Laʼo ba oin nuʼudar haklaken-naʼin
1 Ita-nia Aman iha lalehan sente kontente tebes hodi haree ninia atan sira laʼo ba oin iha lia-loos. Porezemplu, nia sei sente kontente kuandu ita laʼo ba oin iha serbisu haklaken atu fahe lia-foun diʼak. Paulo fó laran-manas ba Timóteo, neʼebé serbí nuʼudar katuas iha kongregasaun, atu kontinua hakaʼas an atu haklaken no hanorin hodi nuneʼe ‘ema hotu bele haree oinsá nia laʼo ba oin’. (1 Tim 4:13-15) Ita hotu presiza hakaʼas an atu hadiʼa dalan neʼebé ita haklaken no hanorin, maski karik ita iha esperiénsia barak ona.
2 Halo planu: Atu laʼo ba oin, ita presiza halo planu. Planu saida deʼit mak ita bele halo? Planu ida neʼebé diʼak mak atu sai matenek liu hodi uza ita-nia surik espirituál, Bíblia. (Ef 6:17) Karik Ita presiza aprende atu haklaken diʼak liután iha dalan oioin, hanesan haklaken liuhusi telefone, iha estrada, ka ba ema iha sira-nia serbisu-fatin. Karik Ita hakarak hatene liután oinsá mak bele halo vizita fali. Planu ida tan neʼebé diʼak mak atu komesa no halaʼo estudu Bíblia iha dalan neʼebé diʼak liután.
3 Simu ajuda: Reuniaun kongregasaun nian, liuliu Eskola Servisu Teokrátiku no Reuniaun Serbisu, ajuda ita atu laʼo ba oin nuʼudar haklaken-naʼin. Se ita hakaʼas an atu prepara no tuir reuniaun sira-neʼe, no mós se halo tuir informasaun husi reuniaun iha ita-nia serbisu haklaken, klaru katak ita sei hetan bensaun barak.—2 Kor 9:6.
4 Ita mós presiza ajuda malu atu laʼo ba oin nuʼudar haklaken-naʼin. (Prov 27:17) Kuandu haklaken hamutuk ho ema seluk, rona didiʼak oinsá mak sira koʼalia, hodi nuneʼe Ita bele hadiʼa dalan neʼebé Ita haklaken. Liután neʼe, katuas estudu livru nian bele arranju atu Ita bele simu ajuda husi haklaken-naʼin ka pioneiru ida. Ida-neʼe hanesan bensaun boot, tanba Ita sei sai matenek liu iha serbisu haklaken no sei sai kontente! Iha haklaken-naʼin foun iha Ita-nia grupu ka lae? Karik Ita bele konvida nia atu haklaken hamutuk ho Ita.
5 Serbisu neʼebé importante liu hotu mak serbisu haklaken neʼebé ema kristaun halaʼo ohin loron. Kuandu ita hasaʼe “sakrifísiu hahiʼi” nian ba Maromak Jeová, ita hakarak fó buat neʼebé diʼak liu. (Ebr 13:15) Se ita hakaʼas an atu laʼo ba oin iha serbisu haklaken, ita sei la ‘moe kona-ba ita-nia hahalok sira iha ita-nia moris tomak, maibé tuir nafatin dalan loos ho lia-menon lia-loos nian’.—2 Tim 2:15.