Hakaʼas an atu haklaken ba mane sira
1. Agora kongregasaun sira iha presiza saida?
1 Nuʼudar serbisu haklaken laʼo ba oin iha loron ikus sira-neʼe, ita presiza irmaun barak liután atu halaʼo knaar oioin iha kongregasaun. (Mc 4:30-32; Apos 20:28; 1 Tim 3:1-13) Maski nuneʼe, iha rai balu, husi sira neʼebé simu mensajen Reinu nian, feto mak barak no mane ladún. Iha rai balu, mane sira husik feen sira halaʼo atividade relijiaun nian no hanorin oan kona-ba Maromak. Oinsá mak ita bele ajuda mane sira atu hafolin buat espirituál no serbí Maromak Jeová hamutuk ho ita?
2. Rezultadu diʼak saida mak apóstolu Paulo no Pedro hetan hodi haklaken ba mane?
2 Tansá haklaken ba mane? Dala barak, kuandu família nia ulun simu lia-loos, nia mós ajuda família atu serbí Maromak hamutuk ho nia. Porezemplu, kuandu Paulo no Silas tama iha dadur, sira haklaken ba dadur nia naʼi-ulun. Rezultadu mak nia ho nia família tomak hetan batizmu. (Apos 16:25-34) No mós kuandu apóstolu Paulo haklaken iha Korintu, ‘Crispo, sinagoga nia naʼi-ulun, fiar Naʼi ho nia família tomak’. (Apos 18:8) Ezemplu seluk mak kuandu Maromak Jeová haruka Pedro atu haklaken ba Cornélio, komandante ida neʼebé “ema diʼak no hamtaʼuk Maromak”. Cornélio simu, no rezultadu mak nia família no kolega diʼak sira mós hetan batizmu hamutuk ho nia.—Apos 10:1-48.
3. Oinsá mak ita bele halo tuir Filipe nia ezemplu hodi fó sasin ba “ema-boot”?
3 Haklaken ba “naʼi-ulun sira” bele lori bensaun ba ema barak. (1 Tim 2:1, 2) Porezemplu, Maromak Jeová nia anju husu Filipe atu koʼalia ba “ema-boot” ida neʼebé tau matan ba liurai-feto Etiópia nia rikusoin tomak. Filipe rona mane neʼe “lee eskritura santa kona-ba profeta Isaías” no haklaken lia-foun diʼak kona-ba Jesus ba nia. Mane neʼe sai dixípulu ida, no karik nia mós habelar lia-foun diʼak neʼe nuʼudar nia laʼo rai dook hodi fila ba Etiópia. Karik nia mós haklaken ba liurai-feto no ema-boot sira iha ninia rai. Baibain ema-boot hanesan neʼe la iha oportunidade atu rona lia-foun diʼak.—Apos 8:26-39.
4. Saida deʼit mak ita bele halo atu fahe lia-foun diʼak ba mane sira?
4 Oinsá haklaken ba mane? Mane barak serbisu loron-loron. Karik ita bele buka tempu atu haklaken iha kalan, loron-sábadu no domingu, ka loron feriadu. Hodi haklaken iha área neʼebé mane barak serbisu, ita bele koʼalia ho mane sira neʼebé baibain la hasoru kuandu ita haklaken uma ba uma. Irmaun sira mós bele hakaʼas an atu fó sasin ba kolega mane sira iha serbisu-fatin. No mós kuandu ita bá haklaken uma ba uma, liuliu iha área neʼebé ita haklaken beibeik, diʼak mós ba irmaun sira atu husu uma-naʼin atubele koʼalia ho mane sira.
5. Kuandu irmán ida mak hasoru mane neʼebé simu lia-loos, nia bele halo saida?
5 Kuandu irmán ida mak hasoru mane neʼebé simu lia-loos, nia labele halo vizita fali mesak. Nia bele bá hamutuk ho nia laʼen ka haklaken-naʼin seluk. Se mane neʼe hakarak duni atu aprende liután, diʼak liu atu entrega ema neʼe ba irmaun.
6. Oinsá mak ita bele halo tuir Paulo nia ezemplu atu “manán ema barak liu”?
6 Hili tópiku diʼak atu koʼalia: Apóstolu Paulo hanoin nia rona-naʼin no koʼalia tuir buat neʼebé sira interese atu “manán ema barak liu”. (1 Kor 9:19-23) Ita mós presiza hanoin kona-ba tópiku diʼak atu koʼalia ho mane sira neʼebé ita hasoru, no prepara didiʼak. Porezemplu, mane barak hanoin kona-ba problema ekonomia, governu neʼebé diʼak, no mós kona-ba proteje família. Karik mane balu mós gosta tópiku hanesan tansá mak Maromak kria ita ema, tansá mak Maromak husik ema nia terus, no mundu neʼe nia futuru sei sai oinsá. Se ita hili tópiku diʼak atu koʼalia ho ema ida-idak, sai fasil liu ba sira atu simu mensajen Reinu nian.—Prov 16:23.
7. Oinsá mak ita hotu bele ajuda laʼen sira neʼebé seidauk tama lia-loos?
7 Ajuda laʼen sira neʼebé seidauk tama lia-loos: Dala barak irmán sira-nia hahalok diʼak ajuda sira-nia laʼen atu tama lia-loos. Maibé, ita hotu iha kongregasaun bele ajuda mane sira-neʼe. (1 Ped 3:1-4) Kuandu sira tuir reuniaun hamutuk ho feen neʼebé Testemuña ona, karik neʼe hatudu katak sira interese ba buat neʼebé espirituál. Hodi hakbesik ba sira no hatudu laran-diʼak, ita bele book sira atu komesa estuda Bíblia.
8. Oinsá mak irmaun sira bele ajuda laʼen sira neʼebé ladún hatudu interese ba lia-loos?
8 Iha mós laʼen balu neʼebé ladún hatudu interese ba lia-loos maibé karik neineik-neineik sira sei gosta koʼalia kona-ba Bíblia ho irmaun neʼebé sai ona sira-nia kolega. Irmaun sira iha kongregasaun ida deside atu ajuda família ida neʼebé feen deʼit mak Testemuña. Kuandu vizita família neʼe, sira mós buka dalan atu koʼalia halimar ho laʼen. Neineik-neineik sira komesa koʼalia kona-ba buat neʼebé espirituál, no ikusmai nia mós hetan batizmu. Ezemplu seluk mak irmaun ida neʼebé ajuda laʼen ida atu harii lutu ba nia uma. Hodi hatudu domin iha dalan hanesan neʼe, nia komesa estuda Bíblia. (Gal 6:10; Flp 2:4) Se Ita mak irmaun ida, karik Ita mós bele ajuda laʼen sira neʼebé seidauk tama lia-loos. Bele ka lae?
9. Rezultadu diʼak saida mak kongregasaun bele hetan husi mane sira neʼebé tama lia-loos?
9 Irmaun sira iha kongregasaun: Mane sira neʼebé tama lia-loos no prontu atu simu treinu hodi kaer responsabilidade oioin atu serbí Maromak Jeová, ikusmai bele serbí nuʼudar katuas iha kongregasaun. Sira sai hanesan “kmanek oioin” ba Maromak Jeová nia povu. (Ef 4:8; Sal 68:18) Sira uza sira-nia tempu no esperiénsia hodi tau matan ba Maromak nia bibi ho laran-haksolok. (1 Ped 5:2, 3) Ita kontente loos tanba ita iha mane sira hanesan neʼe iha Maromak nia organizasaun!
10. Oinsá mak Ananias nia haklaken ba Paulo lori bensaun ba ema barak?
10 Porezemplu, hanoin toʼok kona-ba Paulo neʼebé uluk fó-terus ba ema kristaun. (Rom 11:13) Kuandu Jesus haruka Ananias atu haklaken ba Paulo, foufoun Ananias lakohi tanba nia rona kona-ba Paulo nia hahalok aat, maibé nia halo tuir. Rezultadu mak Paulo sai apóstolu ida no ninia serbisu haklaken lori bensaun ba ema barak. Ohin loron mós ema rihun ba rihun iha mundu tomak hetan bensaun barak hodi lee ninia surat iha Bíblia laran.—Apos 9:3-19; 2 Tim 3:16, 17.
11. Tansá mak diʼak atu buka dalan oioin hodi ajuda mane sira tama lia-loos?
11 Entaun, mai ita buka dalan oioin atu ajuda mane sira tama lia-loos. Hodi halo nuneʼe, ita bele fiar katak Maromak Jeová sei haraik bensaun ba ita-nia hakaʼas-an atu apoia ninia Reinu.