Tau matan ba Ita-nia “eskudu boot fiar nian”

1-2. (a) Tuir Éfeso 6:16, tanbasá ita presiza “eskudu boot fiar nian”? (b) Ita sei buka resposta ba pergunta saida deʼit?

ITA iha “eskudu boot fiar nian” ka lae? (Lee Éfeso 6:16.) Klaru katak iha. Hanesan eskudu boot bele proteje soldadu nia isin, nuneʼe mós fiar proteje Ita husi hahalok la morál, violénsia, no influénsia aat husi sistema aat neʼe.

² Maibé, ita hela iha “loron ikus” sira, no ita-nia fiar kontinua hetan koko. (2 Tim 3:1) Oinsá Ita bele buka-hatene se Ita-nia eskudu fiar nian mak metin nafatin ka lae? Saida mak Ita bele halo atu kaer metin nafatin ba Ita-nia eskudu fiar nian? Mai ita buka resposta ba pergunta sira-neʼe.

BUKA-HATENE DIDIʼAK KONA-BA ITA-NIA ESKUDU

3. Oinsá soldadu tau matan ba ninia eskudu no tanbasá?

³ Iha Bíblia nia tempu, dala barak soldadu sira uza eskudu neʼebé taka tomak ho animál kulit. Soldadu sira kose mina ba animál kulit neʼe atu la sai aat no kuidadu atu besi la sai ferrujen. Se soldadu ida haree katak ninia eskudu komesa sai aat, nia hadiʼa kedas atu nuneʼe nia sempre prontu atu bá funu. Oinsá mak ezemplu neʼe aplika ba Ita-nia fiar?

4. Tanbasá Ita tenke buka-hatene kona-ba Ita-nia eskudu fiar nian? Oinsá Ita bele halo ida-neʼe?

⁴ Hanesan soldadu iha tempu uluk, Ita mós tenke buka-hatene no tau matan didiʼak ba Ita-nia eskudu fiar nian atu nuneʼe Ita sempre prontu atu halo funu. Nuʼudar ema Kristaun, ita tenke halo funu hasoru anju aat. (Éf 6:10-12) Ema seluk labele tau matan ba Ita-nia eskudu fiar nian. Oinsá mak Ita hatene katak Ita-nia fiar metin ona atu bele tahan bainhira hetan koko? Primeiru, Ita tenke halo orasaun atu husu Maromak nia ajuda. Tuirmai, Ita presiza uza Maromak nia Liafuan atu ajuda haree Ita-nia an hanesan Maromak haree Ita. (Ebr 4:12) Bíblia hatete: “Tau fiar ba Jeová ho ó-nia laran tomak, no labele sadere ba ó-nia matenek rasik.” (Prov 3:5, 6) Hanoin kona-ba situasaun ruma neʼebé foin lalais Ita hasoru no saida mak Ita halo. Porezemplu, Ita hasoru ona susar ekonomia ka lae? Iha tempu neʼebá, Ita hanoin-hetan ka lae Jeová nia promesa iha Ebreu 13:5 neʼebé dehan: “Haʼu sei nunka husik ó, no haʼu sei nunka fila kotuk ba ó”? Promesa neʼe halo Ita iha konfiansa katak Jeová bele ajuda Ita ka lae? Se Ita halo nuneʼe, neʼe hatudu katak Ita tau matan didiʼak ba Ita-nia eskudu fiar nian.

5. Karik saida mak Ita sei hetan se Ita buka-hatene didiʼak kona-ba Ita-nia fiar?

⁵ Bainhira Ita buka-hatene didiʼak kona-ba Ita-nia fiar, karik Ita sei hakfodak ho buat neʼebé Ita hetan. Karik Ita hetan Ita-nia fraku neʼebé Ita la nota ba tempu kleur ona. Porezemplu, karik Ita nota katak laran-taridu demais, lia-bosok, no laran-kraik halo Ita-nia fiar sai fraku ona. Se neʼe akontese, oinsá mak Ita bele proteje Ita-nia fiar atu la sai fraku liután?

PROTEJE ITA-NIA AN HUSI LARAN-TARIDU DEMAIS, LIA-BOSOK NO LARAN-KRAIK

6. Fó toʼok ezemplu kona-ba laran-taridu neʼebé diʼak.

⁶ Laran-taridu balu mak diʼak. Porezemplu, diʼak se ita laran-taridu tanba hanoin kona-ba oinsá atu halo Jeová no Jesus kontente. (1 Kor 7:32) Se ita halo sala sériu, ita laran-taridu kona-ba oinsá atu hadiʼa fali ita-nia relasaun ho Maromak. (Sal 38:18) Ita mós laran-taridu kona-ba oinsá atu halo kontente ita-nia kaben no ajuda ita-nia família no mós maluk fiar-naʼin.—1 Kor 7:33; 2 Kor 11:28.

7. (a) Oinsá mak laran-taridu demais bele halo ita-nia fiar sai fraku? (b) Tuir Provérbios 29:25, tanbasá ita la presiza taʼuk ba ema?

⁷ Maibé, laran-taridu demais bele halo ita-nia fiar sai fraku. Porezemplu, karik ita laran-taridu beibeik kona-ba ai-han no roupa neʼebé natoon. (Mt 6:31, 32) Tan neʼe, karik ita tau fokus atu buka sasán no rikusoin. Karik ita mós haburas domin ba osan. Se ita husik ida-neʼe akontese, ita-nia fiar ba Jeová sei sai fraku no bele estraga ita-nia relasaun ho nia. (Mc 4:19; 1 Tim 6:10) Ka karik ita sai laran-taridu demais kona-ba ema seluk nia hanoin ba ita. Tan neʼe karik ita taʼuk liu se ema goza ka kontra ita duké taʼuk atu hakanek Jeová nia laran. Atu proteje ita-nia an husi perigu neʼe, ita tenke husu Jeová atu fó ita fiar no aten-brani atu tahan susar neʼe.—Lee Provérbios 29:25; Lc 17:5.

8. Saida mak ita presiza halo se ema fó sai lia-bosok?

⁸ Satanás mak “lia-bosok nia aman” no nia uza ema sira neʼebé nia kontrola atu habelar lia-bosok kona-ba Jeová no kona-ba ita-nia irmaun-irmán sira. (João 8:44) Porezemplu, ema neʼebé kontra lia-loos karik fó sai informasaun bosok kona-ba Jeová nia organizasaun iha internét ka televizaun ka buat sira seluk. Lia-bosok sira-neʼe mak parte ba Satanás nia ‘rama-oan neʼebé lakan ho ahi’. (Éf 6:16) Saida mak ita presiza halo se ema ida koʼalia lia-bosok sira-neʼe ba ita? Ita lakohi duni atu rona! Tanbasá? Tanba ita tau fiar ba Jeová no konfia ita-nia irmaun-irmán sira. Tuir loloos, ita lakohi atu koʼalia ho ema neʼebé kontra lia-loos. Ita lakohi diskute malu ho sira kona-ba buat ruma maski ita hakarak deʼit atu hatene saida mak sira sei dehan.

9. Oinsá mak laran-kraik bele kona ita?

⁹ Laran-kraik bele halo ita-nia fiar sai fraku. Dala ruma ita sente laran-kraik tanba hasoru problema. Tuir loloos, ita labele haluha deʼit problema sira. Maibé ita mós labele hanoin beibeik kona-ba ita-nia problema. Se lae, karik ita sei haluha buat diʼak hotu neʼebé Jeová promete ona ba ita. (Apok 21:3, 4) Sentimentu laran-kraik bele hamenus ita-nia forsa no halo ita rende an. (Prov 24:10) Maibé ita la presiza husik neʼe akontese ba ita.

10. Saida mak Ita aprende husi irmán ida nia karta?

¹⁰ Hanoin toʼok oinsá irmán ida iha Estadus Unidus mantein ninia fiar nuʼudar nia tau matan ba ninia laʼen neʼebé moras todan. Nia hakerek karta ba sede-jerál, hodi dehan: “Dala ruma ami-nia situasaun halo ami estrese no laran-kraik, maibé ami iha esperansa. Haʼu agradese tebes ba buat hotu neʼebé Jeová fó ona ba ami atu hametin ami-nia fiar no atu anima ami. Ami presiza duni matadalan no anima. Neʼe ajuda ami atu kontinua serbí Jeová no tahan susar neʼebé Satanás uza atu halo ami fraku.” Irmán neʼe nia esperiénsia hanorin ita katak ita bele manán hasoru laran-kraik. Oinsá? Haree Ita-nia susar sira nuʼudar koko husi Satanás. Iha konfiansa katak Jeová sei fó kmaan ba Ita. No hafolin ai-han espirituál neʼebé nia fó.

11. Ita bele husu pergunta saida deʼit ba ita-nia an hodi hatene se ita-nia fiar metin nafatin ka lae?

¹¹ Ita nota katak Ita presiza hametin liután Ita-nia fiar ka lae? Durante fulan sira neʼebé liu ona, Ita konsege kontrola an atu la laran-taridu demais ka lae? Ita konsege kontrola an atu la rona ba lia-bosok ka diskute malu ho ema sira neʼebé kontra lia-loos ka lae? Ita konsege tahan hasoru laran-kraik ka lae? Se nuneʼe, Ita-nia fiar sei metin nafatin. Maibé ita tenke kontinua matan-moris tanba Satanás uza armas seluk atu kontra ita. Mai ita hanoin kona-ba armas sira-neʼe ida.

PROTEJE ITA-NIA AN HUSI HADOMI RIKUSOIN

12. Saida mak bele akontese se ita hadomi sasán no rikusoin?

¹² Se ita hadomi sasán no rikusoin, neʼe bele halo fraku ita-nia fiar no hanetik ita atu halo serbisu barak ba Jeová. Apóstolu Paulo hatete: “Ema neʼebé sai nuʼudar soldadu la envolve an ho negósiu atu buka moris tanba nia hakarak atu halo kontente ema neʼebé hatama nia nuʼudar soldadu.” (2 Tim 2:4) Tuir loloos, soldadu Roma labele envolve an iha negósiu. Saida mak akontese se soldadu la halo tuir?

13. Tanbasá mak soldadu ida labele envolve an iha negósiu?

¹³ Imajina toʼok situasaun neʼe. Soldadu grupu ida uza tempu iha dadeer atu treinu uza surik, maibé soldadu ida la tuir treinu neʼe. Soldadu neʼe okupadu atu faʼan ai-han iha sidade. Iha kalan, soldadu sira uza tempu atu tau matan ba sira-nia eskudu no kadi sira-nia surik. Maibé soldadu neʼebé halo negósiu uza tempu atu prepara hahán hodi faʼan iha loron tuirmai. Maibé iha dadeer, inimigu ataka sira derrepente deʼit. Soldadu ida-neʼebé mak prontu atu bá funu no halo ninia komandante kontente? No se Ita mós tuir funu neʼe, Ita hakarak atu hamriik besik soldadu neʼebé prepara ona ka soldadu neʼebé la prepara?

14. Nuʼudar Kristu nia soldadu, saida mak importante liu ba ita?

¹⁴ Hanesan soldadu neʼebé diʼak, ita lakohi husik buat ruma dada ita-nia atensaun husi buat neʼebé importante liu, neʼe mak atu halo kontente ita-nia komandante Jeová no Jesus. Neʼe mak folin-boot liu fali buat hotu neʼebé Satanás nia mundu bele oferese. Ita tenke buka-hatene buat sira neʼebé importante liu atu ita bele iha tempu no enerjia atu serbí Maromak no tau matan ba ita-nia eskudu fiar nian no mós ba ekipamentu funu nian sira seluk neʼebé Maromak fó ba ita.

15. Apóstolu Paulo fó avizu saida mai ita, no tanbasá?

¹⁵ Ita tenke matan-moris nafatin! Tanbasá? Apóstolu Paulo fó avizu katak “ema sira neʼebé hakarak duni atu sai riku” sei ‘hadook an husi fiar’. (1 Tim 6:9, 10) Liafuan neʼebé tradús nuʼudar “hadook an” bele fó ideia katak ita-nia hanoin fahe ona tanba ita tau fokus liu atu hetan buat neʼebé ita la presiza. Tuirmai, neʼe book ita atu haburas “hakarak beik no aat oioin” iha ita-nia laran. Duké husik hakarak sira-neʼe buras iha ita-nia laran, diʼak liu atu hanoin-hetan katak Satanás uza hakarak sira-neʼe nuʼudar armas atu halo fraku ita-nia fiar.

16. Istória iha Marcos 10:17-22 motiva ita atu hanoin kona-ba pergunta saida deʼit?

¹⁶ Karik ita iha osan atu sosa sasán barak. Sala ka lae atu sosa buat neʼebé ita hakarak maski ita la presiza? Karik lae. Maibé hanoin toʼok pergunta sira-neʼe: Maski ita bele sosa buat ruma, maibé ita iha duni tempu no enerjia atu uza no tau matan ba ida-neʼe ka lae? No mós, ita komesa hadomi ita-nia rikusoin ka lae? Mane joven ida la simu Jesus nia konvite atu aumenta serbisu ba Maromak tanba domin ba rikusoin. Ita-nia domin ba rikusoin mós bele book ita atu halo hanesan neʼe ka lae? (Lee Marcos 10:17-22.) Diʼak liu atu moris simples no uza ita-nia tempu no forsa atu halo Maromak nia hakarak! 

KAER METIN ITA-NIA ESKUDU FIAR NIAN

17. Ita labele haluha saida?

¹⁷ Ita labele haluha katak ita halo daudaun funu no ita tenke prontu atu halo funu loroloron. (Apok 12:17) Ita-nia irmaun-irmán sira labele lori ita-nia eskudu fiar nian. Ita rasik mak tenke kaer metin ida-neʼe.

18. Tanbasá soldadu sira iha tempu antigu kaer metin sira-nia eskudu?

¹⁸ Iha tempu antigu, soldadu ida hetan glória tanba nia aten-brani iha funu. Maibé nia sei sente moe se nia fila ba uma no la lori ninia eskudu. Matenek-naʼin ida kona-ba ema Roma nia istória naran Tácito hakerek: “Se soldadu ida husik hela ninia eskudu, neʼe mak buat neʼebé hamoe duni nia.” Neʼe mak razaun ida tanbasá soldadu sira hakaʼas an atu kaer metin sira-nia eskudu.

19. Oinsá mak ita bele kaer metin ita-nia eskudu fiar nian?

¹⁹ Ita bele kaer metin ita-nia eskudu fiar nian hodi tuir reuniaun beibeik no koʼalia kona-ba Jeová nia naran no ninia Ukun ba ema seluk. (Ebr 10:23-25) Liután neʼe, lee Bíblia loroloron no halo orasaun hodi husu Maromak nia ajuda atu aplika Bíblia nia matadalan. (2 Tim 3:16, 17) Se ita halo nuneʼe, Satanás nia armas hotu neʼebé nia uza labele lori susar ba ita ba nafatin. (Isa 54:17) Ita-nia “eskudu boot fiar nian” sei proteje ita. Ita sei hamriik metin hodi serbí Maromak hamutuk ho ita-nia irmaun-irmán sira. No loroloron ita sei manán hasoru ita-nia susar sira no hametin ita-nia fiar. No importante liu mak ita apoia Jesus bainhira nia manán funu hasoru Satanás no sira neʼebé apoia Satanás.—Apok 17:14; 20:10.