Prepara didiʼak ba reuniaun Memoriál

Tinan-tinan, ita prepara didiʼak ba kalan atu komemora Jesus Kristu nia mate, no sente ida-neʼe hanesan knaar espesiál neʼebé halo ita haksolok! (Lc 22:19) Buat saida deʼit mak ita bele halo hodi prepara ba reuniaun Memoriál neʼe?

◼ Oras no fatin: Ema hotu tenke hatene ho loloos kona-ba oras no fatin atu halaʼo reuniaun Memoriál. Se kongregasaun rua ka liu mak sei uza Salaun Reinu ida iha kalan neʼe, importante ba ita hotu atu tuir oras neʼebé deside tiha ona, tanba sei la iha tempu barak atu troka malu. Ita hotu tenke kuidadu atu la hamriik taka dalan ba ema seluk neʼebé atu sai tama, hanesan besik odamatan, iha fatin para karreta, no iha dalan iha liʼur.

◼ Konvite: Haklaken-naʼin hotu iha konvite no hatene ona informasaun iha laran ka lae? Ita treinu ona oinsá mak Ita sei fahe konvite neʼe ka lae? Ita sei fahe ba sé sé deʼit? Ita presiza hakaʼas an atu fahe hotu konvite antes loron Memoriál.

◼ Transporte: Karik ema balu neʼebé interese no mós ita-nia irmaun-irmán balu presiza transporte atu tuir reuniaun Memoriál. Ita halo arranju saida atu ajuda sira?

◼ Paun no tua-uvas: Katuas sira tenke haree didiʼak atu la bele pasa paun no tua-uvas antes loro-matan monu. Se iha irmaun ka irmán neʼebé kose mina no la bele tuir reuniaun Memoriál tanba moras, katuas sira tenke halo arranju ruma atu nia bele han paun no hemu tua-uvas. Prepara didiʼak paun no tua-uvas neʼebé loos.—Haree Menara Pengawal 15 Februari 2003, pájina 14-5, parágrafu 14, 17.

◼ Salaun Reinu: Salaun tenkesér hamoos didiʼak. Ita mós presiza prepara bikan, kopu, meza, no hena meza, no tau prontu kedan. Se uza fatin seluk atu halaʼo reuniaun Memoriál, tenke prepara didiʼak mikrofone atu ema hotu neʼebé asiste sei rona ho moos. Presiza hili nanis asistente no irmaun sira neʼebé sei pasa paun no tua-uvas, no sira hotu tenke hatene ho klaru oinsá mak sira sei halaʼo sira-nia knaar iha kalan neʼe. Sira mós tenke hatene katak sira presiza hatais no hadiʼa an iha dalan neʼebé loos.

Kalan atu komemora Jesus Kristu nia mate, neʼe mak selebrasaun neʼebé importante liu, no ita ida-idak no mós nuʼudar kongregasaun hakarak prepara didiʼak ba selebrasaun neʼe. Ita fiar duni katak Maromak Jeová sei haraik bensaun ba ema hotu neʼebé hafolin buat neʼebé nia halo tiha mai ita, hodi saran ninia Oan doben nia moris nuʼudar sakrifísiu.