Bainhira mak ita vizita fali sira neʼebé hatudu interese?
1. Knaar atu halo dixípulu envolve saida?
1 Knaar atu halo dixípulu envolve vizita fali sira neʼebé hatudu interese no hakarak aprende tan kona-ba Maromak Jeová nia Reinu. (Mt 28:19, 20) Dala barak, tempu diʼak atu vizita fali ema neʼebé interese depende ba ita-nia planu no ema neʼe nia tempu. Tansá mak ita labele demora atu halo vizita fali ba sira neʼebé hatudu interese?
2, 3. Tansá mak ita labele demora atu halo vizita fali?
2 Tansá labele demora? Ita-nia serbisu atu haklaken “lia-foun reinu nian neʼe” besik ona atu ramata, no mundu neʼe nia rohan mós besik ona. (Mt 24:14; 1 Ped 4:7) Agora “loron maksoin” ba ema neʼebé hatudu interese ba lia-loos hela uitoan deʼit. Tan neʼe, ita tenke hakaʼas an atu halo tuir apóstolu Paulo nia liafuan atu “haklaken lia-menon neʼe” ho urjente, neʼe inklui mós la demora atu vizita fali sira neʼebé hatudu interese.—2 Kor 6:1, 2; 2 Tim 4:1, 2.
3 Satanás laran-manas atu estraga fini lia-loos nian neʼebé ita kuda iha ema nia laran. (Mc 4:14, 15) Baibain, ema neʼebé hatudu interese hasoru problema husi família, kolega iha serbisu-fatin no ema seluk. Maibé, hodi halo vizita fali lailais ita bele koʼalia liután kona-ba buat neʼebé ita koʼalia uluk, antes ema seluk halakon sira-nia hakarak atu hatene liután kona-ba lia-loos.
4. Iha vizita primeiru, saida mak ita bele halo atubele vizita fali?
4 Halo planu: Iha vizita primeiru, diʼak atu halo planu atu vizita fali uma-naʼin. Husu pergunta ida neʼebé Ita sei hatán kuandu Ita halo vizita fali. Diʼak atu hakerek buat neʼebé Ita koʼalia tiha ona no mós buat neʼebé Ita sei koʼalia kuandu vizita fali nia. Se bele, diʼak mós Ita husu uma-naʼin atu Ita vizita fali nia aban, ka iha loron rua ka tolu tuirmai. Kuandu Ita haklaken iha findesemana no hasoru ema neʼebé interese, no se ema neʼe serbisu iha semana nia laran, karik Ita bele halo planu atu vizita fali nia iha findesemana tuirmai. Se Ita promete atu vizita nia, hakaʼas an atu halo tuir Ita-nia liafuan.—Mt 5:37.
5. Oinsá mak la demora vizita fali sira neʼebé hatudu interese ajuda ita atu halo tuir knaar neʼebé Jesus fó?
5 Ita iha razaun diʼak atu la demora vizita fali sira neʼebé hatudu interese. Tan neʼe, halo planu no labele demora atu vizita fali sira tanba “tempu badak liu ona”. (1 Kor 7:29) Se ita la demora atu vizita fali sira neʼebé hatudu interese ba lia-foun diʼak Reinu nian, karik ita sei hetan rezultadu diʼak liu.