8, 9.

Atu aprende liután kona-ba saida mak Maromak nia Ukun sei halo, lee informasaun ho títulu “Iha Maromak nia Ukun okos ‘dame sei sai barak’”.