Bainhira pár la hatudu laran-metin

“Haʼu hakarak mate deʼit bainhira haʼu-nia laʼen dehan katak nia atu husik haʼu no kaben fali ho feto seluk. Neʼe la justisa, liuliu kuandu haʼu hanoin fali kona-ba sakrifísiu neʼebé haʼu halo ona ba nia.”—Maria, husi rai-España.

“Bainhira haʼu-nia feen husik haʼu, haʼu sente hanesan parte ida husi haʼu-nia isin mak mate. Ami-nia mehi, ami-nia esperansa, no ami-nia planu sira lakon hotu. Dala ruma haʼu sente livre husi haʼu-nia laran-susar, maibé depois neʼe, murón fali deʼit.”—Bill, husi rai-España.

KABEN-NAʼIN neʼebé la laran-metin sempre hakanek ninia pár nia sentimentu. Kaben-naʼin balu bele fó perdua ba ninia pár neʼebé arrepende an husi hahalok neʼe no hadiʼa fali sira-nia relasaun.a Maski nuneʼe, baibain ema neʼebé ninia pár la hatudu laran-metin ba nia sempre laran-kanek. Oinsá mak ita bele tahan hasoru sentimentu neʼe?

ESKRITURA HUSI BÍBLIA NEʼEBÉ BELE AJUDA

Maski sente laran-kanek, kaben-naʼin balu hetan ona kmaan husi eskritura sira. Sira aprende katak Maromak haree sira-nia matan-been no sente sira-nia terus.—Malaquias 2:13-16.

“Bainhira haʼu laran-taridu tebes, Ita fó kmaan ba haʼu no halo haʼu kontente.”—Salmo 94:19.

Bill hatete: “Bainhira haʼu lee eskritura neʼe, haʼu imajina Jeová hanesan aman ida hamaus daudaun haʼu.”

“Ita hatudu laran-metin ba ema neʼebé laran-metin.”—Salmo 18:25.

Carmen neʼebé ninia laʼen la laran-metin ba nia ba fulan barak, esplika: “Haʼu-nia laʼen la laran-metin mai haʼu. Maibé haʼu fiar katak Jeová sei laran-metin mai haʼu. Nia sei la husik haʼu.”

“Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan . . . no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.”—Filipe 4:6, 7.

Sasha hatete: “Haʼu lee eskritura neʼe fila-fila. No bainhira haʼu halo orasaun beibeik, Maromak halo haʼu sente dame iha haʼu-nia moris.”

Sira neʼebé temi ona iha leten sente labele ona atu tahan. Maibé sira tau fiar ba Maromak Jeová no hetan forsa husi ninia Liafuan. Bill hatete: “Haʼu-nia fiar ajuda duni haʼu-nia moris bainhira buat hotu haree hanesan runguranga. Maski haʼu ‘laʼo iha foho-leet neʼebé nakukun tebes’, Maromak hamutuk ho haʼu.”—Salmo 23:4.

a Atu hatene liután kona-ba atu fó perdua ka lae ba pár neʼebé la laran-metin, haree pájina 3, pájina 5, no pájina 9 husi livru Sedarlah! 22 Abríl 1999.

Buat neʼebé ajuda ona ema seluk

Lee no medita kona-ba eskritura sira.

Bill esplika: “Haʼu lee livru Job no Salmo no tau marka parte sira neʼebé haʼu sente katak bele ajuda iha haʼu-nia situasaun sira. Haʼu bele haree katak ema neʼebé hakerek eskritura sira-neʼe hasoru ona situasaun susar no sente buat neʼebé hanesan ho haʼu.”

Rona múzika atu bele sente kmaan.

Carmen hatete: “Bainhira haʼu sente susar atu toba iha kalan, haʼu rona múzika. Neʼe mak dalan diʼak ida atu bele sente kmaan.” Daniel hatete: “Haʼu aprende atu toka viola, no múzika ajuda duni haʼu atu sente dame.”

Fó sai Ita-nia sentimentu.

Daniel hatete: “Haʼu la toman atu fó sai haʼu-nia sentimentu. Maibé haʼu iha kolega diʼak barak no haʼu koʼalia ho sira loroloron. Haʼu fakar sai haʼu-nia sentimentu hotu ba sira liuhusi karta no koʼalia ba sira, no neʼe ajuda duni.” Sasha hatete: “Ajuda husi família mak importante tebes. Haʼu-nia amá sempre iha ba haʼu. Bainhira haʼu hakarak koʼalia ho nia, nia sempre prontu rona ba haʼu. Haʼu-nia apá mós halo haʼu sente seguru, no nia ajuda haʼu oinsá atu sente kmaan.”

Halo orasaun beibeik.

Carmen hatete: “Haʼu halo orasaun beibeik. Haʼu sente katak Maromak la dook husi haʼu, nia rona ba haʼu, no ajuda haʼu. Durante tempu susar neʼe, haʼu sai besik liu ba Maromak.”