Sai badinas atu “fó sasin” ho laran-manas iha tempu hotu
1, 2. Saida mak Ita gosta liu kona-ba Paulo nia haree kona-ba haklaken lia-foun diʼak? Oinsá mak ita bele halo tuir ninia ezemplu kona-ba “fó sasin” iha tempu hotu?
1 Hanesan Jesus no Maromak nia atan sira seluk neʼebé laran-metin iha tempu uluk, apóstolu Paulo haklaken ho badinas no laran-manas atu “fó sasin” kona-ba lia-foun diʼak iha situasaun oioin. Maski nia iha uma dadur nian, “nia simu sira hotu neʼebé hakbesik nia, . . . nia haklaken Maromak nia reinu no hanorin kona-ba Naʼi Jesus Kristu”, hodi la taʼuk.—Apos 28:16-31.
2 Ita mós bele sai badinas atu “fó sasin” iha tempu hotu. Neʼe inklui haklaken ba ema neʼebé ita hasoru kuandu ita halo viajen.—Apos 28:23; Sal 145:10-13.
3. Saida mak la hanesan entre haklaken derrepente no haklaken la formál?
3 Haklaken derrepente ka la formál?: Hanesan ka lae? Lae. Haklaken derrepente katak akontese la ho planu ka mosu derrepente deʼit. Maibé tuir loloos, ita nafatin hakarak ka iha planu atu fó sasin ba ema seluk. Hanesan Paulo, importante ba ita atu fó sasin hodi fó glória ba Maromak, no ita hakarak buka oportunidade hotu, liuliu kuandu ita halo viajen. Kuandu ita halo nuneʼe, ita haklaken la formál. Haklaken iha dalan hanesan neʼe bele fó rezultadu neʼebé diʼak.
4. Oportunidade saida mak Paulo iha atu haklaken kuandu nia iha dadur laran?
4 Prepara an atu fó sasin: Paulo tenke buka oportunidade atu fó sasin kuandu nia iha uma dadur nian iha rai-Roma. Nuneʼe, nia konvida ema judeu nia ulun-naʼin sira iha rai-Roma atu vizita nia iha uma dadur nian. (Apos 28:17) Maski iha kongregasaun kristaun iha rai-Roma, Paulo hatene katak ema judeu sira iha sidade neʼe seidauk komprende buat barak kona-ba ema kristaun nia fiar. (Apos 28:22; Rom 1:7) Tan neʼe, nia la para atu “fó sasin” ho laran-manas kona-ba Jesus Kristu no kona-ba Maromak nia Reinu.
5, 6. Oportunidade diʼak saida deʼit mak ita iha atu haklaken iha dalan la formál? Oinsá mak ita prepara ita-nia an hodi bele halo ida-neʼe ho didiʼak?
5 Hanoin toʼok, kuandu ita bá fatin ida karik ita hasoru ema sira neʼebé hatene uitoan deʼit kona-ba Testemuña ba Jeová. Karik sira la hatene katak ita halaʼo estudu Bíblia neʼebé la selu. Buka oportunidade atu fó sasin ba ema neʼebé ita hasoru kuandu halo viajen, para atu deskansa, enxe mina, hola sasán, toba iha otél, han iha restaurante, kuandu saʼe bís ka oportunidade seluk tan. Hanoin uluk kona-ba oinsá ita hahú koʼalia hodi fó sasin neʼebé badak. Karik ita bele prepara an hodi fó sasin la formál ba ita-nia viziñu, família, kolega iha serbisu-fatin, no ho ema seluk neʼebé ita hasoru loroloron.
6 Livru saida mak diʼak atu uza kuandu haklaken la formál? Karik Ita hakarak uza tratu Ita Hakarak Hatene Lia-Loos ka lae? Hatudu parágrafu rua ikus iha pájina primeiru, neʼebé dada ema nia atensaun ba Bíblia. Hatudu mós formuláriu iha pájina ikus neʼebé ema bele prenxe se sira hakarak estudu Bíblia iha uma neʼebé la selu. Se Ita hetan ema neʼebé interese, hatudu ba nia livru Bíblia Hanorin. Lori mós livru Kabar Baik bagi Orang-Orang dari Segala Bangsa hodi Ita bele uza kuandu hasoru ema neʼebé koʼalia língua seluk. Iha pájina rua husi livru neʼe esplika kona-ba oinsá Ita bele fó sasin ba ema. Se Ita halo viajen ho karreta, karik Ita bele lori livru seluseluk tan hodi bele fó ba ema neʼebé hatudu interese ba lia-foun diʼak Reinu nian.
7, 8. Oinsá mak ita bele tau matan ba ita-nia hatais no hahalok kuandu ita halo viajen ka halimar?
7 Tau matan ba Ita-nia hatais no hahalok: Ita tenke kuidadu ho ita-nia hahalok no hatais atu ema seluk la ‘koʼalia aat’ kona-ba Maromak Jeová nia organizasaun. (Apos 28:22) Matadalan neʼe la uza deʼit kuandu ita tuir reuniaun boot sira, maibé uza mós kuandu ita halo viajen no kuandu halimar. Menara Pengawal 1 Agustus 2002, pájina 18, parágrafu 14, hatete: “Ita-nia hatais labele dada ema nia atensaun, hatudu isin ka roupa neʼebé la hatudu respeitu. Ita tenke hatais roupa neʼebé hatudu katak ita iha taʼuk no ‘hadomi Maromak’. Ida-neʼe mak buat neʼebé diʼak atu ita hanoin beibeik, loos ka lae? Ita hatene katak ita presiza hatais roupa neʼebé la dada ema nia atensaun kuandu ita tuir reuniaun kongregasaun nian [ka reuniaun boot sira], maibé importante mós atu ita hatais roupa neʼebé hatudu respeitu iha tempu hotu. Ita-nia hatais no hahalok tenke nafatin hatudu katak ita mak ema neʼebé hamtaʼuk Maromak, tanba ita mak ema kristaun no Maromak nia atan ba tempu tomak.”—1 Tim 2:9, 10.
8 Ita presiza hatais iha dalan neʼebé hatudu respeitu. Se ita-nia hatais no hahalok sempre hatudu katak ita iha fiar ba Maromak, ita nunka taʼuk atu haklaken iha dalan la formál tanba ita-nia hatais halo ema gosta atu rona ita.—1 Ped 3:15.
9. Paulo hetan rezultadu diʼak saida deʼit tanba nia haklaken ho badinas iha rai-Roma?
9 Haklaken la formál lori rezultadu diʼak: Durante tinan rua neʼebé Paulo hela iha dadur laran iha rai-Roma, nia haree rezultadu diʼak husi ninia hakaʼas an atu haklaken. Lucas hatete katak ema “balun fiar duni buat neʼebé nia hateten”. (Apos 28:24) Paulo haree rasik katak “fó sasin” ho laran-manas iha tempu hotu fó rezultadu diʼak duni. Nia hakerek: “Buat neʼebé mosu mai haʼu tulun duni atu habelar evanjellu. Loloos, funu-naʼin sira neʼebé iha pretóriu laran no mós sira neʼebé iha uma boot nia liʼur hatene katak haʼu iha dadur laran tanba Kristu. Liu ida-neʼe, haʼu-nia situasaun nuʼudar ema dadur ida fó aten-brani ba maun-alin sira barak atu haklaken Maromak futar lia iha ema sira-nia oin, la taʼuk.”—Flp 1:12-14.
10. Iha tinan balu liubá feen-laʼen ida hetan rezultadu diʼak saida tanba sira haklaken la formál?
10 Iha tinan balu liubá, feen-laʼen ida tuir reuniaun boot ba loron tolu. Sira hetan esperiénsia diʼak kuandu sira haklaken iha dalan la formál ba feto ida neʼebé serbisu iha restaurante, no feto neʼe husu kona-ba kartaun naran nian neʼebé sira tau. Sira esplika ba feto neʼe kona-ba reuniaun boot no mós esplika kona-ba esperansa husi Bíblia neʼebé ema sei hetan iha futuru. Sira fó tratu Ita Hakarak atu Hatene Liu kona-ba Bíblia? ba nia no mós esplika kona-ba estudu Bíblia iha uma neʼebé la selu. Feto neʼe hatete katak nia hakarak ema ida atu vizita nia, no hakerek ninia naran no hela-fatin iha tratu neʼe nia kotuk, no husu feen-laʼen neʼe atu arranju kona-ba neʼe. Oinsá ho Ita? Se Ita badinas atu “fó sasin” iha tinan neʼe, rezultadu diʼak saida mak Ita bele hetan?
11. Hahalok saida deʼit mak ita presiza hatudu atu ita bele “fó sasin” ho didiʼak iha tempu hotu?
11 Haklaken lia-foun diʼak ho badinas: Hanoin toʼok Paulo nia laran-haksolok kuandu nia rona katak ninia maluk kristaun sira halo tuir ninia ezemplu kona-ba haklaken ho badinas! Mai ita hotu mós haklaken lia-foun diʼak ho badinas iha dalan la formál atu fó-hatene ba ema seluk ita-nia fiar neʼebé mai husi Bíblia.