Ita-nia serbisu haklaken haleno ita-nia domin ba Maromak
1. Jesus nia domin ba Maromak book nia atu halo saida?
1 Domin book Jesus atu haklaken. Serbisu hotu neʼebé Jesus halo hatudu momoos ninia domin ba Maromak Jeová. Jesus dehan: “Atu mundu bele hatene katak haʼu hadomi Aman no oinsá Aman haruka haʼu, nuneʼe mak haʼu halo.” (Joao 14:31) Nuʼudar ema neʼebé laʼo tuir Jesus nia ain-fatin, ita iha priviléjiu atu hatudu ita-nia domin kleʼan ba Maromak bainhira ita halaʼo serbisu haklaken.—Mt 22:37; Ef 5:1, 2.
2. Domin ba Maromak Jeová book ita atu halo saida deʼit iha serbisu haklaken?
2 “Halo Ita naran sai santu”: Bainhira ita ho laran-manas aproveita oportunidade hotu atu koʼalia ba ema seluk kona-ba Maromak Jeová no ninia Reinu, ita hatudu ita-nia domin ba Maromak, ho nuneʼe, ita hola parte atu halo santu nia naran. (Sal 83:18; Eze 36:23; Mt 6:9) Hanesan Jesus, ita-nia serbisu ba Maromak Jeová mak dalan ida atu haleno nafatin ita-nia hakarak husi laran atu halo santu Maromak nia naran no atu halo ninia hakarak.—Mt 26:39.
3. Oinsá mak ita-nia domin ba Maromak Jeová ajuda ita tahan hasoru susar?
3 Domin book ita atu tahan hasoru susar: Domin ba Maromak Jeová halo ita tahan buat hotu. (1 Kor 13:4, 7) Maski Jesus hasoru situasaun susar oioin iha nia moris, nia la husik buat ida atu hanetik nia atu halaʼo ninia serbisu. Tanba Jesus iha domin kleʼan ba Maromak no iha hakarak atu halo Maromak Jeová nia hakarak, ida-neʼe ajuda nia atu tahan. (Mc 3:21; 1 Ped 2:18-23) Ita mós hasoru susar barak, maibé ita-nia domin ba Maromak bele ajuda ita atu tahan. Hodi halo tuir Jesus nia ezemplu, ita mós la husik buat ida atu hanetik ita atu halaʼo ita-nia serbisu haklaken. Maski karik ita-nia família kontra ita, ita-nia saúde ladún diʼak, ita ferik-katuas, ka ema lakohi rona ita, maibé ita la husik ida-neʼe hapara ita atu hatudu domin ba Maromak Jeová hodi halo didiʼak ita-nia serbisu haklaken.
4. Ita-nia domin ba Maromak Jeová fó ita oportunidade atu halo saida?
4 Domin iha forsa boot, no Maromak haraik mai ita kbiit nuʼudar bensaun atu bele hatudu ita-nia domin ho laran tomak ba nia iha ita-nia serbisu haklaken. (1 Kor 13:13) Tempu atu halo Maromak Jeová nia naran sai santu ba nafatin besik ona, tan neʼe mai ‘ita-nia domin lori ita loron-loron’.—Flp 1:9; Mt 22:36-38.