Ajuda ita-nia maluk nia kaben neʼebé seidauk iha lia-loos
1. Sé-sé deʼit mak hakarak ajuda ita-nia maluk nia kaben neʼebé seidauk iha lia-loos?
1 Iha ita-nia kongregasaun, iha haklaken-naʼin ruma neʼebé ninia kaben seidauk iha lia-loos ka lae? Klaru katak sira neʼebé iha situasaun hanesan neʼe hein tempu neʼebé sira-nia kaben mós sei adora Maromak Jeová hamutuk ho sira. Maibé, laʼós katak sira deʼit mak hakarak nuneʼe. Maromak “hakarak katak ema hotu hetan maksoin no simu matenek kona-ba lia-loos”, no kongregasaun tomak mós sente hanesan neʼe. (1 Tim 2:4) Entaun, oinsá mak ita bele ajuda ita-nia maluk nia kaben neʼebé seidauk iha lia-loos?
2. Tansá mak diʼak atu buka-hatene ita-nia maluk nia kaben neʼebé seidauk iha lia-loos nia sentimentu?
2 Ulukliu, ita presiza buka atu komprende ema neʼebé laʼós fiar-naʼin nia sentimentu. Sira barak hadomi sira-nia família no hakaʼas an atu sai feen ka laʼen neʼebé diʼak no mós atu haboot sira-nia oan ho diʼak. Karik sira mós iha ona fiar neʼebé la hanesan ho ita. Dala ruma sira ladún hatene kona-ba Testemuña ba Jeová, ka sira hatene deʼit husi ema seluk neʼebé la gosta Testemuña sira. Sira balu hirus tanba hanoin katak sira-nia kaben uza beibeik tempu atu bá reuniaun ka haklaken no la iha ona tempu atu hamutuk ho família. Hodi buka-hatene sira-nia sentimentu, ida-neʼe ajuda ita atu hatudu respeitu no laran-diʼak ba sira no la sai taʼuk demais atu hakbesik sira.—Prov 16:20-23.
3. Oinsá mak ita bele dada feen ka laʼen neʼebé seidauk iha lia-loos?
3 Hatudu interese ba sira: Atu dada sira ba lia-loos, dalan diʼak liu mak hatudu hahalok diʼak, laʼós koʼalia deʼit kona-ba Bíblia, liuliu kuandu ita foin koñese sira. (1 Ped 3:1, 2) Tan neʼe, importante atu hatudu interese ba sira no sai sira-nia kolega neʼebé diʼak. Irmán sira iha kongregasaun bele hakbesik ba feen sira neʼebé seidauk iha lia-loos no irmaun sira bele hakbesik ba laʼen sira neʼebé seidauk iha lia-loos. Oinsá?
4. Oinsá mak ita bele hatudu interese ba feen ka laʼen neʼebé seidauk iha lia-loos?
4 Se Ita seidauk koñese ita-nia maluk nia kaben neʼebé seidauk iha lia-loos, karik diʼak atu husu uluk lai ba ita-nia maluk neʼe kona-ba ninia situasaun no depois mak habesik nia. Maski nia lakohi simu Ita, keta sai laran-tun. Ita-nia hahalok diʼak karik book nia atu hanoin diʼak kona-ba Testemuña ba Jeová. (Rom 12:20) Ita-nia irmaun-irmán balu neʼebé iha esperiénsia ona konvida irmán ka irmaun ho ninia família tomak atu han hamutuk, hodi nuneʼe sira bele koñese malu ho diʼak no ajuda nia kaben neʼebé seidauk iha lia-loos atu la hanoin aat kona-ba Testemuña sira. Se Ita mós halo nuneʼe, koʼalia kona-ba buat neʼebé nia gosta, no la hakaʼas nia atu koʼalia kona-ba Bíblia. Tuirmai, kuandu kaben neʼe sente kontente ona ho Testemuña, karik Ita bele koʼalia kona-ba Bíblia. Karik Ita mós bele konvida nia atu asiste ita-nia reuniaun hodi haree buat neʼebé ninia kaben aprende daudauk, liuliu kuandu nia koñese ona irmaun-irmán balu iha kongregasaun. Maski nia seidauk prontu atu aprende lia-loos, ita mós bele gaba nia tanba nia apoia nia kaben neʼebé tuir lia-loos.
5. Oinsá mak katuas sira bele ajuda feen ka laʼen neʼebé seidauk iha lia-loos?
5 Liuliu katuas sira iha kongregasaun presiza hakaʼas an atu ajuda feen ka laʼen neʼebé seidauk iha lia-loos no buka oportunidade atu fó sasin ba sira. Porezemplu, kuandu kaben neʼebé seidauk fiar-naʼin tama ospitál ka hetan moras boot, karik sira sente kontente atu simu liafuan ruma husi Bíblia. No mós se sira hasoru problema ruma, hanesan família mate, katuas sira bele konvida sira-nia família tomak halibur no rona liafuan neʼebé fó kmaan ba sira.
6. Tansá mak ita hakarak ajuda ita-nia maluk nia kaben neʼebé seidauk iha lia-loos?
6 Hanoin toʼok, oinsá mak ita-nia irmaun ka irmán iha ita-nia kongregasaun sei sente kontente kuandu ninia kaben ikusmai tama lia-loos! Laʼós neʼe deʼit, Maromak Jeová, anju sira, no ita hotu iha kongregasaun mós sente haksolok tebes. (Lc 15:7, 10) Maski ita-nia maluk nia kaben ladún simu ita, ita nafatin bele haksolok hodi hatene katak ita-nia hakaʼas-an lori ksolok ba Maromak Jeová, neʼebé “lakohi katak ema ida lakon, maibé atu ema hotu bele hakribi nia sala”.—2 Ped 3:9.
[Liafuan neʼebé foti husi pájina 6]
Atu dada sira ba lia-loos, dalan diʼak liu mak hatudu hahalok diʼak, laʼós koʼalia deʼit kona-ba Bíblia, liuliu kuandu ita foin koñese sira