Ita hanoin oinsá kona-ba raan parte kiʼik no tratamentu neʼebé uza Ita-nia raan rasik?

Ita hanoin oinsá kona-ba raan parte kiʼik no tratamentu neʼebé uza Ita-nia raan rasik?

Bíblia fó mandamentu ba ema kristaun sira hodi “hasees an . . . husi raan”. (Apóstolu 15:20) Tan neʼe, Testemuña ba Jeová la simu raan hotu ka parte boot haat husi raan hanesan glóbulu mean, glóbulu mutin, plazma, no plaketa. Testemuña ba Jeová mós la fó sira-nia raan ba ema seluk ka rai-hela sira-nia raan rasik hodi hatama fali ba sira-nia isin.—Levítico (Imamat) 17:13, 14; Apóstolu 15:28, 29.

Saida mak frasaun (parte kiʼik) husi raan, no tansá mak ema ida-idak tenke foti ninia desizaun rasik kona-ba simu ka la simu ida-neʼe?

Frasaun mai husi parte boot haat husi raan. Hodi fahe raan neʼe, ema matenek sira uza prosesu naran fractionation. Porezemplu, plazma bele fahe ba parte kiʼik sira, hanesan bee porsentu 91; proteína, hanesan albumina no fibrinojéniu porsentu 7; no buat sira seluk hanesan vitamina, porsentu 1,5.

Maibé, Bíblia bandu ema kristaun atu simu parte kiʼik husi raan ka lae? Tuir loloos, Bíblia la hatete ho klaru, tanba Bíblia la koʼalia kona-ba parte kiʼik husi raan. Maibé, buat neʼebé ita bele hatene ho klaru mak parte kiʼik husi raan mai husi raan neʼebé ema seluk fó hodi halo tratamentu médiku oioin. Tan neʼe, ema kristaun ida-idak tenke halo desizaun tuir ninia konxiénsia hodi simu ka la simu parte kiʼik husi raan.

Entaun, bainhira ita atu foti desizaun, diʼak atu hanoin kona-ba pergunta tuirmai neʼe: ‘Haʼu komprende ka lae, katak se haʼu foti desizaun atu la simu parte kiʼik hotu husi raan, neʼe dehan katak haʼu la bele simu mós ai-moruk balu neʼebé bele kura haʼu-nia moras ka bele hapara raan barak neʼebé sai? Haʼu bele ka lae, esplika ho klaru ba doutór tansá haʼu hili atu simu ka la simu ai-moruk neʼebé sira hakarak fó mai haʼu?’

Tansá ita ida-idak presiza foti desizaun kona-ba tratamentu médiku balu neʼebé uza ita-nia raan rasik?

Maski ema kristaun la fó sira-nia raan ba ema seluk ka rai-hela sira-nia raan rasik hodi hatama fali ba sira-nia isin, maibé iha tratamentu médiku balu neʼebé uza ita-nia raan rasik no karik la kontra matadalan sira iha Bíblia. Tan neʼe, ema ida-idak tenke hanoin didiʼak kona-ba tratamentu médiku neʼebé uza ninia raan rasik.

Entaun, bainhira Ita atu foti desizaun sira-neʼe, husu Ita-nia an pergunta sira tuirmai neʼe: ‘Se haʼu simu tratamentu médiku ida neʼebé halo haʼu-nia raan laʼo husi haʼu-nia isin ba fatin ruma, haʼu-nia laran haree katak neʼe la kontra Bíblia, ka haʼu sente katak raan neʼe presiza “fakar” ba rai? Oinsá se raan neʼe la laʼo tan ba tempu balu antes tama fali haʼu-nia isin? (Deuteronômio [Ulangan] 12:23, 24) Haʼu-nia konxiénsia bele moos nafatin ka lae, se durante tratamentu médiku ruma, doutór hasai, hadiʼa ka hamoos haʼu-nia raan, depois mak hatama fali ba isin? Haʼu hatene duni katak hodi la simu tratamentu médiku hotu neʼebé uza haʼu-nia raan, neʼe katak haʼu la bele mós simu tratamentu balu hanesan uza mákina diálize neʼebé fase raan ka lae? Molok haʼu foti desizaun ruma, haʼu halo orasaun kona-ba haʼu-nia desizaun neʼe ka lae?’

Haʼu tenke foti desizaun rasik kona-ba saida?

Hanoin kona-ba informasaun rua iha pájina 3 no 4. Informasaun 1 hatudu frasaun ka parte kiʼik neʼebé haketak husi raan hotu, neʼebé doutór sira uza ohin loron iha tratamentu médiku. Prenxe Ita-nia desizaun kona-ba tratamentu médiku neʼebé Ita rasik sei simu ka la simu. Informasaun 2 hatudu tratamentu médiku balu neʼebé uza Ita-nia raan rasik. Prenxe Ita-nia desizaun kona-ba tratamentu médiku neʼebé Ita rasik sei simu ka la simu. Informasaun sira-neʼe laʼós dokumentu neʼebé legál, maibé sai matadalan ba Ita hodi foti desizaun ho laran neʼebé moos. Ida-neʼe bele ajuda Ita hodi prenxe Ita-nia kartaun raan nian.

Desizaun sira-neʼe mak Ita rasik nian, ema seluk labele obriga Ita hodi foti desizaun ruma tuir sira-nia konxiénsia. No mós, labele duun fali ema kristaun seluk nia desizaun kona-ba tratamentu médiku nian. Ho desizaun sira-neʼe, “ema ida-idak sei lori ninia todan rasik”.—Galásia 6:4, 5.

[Nota–rodapé]

Atu ajuda ita komprende diʼak liután, bele haree informasaun iha Menara Pengawal 15 Juñu 2004, pájina 29-31.

Atu ajuda ita komprende diʼak liután, bele haree informasaun iha Menara Pengawal 15 Outubru 2000, pájina 30-31, no DVD ho títulu Transfusion Alternatives—Documentary Series (Alternatif Transfusi—Seri Dokumenter).

INFORMASAUN 1

EMA KRISTAUN LABELE SIMU

ITA-NIA DESIZAUN RASIK

RAAN HOTU

FRASAUN (parte kiʼik husi raan)

Buat neʼebé ita presiza deside

PLAZMA

ALBUMINA—UZA PORSENTU 4 HUSI PLAZMA

Albumina mak proteína neʼebé mai husi plazma. Ita bele hetan albumina iha ai-horis balu, iha ai-han hanesan susubeen no manu-tolun, no husi inan nia susubeen. Albumina neʼebé hetan husi raan bele uza ba ema neʼebé lakon raan barak ka hetan shock ka isin neʼebé ahi han. Ai-moruk sira-neʼe bele iha albumina toʼo porsentu 25. Bele hetan albumina uitoan iha ai-moruk sira seluk hanesan ai-moruk ho naran eritropoetina (EPO).

____ Haʼu simu albumina

____ Haʼu la simu albumina

IMUNOGLOBULINAS—UZA PORSENTU 3 HUSI PLAZMA

Imunoglobulinas mak proteína parte kiʼik neʼebé mai husi plazma. Bele uza ida-neʼe iha ai-moruk balu hodi tahan moras difteria,tétanu, epatite (moras-aten) neʼebé mosu tanba virus no raiva (moras-asu ka rabies). Imunoglobulinas mós bele uza atu proteje ba moras balu neʼebé kona bebé neʼebé sei iha kabun laran no moras venenu husi samea ka labadain.

____ Haʼu simu imunoglobulinas

____ Haʼu la simu imunoglobulinas

AI-MORUK NEʼEBÉ BELE HAPARA RAAN SAI—UZA PORSENTU 1 HUSI PLAZMA

Iha proteína oioin neʼebé bele hapara ita-nia raan atu sai. Bele uza proteína neʼebé bele balu ba pasiente neʼebé lakon raan barak. No mós uza proteína sira-neʼe hodi hametin fali kanek depois operasaun hotu ona. Nota: Agora iha ona ai-moruk balu neʼebé bele hapara raan no taka kulit, no sira la halo husi raan.

____ Haʼu simu ai-moruk hapara raan sai

____ Haʼu la simu ai-moruk neʼebé bele hapara raan sai

GLÓBULU MEAN

EMOGLOBINA—UZA PORSENTU 33 HUSI GLÓBULU MEAN

Ida-neʼe mak proteína neʼebé lori oksijéniu ba fatin hotu iha isin laran no lori gás dióksidu-karbonu ba ita-nia pulmaun. Iha ai-moruk balu agora halo husi ema ka animál nia emoglobina neʼebé bele ajuda ema neʼebé iha moras anemia ka lakon raan barak.

____ Haʼu simu emoglobina

____ Haʼu la simu emoglobina

HEMINA—UZA PORSENTU 2 HUSI GLÓBULU MEAN

Hemina mak enzima ida neʼebé hetan husi emoglobina hodi uza atu kura moras balu neʼebé mai husi raan neʼebé bele halo ema moras iha sira-nia kabun laran no sistema sirkulasaun raan nian.

____ Haʼu simu hemina

____ Haʼu la simu hemina

GLÓBULU MUTIN

INTERFERONS—UZA PARTE KIʼIK HUSI GLÓBULU MUTIN

Interferons mak proteína sira neʼebé bele halakon virus balu no moras kankru. Interferons barak la mai husi ema nia raan, maibé iha balu neʼebé halo husi parte kiʼik husi ema nia raan glóbulu mutin.

____ Haʼu simu interferons

____ Haʼu la simu interferons

PLAKETA

Agora daudaun seidauk iha parte kiʼik husi plaketa neʼebé uza ba tratamentu médiku nian.

INFORMASAUN 2

ITA-NIA DESIZAUN RASIK
TRATAMENTU MÉDIKU SIRA NEʼEBÉ UZA ITA-NIA RAAN RASIK
TRATAMENTU MÉDIKU NIA NARAN	TRATAMENTU MÉDIKU NEʼE HALO SAIDA	Desizaun sira neʼebé Ita presiza halo (Karik Ita bele koʼalia ho Ita-nia doutór antes Ita fó lisensa ba nia atu fó tratamentu médiku tuirmai neʼe.)
REKUPERASAUN RAAN	Atu la bele lakon raan barak. Durante operasaun, doutór bele uza mákina neʼebé bele halibur raan no hamoos raan neʼe no hatama fali ba isin.	____ Haʼu simu ____ Karik haʼu bele simu ____ Haʼu la simu
EMODILUISAUN	Atu la bele lakon raan barak. Durante operasaun, doutór bele uza mákina neʼebé halo raan balu halai ba masa soru nian. Tuirmai sira hatama fali ai-moruk been ida ba pasiente nia isin. Hodi nuneʼe, durante operasaun ai-moruk been neʼebé tama ba pasiente nia isin kahur ho raan neʼebé iha hela pasiente nia isin. Ikusmai, durante ka depois operasaun hotu tiha,doutór hatama fali raan neʼebé iha masa soru nian ba pasiente nia isin.	____ Haʼu bele simu ____ Karik haʼu bele simu ____ Haʼu la simu
MÁKINA CORAÇÃO-PULMÃO	Hodi raan bele halai nafatin. Prosesu neʼe halo raan halai nafatin liuhusi mákina coração-pulmão. Mákina neʼe fó oksijéniu ba raan hodi raan neʼe bele halai fali iha pasiente nia isin.	____ Haʼu bele simu ____ Karik haʼu bele simu ____ aʼu la simu
DIÁLIZE	Mákina neʼebé serbisu hanesan rins. Iha prosesu emodiálize, raan halai liuhusi mákina neʼe no hamoos raan antes halai fali iha pasiente nia isin.	____ Haʼu bele simu ____ Karik haʼu bele simu ____ Haʼu la simu
TAMPÃO SANGUÍNEO PERIDURAL	Hapara been neʼebé sai husi ruin kotuk. Doutór hasai pasiente nia raan uitoan no uza atu sona besik ruin kotuk. Sira halo nuneʼe hodi taka kuak no hapara been neʼebé sai husi ruin kotuk.	____ Haʼu bele simu ____ Karik haʼu bele simu ____ Haʼu la simu
PLASMAFÉRESE	Tratamentu ba moras oioin. Prosesu neʼe hasai pasiente nia raan no hamoos hodi halakon plazma no troka fali ho ai-moruk seluk, no depois mak hatama fali ba pasiente nia isin. Dala ruma, doutór balu hakarak uza plazma husi ema seluk nia raan hodi troka fali ho plazma husi pasiente nia raan. Se nuneʼe, ema kristaun labele simu tratamentu neʼe.	____ Haʼu bele simu ____ Karik haʼu bele simu ____ Haʼu la simu
MÉTODU ATU BUKA MORAS SAIDA	Hodi buka-hatene moras saida no kura. Doutór hasai ema nia raan uitoan, kahur ho ai-moruk seluk, no depois hatama fali ba pasiente nia isin. Dala ruma, tempu neʼebé raan ketak husi pasiente nia isin bele naruk ka badak.	____Haʼu bele simu ____ Karik haʼu bele simu ____ Haʼu la simu
GEL PLAKETA; AUTÓLOGAS (NEʼE KATAK “HALO HUSI ITA-NIA RAAN RASIK”)	Taka kanek, hamenus raan sai. Doutór sira hasai raan uitoan no halo neʼe sai ai-moruk ida neʼebé iha plaketa no glóbulu mutin barak. No sira uza ai-moruk neʼe atu taka kanek husi operasaun ka kanek seluk. Nota: Dala ruma, doutór sira uza ai-moruk hanesan neʼe neʼebé halo husi karau nia raan.	____ Haʼu bele simu ____ Karik haʼu bele simu ____ Haʼu la simu

Nota: Dala ruma, doutór ida bele halo tratamentu médiku tuirmai neʼe iha dalan neʼebé la hanesan ho doutór ida seluk. Tan neʼe, husu doutór atu esplika ho didiʼak ba Ita kona-ba tratamentu neʼe, hodi nuneʼe Ita bele hatene se tratamentu neʼe la kontra Bíblia nia matadalan no Ita bele foti desizaun ho laran neʼebé moos.