3 Ajuda ita atu tahan problema sira

Dala ruma, iha problema balu neʼebé ita la bele rezolve, hanesan ema neʼebé Ita hadomi mate ka Ita moras todan ba tempu kleur. Karik Ita hakarak buka ajuda atu bele tahan hasoru problema sira-neʼe. Bíblia bele ajuda ita ka lae?

MORAS TODAN

Feto ida naran Rosa hatete: “Haʼu moras todan toʼo halo haʼu-nia moris susar tebes.” Nia esplika katak dala ruma susar ba nia atu bele tau fokus bainhira estuda Bíblia mesak no neʼe halo nia hanoin barak. Maibé, nia hetan ajuda husi Jesus nia liafuan iha Mateus 19:26, neʼebé dehan: “Ba Maromak buat hotu bele deʼit.” Rosa aprende katak iha dalan oioin atu estuda Bíblia. Tanba nia moras, susar tebes ba nia atu lee, tan neʼe nia komesa rona gravasaun lee Bíblia nian no livru seluk kona-ba Bíblia.a Rosa esplika: “Buat sira-neʼe ajuda tebes haʼu atu hakbesik nafatin ba Maromak.”

Bainhira Rosa sente triste tanba nia la bele halo tan buat oioin hanesan uluk, nia hetan kmaan husi 2 Korinto 8:12, neʼebé dehan: “Maromak kontente se ema fó buat ruma husi laran, tanba Maromak hakarak ema atu fó tuir buat neʼebé nia iha, laʼós tuir buat neʼebé nia la iha.” Eskritura neʼe ajuda Rosa atu hanoin-hetan katak Maromak kontente ho buat neʼebé nia halo tuir ninia situasaun.

LARAN-TRISTE

Delfina neʼebé temi tiha ona dehan: “Kuandu haʼu-nia oan-feto neʼebé tinan 18 mate, haʼu sente triste tebes, haʼu sente katak haʼu la iha kbiit atu kontinua moris, buat hotu la hanesan uluk.” Nia hetan kmaan husi Salmo (Mazmur) 94:19, neʼebé dehan: “Bainhira neon-susar sai barak iha haʼu-nia laran, Ita fó kmaan ba haʼu no halo haʼu kontente.” Delfina dehan: “Haʼu halo orasaun ba Jeová hodi husu ninia ajuda atu haʼu bele halo atividade ruma neʼebé ajuda haʼu sente kmaan.”

Delfina halo ninia an okupadu ho serbisu voluntáriu. Liutiha tempu balu, Delfina kompara ninia an hanesan ho jís neʼebé tohar ona, maski tohar maibé labarik sira bele uza nafatin. Maski nia haree ninia an hanesan jís neʼebé tohar, maibé nia aprende katak nia bele ajuda nafatin ema seluk. Nia hatete: “Bainhira haʼu uza Bíblia atu fó kmaan ba haʼu-nia estudante Bíblia sira, haʼu bele sente katak Jeová uza dalan neʼe atu fó kmaan ba haʼu.” Delfina mós halo lista kona-ba fiar-naʼin sira husi Bíblia neʼebé mak sente laran-triste. Nia esplika: “Sira hotu iha toman atu halo orasaun beibeik.” Nia mós aprende katak só lee Bíblia deʼit mak bele ajuda ita atu tahan hasoru situasaun susar.

Liuhusi estuda Bíblia, Delfina mós aprende katak diʼak atu fokus deʼit ba futuru, laʼós ba buat neʼebé liu ona. Nia hetan esperansa husi Apóstolu 24:15, neʼebé dehan: “Maromak sei fó moris-hiʼas ba ema diʼak no ema aat.” Delfina fiar katak Jeová sei fó moris-hiʼas ba ninia oan-feto ka lae? Sin, fiar duni, Delfina esplika: “Haʼu sei hasoru fali haʼu-nia oan-feto iha futuru. Jeová marka ona tempu ba ami atu hasoru malu fali.”

a Ita bele hetan gravasaun barak iha sítiu www.jw.org/tdt.

Bíblia bele ajuda ita atu hetan kmaan bainhira hasoru problema

OINSÁ MAK MAROMAK BELE AJUDA ITA?

Bíblia fó resposta katak: “Jeová besik ba ema hotu neʼebé bolu nia, ba sira hotu neʼebé bolu nia tuir lia-loos. Nia halo kontente sira neʼebé hamtaʼuk nia hodi fó buat neʼebé sira hakarak; nia rona sira-nia halerik atu husu ajuda, no nia salva sira.” (Salmo [Mazmur] 145:18, 19) Liafuan sira-neʼe halo ita sente kmaan, loos ka lae? Maibé iha dalan saida deʼit mak Maromak sei hatán ita-nia orasaun?

HODI FÓ FORSA:

Baibain problema sira bele halo ita sai laran-triste no kole iha dalan oioin. (Provérbios [Amsal] 24:10) Maibé Jeová “fó kbiit ba ema neʼebé kole no fó forsa boot ba sira neʼebé fraku”. (Isaías [Yesaya] 40:29) Apóstolu Paulo neʼebé tahan hasoru susar oioin dehan: “Iha buat hotu haʼu hetan forsa liuhusi nia neʼebé fó kbiit mai haʼu.” (Filipe 4:13) Paulo hetan forsa husi Maromak nia espíritu santu. Ita mós bele husu ba Maromak atu fó forsa ba Ita.—Lucas 11:13.

HODI FÓ MATENEK:

Oinsá mak Ita bele komprende no aplika Bíblia nia matadalan sira? Jesus nia dixípulu naran Tiago hakerek: “Se imi ida presiza matenek, nia tenke kontinua husu ba Maromak, no ida-neʼe sei fó ba nia, basá Maromak fó ho laran-luak ba ema hotu hodi la siʼak.” (Tiago 1:5) Ita bele moris tuir Ita-nia orasaun hodi lee Bíblia no aplika ninia matadalan sira. (Tiago 1:23-25) Se Ita halo nuneʼe, Ita sei aprende katak Bíblia nia matadalan sira mak diʼak duni.

HODI FÓ DAME:

Bainhira Ita sente laran-susar tebes, Jeová bele ajuda Ita. Ninia Liafuan hatete: “Keta laran-taridu kona-ba buat ida, maibé iha buat hotu hatoʼo imi-nia laran-susar ba Maromak liuhusi orasaun no harohan no mós fó-agradese; no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.” (Filipe 4:6, 7) Koko toʼok halo orasaun hodi husu Maromak nia dame.

Maibé oinsá se Ita la bele rezolve lalais Ita-nia problema sira? Keta hanoin kedas katak Maromak la hanoin Ita. Maski Ita-nia problema sira la para, maibé Maromak bele fó Ita aten-brani no kbiit atu tahan. (1 Korinto 10:13) No iha futuru ita-nia problema sira sei lakon!