Aumenta ita-nia matenek iha serbisu haklaken—Loke dalan atubele halo vizita fali

Tanbasá importante: Bainhira ita hasoru ema ida neʼebé interese ba lia-loos, ita hakarak tebes vizita fali nia iha tempu neʼebé nia iha uma atubele rega fini lia-loos nian neʼebé ita kuda ona. (1 Korinto 3:6) Tan neʼe bainhira ita atu fahe malu ho uma-naʼin, ita presiza husu bainhira mak bele hasoru malu fali ho nia. No diʼak mós atu husik pergunta ida neʼebé ita sei koʼalia hamutuk bainhira bá vizita fali. Nuneʼe uma-naʼin sei hein ita atu vizita nia. Se pergunta neʼe foti husi tratu ka livru neʼebé ita fó ba nia, nia sei hakarak lee atubele hetan resposta. Se ita koko halo buat hirak-neʼe, fasil deʼit ba ita atu vizita fali uma-naʼin tanba hatene ona tópiku neʼebé ita atu koʼalia ho nia. Bainhira vizita fali nia ita bele dehan: “Haʼu mai fali atu koʼalia kona-ba pergunta neʼebé uluk temi ona.” Depois ita bele kontinua dada lia ho uma-naʼin.

Oinsá atu halo ida-neʼe:

• Antes bá haklaken husi uma ba uma, prepara liafuan atu koʼalia no prepara mós pergunta ida ba uma-naʼin hodi nuneʼe loke dalan ba ita atu halo vizita fali. Pergunta neʼe bele foti husi tratu ka livru neʼebé ita fó ba uma-naʼin ka husi livru neʼebé ita sei lori fali atu estuda ho nia.

• Bainhira atu fahe malu ona ho uma-naʼin, fó-hatene nia katak ita hakarak atu koʼalia fali ho nia no depois husik pergunta ida ba nia. Iha haklaken-fatin balu ema okupadu tebes no lakohi hameno malu atu hasoru malu fali. Se nuneʼe, ita bele dehan: “Baibain oras hanesan neʼe Ita-Boot iha uma ka lae? [Hein ba resposta.] Se bele semana oin haʼu sei mai fali atu koʼalia kona-ba pergunta ida-neʼe . . . Se haʼu mai Ita-Boot la iha tempu mós la buat ida.”

• Se ita hameno ona tempu ida atu vizita uma-naʼin, ita presiza halo tuir ita-nia promete. (Mateus 5:37) No mós husik tan pergunta seluk neʼebé bele loke dalan atu kontinua vizita fali nia.

Koko ida-neʼe durante fulan neʼe:

• Antes bá haklaken husi uma ba uma, prepara liafuan atu koʼalia no prepara mós pergunta ida ba uma-naʼin hodi nuneʼe loke dalan ba ita atu halo vizita fali. Fó-hatene ita-nia planu sira ba maluk kristaun sira hodi troka ideia ba malu.