Pergunta husi haklaken-naʼin

◼ Kongregasaun sira ka ema naran deʼit bele uza logo neʼebé reprezenta asosiasaun sira neʼebé Testemuña ba Jeová uza ka lae?

Logo mak símbolu, ka naran, ka dezeñu ruma neʼebé reprezenta organizasaun ida atu ema bele hatene lailais. Logo, ka dezeñu neʼebé haree hanesan torre, ka menara, reprezenta organizasaun Watch Tower Bible and Tract Society of Pennsylvania no asosiasaun seluk neʼebé organizasaun neʼe uza no rejista ona ho governu. Kongregasaun Kristaun husi Testemuña ba Jeová nia logo mak dezeñu ho Bíblia ida neʼebé nakloke iha surat sira-nia leten. Asosiasaun seluk neʼebé Testemuña ba Jeová uza iha logo oin-seluk tan.

Kongregasaun sira ka ema naran deʼit labele uza logo ka naran sira, símbolu, ka dezeñu, ka buat ruma neʼebé haree hanesan ho logo neʼebé sira uza iha ita-nia organizasaun. Porezemplu, labele uza logo iha sira-nia Salaun Reinu nia oin, iha surat atu hakerek karta, ka iha sasán naran deʼit. Tanba se uza organizasaun nia logo, ida-neʼe bele halo konfuzaun ba funsionáriu governu, haklaken-naʼin, no ema seluk hodi halo sira hanoin katak kongregasaun iha relasaun ho asosiasaun sira neʼebé organizasaun uza, tanba uza logo hanesan. Ida-neʼe mós bele akontese ho surat ruma, tanba se uza logo ka naran hanesan iha surat, bele halo ema komprende sala, sira bele hanoin katak surat neʼe mai husi sede-jerál ka sukursál.

Logo neʼebé hatudu dezeñu kona-ba torre, ka menara, ka dezeñu ruma neʼebé haree hanesan, labele uza iha projetu ruma atu harii Salaun Reinu iha futuru maski Salaun Reinu mak organizasaun ninian. Kongregasaun sira neʼebé uza tiha ona logo neʼe iha sira-nia Salaun Reinu nia oin, lalika troka kedas ho sinál, ka dezeñu seluk, tanba halo ida-neʼe karik presiza serbisu barak no gasta osan barak. Se presiza halo serbisu boot hanesan neʼe, entaun bele hein toʼo tempu atu hadiʼa reuniaun-fatin. Maibé, se serbisu ladún boot, kongregasaun sira tenke hanoin atu troka sinál iha Salaun Reinu nia oin.