Fó kmaan ba ema neʼebé triste hela
1. Tansá mak ema neʼebé nia família ka kolega ruma mate presiza atu hetan kmaan?
1 Kuandu família ka kolega ruma mate, ida-neʼe halo ema triste tebes, liuliu ba sira neʼebé seidauk iha esperansa kona-ba Maromak nia Reinu. (1 Tes 4:13) Ema barak hanoin: ‘Tansá mak ema mate? Saida mak akontese ba ema neʼebé mate ona? Haʼu bele hasoru fali nia ka lae?’ Agora, mai ita haree informasaun balu kona-ba oinsá mak ita bele fó kmaan ba ema neʼebé ita hasoru iha ita-nia serbisu haklaken, neʼebé triste hela tanba família ka kolega ruma mate.—Isa 61:2.
2. Se hasoru uma-naʼin ida neʼebé triste tebes tanba nia família foin mate, baibain diʼak atu koʼalia kleur hodi fó sasin ka lae?
2 Haklaken husi uma ba uma: Karik Ita hasoru uma-naʼin neʼebé hatete katak ninia família ida foin mate. Uma-naʼin neʼe tanis hela ka lae? Uma neʼe nakonu ho família neʼebé tanis ka lae? Se nuneʼe, diʼak liu la koʼalia kleur. (Ecle 3:1, 7) Karik Ita bele koʼalia uitoan hodi hatudu katak Ita mós hanoin kona-ba susar neʼebé nia hasoru, fó tratu ka livru neʼebé diʼak ba tempu neʼe, depois husik uma-naʼin neʼe. Iha tempu seluk, Ita bele bá fali atu fahe liafuan husi Bíblia neʼebé fó kmaan ba sira.
3. Se bele koʼalia kleur, eskritura saida deʼit mak ita bele hatudu ba uma-naʼin neʼebé triste hela?
3 Iha situasaun seluk, Ita hasoru uma-naʼin ida neʼebé mós triste hela, maibé Ita sente katak Ita bele koʼalia kleur uitoan. Maski ida-neʼe laʼós tempu diʼak atu hadiʼa sira-nia hanoin neʼebé sala, Ita bele lee eskritura balu husi Bíblia neʼebé promete kona-ba moris-hiʼas. (Joao 5:28, 29) Karik, Ita bele hatudu husi Bíblia kona-ba saida mak akontese ba ema neʼebé mate ona. (Ecle 9:5, 10) Istória husi Bíblia kona-ba ema neʼebé hetan moris-hiʼas karik sei fó kmaan ba sira. (Joao 11:39-44) Buat ida seluk neʼebé diʼak mak lee Job nia liafuan neʼebé hatudu ninia esperansa ba Maromak Jeová. (Jó 14:14, 15) Antes Ita husik uma-naʼin neʼe, Ita bele fó livru hanesan Apa yang Terjadi Dengan Kita Bila Kita Meninggal?, Bila Seseorang yang Anda Kasihi Meninggal, ka livru ka tratu seluk neʼebé diʼak. Karik Ita bele fó livru Bíblia Hanorin, hodi hatudu informasaun iha kapítulu 6, no halo planu atu koʼalia liután kona-ba ida-neʼe iha tempu oinmai.
4. Oportunidade seluk saida deʼit mak ita iha atu fó kmaan ba ema neʼebé lakon família ka kolega tanba mate?
4 Oportunidade seluk: Se serimónia atu hakoi-mate sei halo iha Salaun Reinu, ema neʼebé laʼós Testemuña mós sei tuir ka lae? Diʼak atu prepara nanis livru ka tratu neʼebé fó esperansa husi Bíblia atu fahe ba sira. Dala ruma, ita rona avizu husi rádiu ka lee iha jornál kona-ba ema ruma neʼebé foin mate, no ita bele hakerek surat hodi fó kmaan ba sira-nia família. Porezemplu, mane-faluk ida simu surat hamutuk ho tratu husi haklaken-naʼin ida, no depois neʼe nia ho ninia oan-feto bá vizita haklaken-naʼin neʼe nia uma no husu: “Ita mak hakerek surat neʼe mai haʼu ka lae? Haʼu hakarak hatene liután kona-ba Bíblia!” Mane neʼe ho ninia oan-feto hahú estuda Bíblia, no tuir kongregasaun nia reuniaun sira.
5. Tansá mak diʼak atu buka oportunidade atu fó kmaan ba ema neʼebé triste hela?
5 Eclesiastes 7:2 hatete: “Diʼak liu atu bá uma triste nian, duké bá uma festa nian.” Baibain, ema neʼebé triste hela gosta liu atu rona Maromak nia Liafuan duké ema neʼebé buka atu halo kontente sira-nia an deʼit. Ita hotu tenke buka oportunidade atu fó kmaan ba ema neʼebé triste tanba lakon família ka kolega ida neʼebé sira hadomi.