Bainhira Ita kona moras boot

“Bainhira haʼu kona moras kankru, haʼu sente hanesan simu kastigu-mate. Maibé bainhira haʼu fila husi ospitál, haʼu hanoin, ‘Neʼe laʼós buat neʼebé haʼu hakarak, maibé haʼu tenke buka dalan atu bele hasoru situasaun neʼe.’”—Linda, tinan 71.

“Haʼu kona moras ida neʼebé halo haʼu-nia oin parte karuk matek. No dala ruma moras tebes toʼo halo haʼu depresaun. Dala barak, haʼu sente mesamesak no hakarak atu oho an.”—Elise, tinan 49.

Mane moras ida tuur iha kadeira roda no haleʼu ho ema neʼebé hadomi nia

SE ITA ka ema neʼebé ita hadomi kona moras boot ruma, Ita hatene oinsá mak neʼe lori triste duni. Ita laʼós hasoru deʼit moras neʼe, Ita mós presiza tahan sentimentu neʼebé tun-saʼe. Laran-taridu bele sai aat liu bainhira presiza bá konsulta beibeik, susar ka karun atu hetan tratamentu médiku ruma, no moras tanba ai-moruk nia efeitu. Estrese neʼebé ema iha tanba moras bele halo Ita sente hanesan labele halo buat ida.

Iha neʼebé mak ita bele hetan ajuda? Ema barak hetan ona kmaan tanba sadere ba Maromak liuhusi orasaun no lee eskritura husi Bíblia neʼebé fó kmaan. Ajuda seluk mak liuhusi domin no apoia neʼebé família no kolega sira hatudu.

BUAT NEʼEBÉ AJUDA ONA EMA SELUK

Robert, tinan 58, hatete: “Bainhira kona moras boot, tau fiar ba Maromak, no nia sei ajuda Ita. Halo orasaun ba Jeová. Fó sai Ita-nia sentimentu ba nia. Husu ninia espíritu santu. Husu Jeová fó ba Ita hanoin neʼebé pozitivu nafatin hodi fó kmaan ba família no tahan Ita-nia moras ho dignidade.”

Robert hatutan: “Bainhira Ita-nia família hamutuk ho Ita no apoia iha dalan emosaun, neʼe ajuda tebes. Loroloron sira sempre telefone haʼu atu husu, ‘Ó diʼak hela ka?’ Haʼu mós hetan kmaan husi belun sira neʼebé hela iha fatin oioin. Sira sempre halo haʼu sente kmaan no ajuda haʼu atu la rende an.”

Se Ita ba vizita ema neʼebé moras, haree toʼok buat neʼebé Linda hatete: “Ita bele fiar katak ema neʼebé moras hakarak halaʼo ninia moris hanesan baibain deʼit, no lakohi koʼalia beibeik kona-ba ninia moras. Tan neʼe, diʼak atu koʼalia kona-ba buat neʼebé baibain ita koʼalia ho nia.”

Ho Jeová nia forsa no kmaan husi eskritura sira, no mós ajuda husi família no belun sira, Ita bele haree duni katak moris mak iha folin duni maski Ita hasoru daudaun moras boot.

Eskritura husi Bíblia neʼebé bele ajuda

Sadere ba Maromak.

“Haʼu harohan ba Jeová, no nia hatán haʼu. Nia salva ona haʼu husi buat hotu neʼebé halo haʼu taʼuk. Ema kbiit-laek bolu Jeová, no nia rona.”—Salmo 34:4, 6.

Linda neʼebé temi ona, hatete: “Haʼu nunka halo orasaun atu Maromak halakon tiha haʼu-nia moras, maibé atu nafatin iha forsa hodi bele tahan haʼu-nia moras.”

Lee Maromak nia Liafuan atu bele hetan forsa.

“La iha ema ida iha rai mak sei dehan: ‘Haʼu moras.’”—Isaias 33:24.

Medita kona-ba Maromak nia promesa sira ba futuru. Neʼe sei fó Ita esperansa no fó forsa ba Ita atu tahan.

Husu ajuda husi Ita-nia família ka belun sira.

“Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.

Elise neʼebé temi ona, hatete: “Keta sulan an. Husik Ita-nia belun sira ajuda Ita. Dala ruma Ita sei sente mesamesak no hanoin katak Maromak mós lakohi rona, maibé iha tempu hanesan neʼe, keta sulan an.”